MATAYO 2 - Bibilia Kui Mdedie fo Kimochi

¹ Yesu kekifeo kulya Betlehemu, fuwei mṟi fo Yudaya, mandi ha mangi Herode, wadi a-walya wandu walaanyi wacha na kulya Yerusalemu, wawuka kya kulya ora la ngamenyi, wakahamba,

² “Mangi-i ya Wayuda ilefeo nyiku ikerimbo? Kipfa nyi lulewona wuṟingishi wo nyenyeri yake kulya kya ora lo ngamenyi, naso lukacha lumwindie-wo!”

³ Mangi Herode kekiicho ado, kawuko nyi madima, handu hamu na wandu wa Yerusalemu wose.

⁴ Kadumia wakohanyi wanene wache sanzia handu hamu wose, hamu na walaanyi wa shitapu wa kulya sangenyi, kawaloṟa kundu Kristo echifeeyo.

⁵ Nawo wakahamba, “Nyi kulya Betlehemu ya kulya Yudaya, chakipfa nyi wudi mwikimbi ahambie,

⁶ ‘Na iyo Betlehemu ukeri ya oruka lo Yuda, ukeri mtutu konyiia wamangi wo Yuda-pfo, kipfa kopfo iyo nyi kochikaa kuwuke mwitoṟi molisiṟa wandu wako Israeli!’”

⁷ Naho Herode kalaha walaanyi walya kui kirika kawasoṟasoṟa kiheri walewona nyenyeri iya.

⁸ Kawasama ke wahende Betlehemu kawawia, “Kehenda tumenyi mnu mbonyi tsa kimana kilya mutsiṟingishie; mukammaa ikiwona muwuye munjiwie mbehenda ikiindya.”

⁹ Kyasia wameicho kilya kya mangi wakakuhendia, na nyenyeri iya waleiwona kulya kya ora lo ngamenyi, wadi aiya yamecha iwasongoya ikatana yawashitsa alya handu mana akeri, ikatirimaho.

¹⁰ Wekiwona nyenyeri iya, wakachihio mnu.

¹¹ Wakaida na mba, wakawona mana ulya akeri na mae Maria. Wakakuhutsa wanda na kyamu, wakampfiria ndi. Wakawuya wakapfunguo shindo shawo wawerie sha kisa, wakamwimaya nasho; nyi sahabu, na uvumba, na manemane.

¹² Indi Ruwa, kawawawasa kui ndodo, wakawuya na kanyi, walakiide ko Herode.

Idichia Misiri

¹³ Wekimaa-ihenda, wadi a-ichu msu o Mndumii kakulora na Yosefu kui ndodo kambia, “Kure, noire mana-chu na mae, nohende dichia kulya Misiri nokukaye-fo itane ngakuamtsa-se, nyi kifa Herode akundi iwaaha mana-chu.”

¹⁴ Nao kakure kadichiṟa mana na mae kui kio, kahenda kulya Misiri.

¹⁵ Kakaa Misiri itane Herode apfa. Nyi kundu kuhoye kilya ki-kihambe nyi Mndumii kui dumbu lya mwikimbi kehamba, “Nyi kulya Misiri njilahie-pfo mana ako!”

Wakoku wawoho

¹⁶ Kyasia Herode amewona ke amesolo nyi walaanyi walya, karihinyika mnu nyashi, kaduma kuwooho shiwana shose sha kulya Betlehemu na sha kulya mṟasenyi kuitumanyi napfo, shilya shimaiye maka iwi na shilya shiwuuye numa ya kiheri kilya etuma walaanyi walya.

¹⁷ Nalyo kilya kiwei kidede nyi dumbu lya mwikimbi Yeremia kikawehoya kehamba,

¹⁸ “Kulya Rama kuleichio ṟu ofuho sa lunene na shilio, nyi Raheli akeri ikapia wana wake shilio, ma nalaidikie iwihiṟio moo, nyi kipfa walaiho-se.”

Iwuka Misiri

¹⁹ Kyasia Herode kekipfa, msu o Mndumii kacha ikuloṟa na Yosefu kui ndodo kulya Misiri.

²⁰ Kambia, “Kureng'u, noduo mana na mae, nohende kulya Israeli, kifa walya wawekeri itengetia mana-chu walemepfa!”

²¹ Nao kakure, kaweduo mana na mae, kahenda kulya oruken lo Israeli.

²² Indi kekiwio ke Arkelao nyi ai mangi ya Yudaya, handu ha ndee Herode, kaowuo ihenda-pfo. Indi Ruwa kambawasa kui ndodo, kahenda kulya shihongonyi sha Galilaya.

²³ Kacha ilaa kulya mṟinyi fo Nasareti, kundu kuhoye kilya ki-kidede kui dumbu lya mwikimbi, ke nyi echilaho nyi Mnasarayo.