MATAYO 20 - Bibilia Kui Mdedie fo Kimochi

¹ Wumangi wo ruwehu nyi wafananyi na mndu menyi kanyi elelawa ikure kanyi ngamenyi nahende kushihya waṟundi weṟundya pesa wa kulya demehu lyake likeri lya msabibu.

² Kyasia wamidikyana kimu na waṟundi walya kya dinari iwe nyi kya woṟunda wo mfiri fumu kawaduma kulya demehu lyake lya msabibu.

³ Kawuya kakure-se lingi kushikye kufui na saa ya kaṟaṟu. Kawona wengi wahoṟoki alya tumo walawode kindo wechiwuta.

⁴ Kawewia na wandu walya, “Kewehendenyi nanyo kulya demehu lya msabibu. Na kindo sa kisumuhanyi njechimwinenga.”

⁵ Nawo wakakuhendya. Kawuya kakure-se lingi kanyi kukeri kufui na saa ya kaṟandaṟu na saa kenda kawewuta ado.

⁶ Kushikye kufui na saa ikumi na imu kakure kanyi kawona wengi wahoṟoki-ho. Kawawia, “Nki ili motsinda muhoṟoki iya mlawode ma kindo mochiwuta?”

⁷ Wakambia, “Nyi ili lulawona molupfula kya iṟunda.” Kawawia, “Kewehendenyi nanyo alya demehu lya msabibu.”

⁸ Kyasia komshika iila menyi dema lya msabibu kalaha ulya mokalya-ho, “Henda lahang'u waṟundi wo nowewainenga kya woṟunda wowo uwoke iwo wafurumyeho ushike iwo wasongoe.”

⁹ Walya wacha kufui na saa ikumi na imu wakacha naho wakaambya orio mndu na dinari.

¹⁰ Kyasia walya wasongoe wamcha wakahamba kulako nyi wechyambya kya wueṟa. Nawo wakaweambya orio mndu na dinari mndu na dinari yake wose.

¹¹ Wekyambya wakanunuwya menyi kanyi ulya.

¹² Wakahamba, “Ashika-wo iwo wafurumya na saa imu tupu waṟundaho. Na iyo kowuya iwang'ang'anyisha naso. Naso nyi lotsinda lichikarishya mawina ha mfiri puti na mu fo.”

¹³ Nao kahaluo kawia ulya umu-ho, “Mbuya yako manya chi ngakuwia kilai kya sumhanapfo. Chi loweidikyana kimu kya dinari.

¹⁴ Kekudae iki kyapfo nokuhendye; na ngakukundya iinenga ichu afurumya kyake kifoyanyi na kyapfo.

¹⁵ Ngesa ishi shako nyi ohamba nyi kilanjisumuhanye iwuta nasho chando ngakunda? Ang'u nyi onjiambuya kinyeeri ili njii njido mwoloru?

¹⁶ Nyi wudong'u iwo wafurumya wechiwa wasongoru na iwo wesonguo wawe wafurumi.”

Yesu ahamba lya kaṟaṟu kya opfu loke

¹⁷ Kyasia Yesu kechido na kulya Yerusalemu, nalyo kaduo walya ikumi na wawi handu ha kiseekenyi. Wechihenda kawawia,

¹⁸ “Ambuyenyi lukeri-ng'u ihenda ido na kulya Yerusalemu. Na Manomndu nahende dambikyo wakohanyi wo wanene na walosha wa mawawaso. Nawo wambutye owingo lo opfu.

¹⁹ Wawehenda mdambikya na wandu wo wa mbaṟi njihenu kundo wechimtaluo na imkapa na ngowa tso tsii ntochye msha, wawembambya na msalabe-hu. Na ili mfiri fo kaṟaṟu naṟuke.”

Kiterewo kya mae o Yakobo na Yohane

²⁰ Nalyo mae o wana wa Sebedayo kacha na handu ai arianyi na wana walya wake. Kamolokya nndenyi kamterewa kindo nainengo nyio.

²¹ Nao kammbesa, “Nyi kiki uiterewa?” Mka ulya kambia, “Hamba ke wana wa wako wawi wadamye ichu ungi ora lo kulyo na ichu umu ora lo kumoso ipfo wumanginyi wopfo.”

²² Yesu kahaluo kahamba, “Momanya iki muiterewapfo. Nyimochiidima inyo kirahunyi iki njikeri inyoya inyi?” Wakambia, “Na lochiidima.”

²³ Kawawia, “Kirahunyi kyako na mochinyoya-ho. Kya indi idamya ora loko lo kulyo ma lo kumoso kyalyo chi kyako kyeinenga mndupfo. Nyi lyawa lya walya wai wasuṟumye nyi Wande.”

²⁴ Kyasia walya ikumi na wawi wamicho wado wakapfuluko kya wana walya wa mka wa wawi.

²⁵ Yesu kawalaha na hando hamu kawawia, “Muichi ke wamangi wa wandu wa masangenyi nyi wawaitoṟye na iwo wanene wakawaapfinya.

²⁶ Kya indi kunu kiidi kyanu kilawe kido. Shile na orio mndu ose ichu echikunda iwa mnene kunu konu nawe nyi mompfuṟukanya.

²⁷ Na ichu echikunda iwa mndu msongoru kunu konu nawe nyi isinga lyanu.

²⁸ Na chando Mana o mndu alalecha kunu kepfuṟukanyo, nyi kundu o napfuṟukane-ho naweinengya-ho na moo foke fuwe ndalai yetalaa wafoi.”

Yesu achiṟa wapfu meso wawi

²⁹ Kyasia ili wewuka kulya Yeriko wandu wakamituma numa yake mamwingi sa fung'anyi.

³⁰ Nalyo adi a walya wandu wapfu meso wawi wadamye oo mamba na njia. Wekiicho Yesu aida-ho wakakoṟoṟoma ilaha wehamba, “Kelusaṟye-wo wukiwa iyo Mana o Dawidi!”

³¹ Kyasia mamwingi fulya fukawatoloma kundu watsie. Nawo wakaengeṟa iirya ṟu wehamba, “Hoi Mndumii kelusaṟye-wo wukiwa kui Mana o Dawidi!”

³² Na Yesu katirima-ho kainduka kahamba, “A nyi kiki mokunda; ke njimbike njida?”

³³ Wakambia, “Nyi kundu meso hadu hatambaṟuke.”

³⁴ Yesu kawalilia makulili kapaya meso hawo. Nalyo wadi wakawuya ambuo. Wakaoshana nao.