MATAYO 19 - Bibilia Kui Mdedie fo Kimochi

Ilekana lya mka na mii oke

¹ Kyasia Yesu amemaa ideda madedo halya kakure awuka kulya Galilaya kashika kulya shihongonyi sha Yuda kulya mataya ya Yordanyi.

² Na wandu wakaduana nao mamwingi fung'anyi. Nao kawachiṟa akeri kundu kulya.

³ Nalyo Wafarisayo wakacha napfo wecha mhesha wakahamba, “Nawo kisumhanyi ngesa mndu nalekane na mka oke ma kokoya nyi kipfa kya iki ma iki ngesa?”

⁴ Nao kahaluo kahamba, “Ma mlasomie ke ichu awawumbye nyi alewawumba wakawa nyi mndu msoṟo na mka?”

⁵ Kahamba, “Nkyondo kechiinenga mndu nalekane na ndee na mae na isanza na mka. Nawo wa wawi wawe nyi nyama imu.

⁶ Nahong'u walakiwe-se nyi wawi, nyi wai nyama imu. Kyasia-ng'u ikyo Ruwa alesangana amonyi ma mndu nalakiletsane.”

⁷ Wakambia, “Kikeri-ng'u kida ili Mose awawasie wandu wainengye mka paruo yemsama naho-ng'u wamsame-ng'u?”

⁸ Kawawia, “Mose nyi kipfa kya wuumu wo mrima yanu nkyondo alembikya momu folekana na waka wanu. Manya chi wudo kiwekeri kiwokia lya mbokopfo.

⁹ Kyasia na inyi ngambia, ‘Ichu molekana na mka oke kulawode nyi kipfa kya wumbafu kahenda yalika mka ungi nyi ahaluka mbafu amonyi.’”

¹⁰ Walya wa kiloshionyi wakambia, “Mbonyi tsesungusia kya msoṟo na mka kokoya na wudo tsii nahong'u kichihiyese mndu naalikepfo.”

¹¹ Kawawia, “Chi wose wechiidima iwada dedolipfo shila na iwa wa wainengye wechiliwada.

¹² Cha kipfa nyi kuwode wasoṟo wai wahumba kui ifeo nyi mawo. Kukawekaa-pfo sa wai wahumba wa wawike wuhumba nyi wandu. Kukawekaa pfo sa wakuwikye wuhumba wawenyinyi kipfa kya wumangi wo Ruwa wawuwone. Moidima ikiwada nawekiwada.”

Yesu ahekia mawoko wana watutu

¹³ Nalyo wakamendie shiwana shitutu nashihekye owoko na ishiterewya. Kyasia walya wa kiloshionyi wakawaima.

¹⁴ Yesu kawawia, “Kelekenyi shiwana shi ma mlashiime shecha na koko. Cha kipfa wandu wai wado chasho nyiwo wumangi wo ruwehu woewa wowo.”

¹⁵ Nalyo Kashihekya owoko kawuya kakure alya kahenda.

Manake umu msuṟi

¹⁶ Naho adi aichu mndu kacha na handu ai kahamba, “Maarya, nyi kiki kicha njechiwuta njiwone moo fo mlungana?”

¹⁷ Nao kambia, “Nki ili ombesa kya iki kii kicha? Ichu a mcha nyi aiho umu tupu. Indi kokunda ida alya kwenyi moo kemanya mawawaso nohahendelye.”

¹⁸ Kahamba, “Maki?” Yesu kahamba, “Nyi iha, ma kulawahe ma kulaṟuhuye ma ulakunde iṟuhuyo ma kulaiwe ma kulahambe-ho shewonya odoo owingo lo wongo.

¹⁹ Indya ndeyo na mayo, nowekunda ma odoo chando ukundi moo fopfo kumonyi.”

²⁰ Mndu ulya mleu kambia, “Kyasho na njileweshiinutsya. Aikyo njitsiheṟe nyi kiki-se-wo?”

²¹ Yesu kambia, “Kokunda uwe mndu moholotsya shose kehenda kumba shilya uwode ushiinenge wandu wakiwa naho ochiwada kisa kya shindo shifoi ipfo ruwe hu. Komeidima uche oshana na inyi.”

²² Kyasia mndu ulya mleu ameicho ado kahenda awodo nyi fowa. Nyi ili awode shichoṟe shake shifoi.

²³ Yesu kawia walya wa kiloshionyi kyake, “Nyi kya lohi ngambia, ‘Mndu msuṟi nyi alemye ishika ipfo wumanginyi wo ruwehu.’

²⁴ Na kingi-se ngambia, ‘Kyangu-ho nyi ngamia iide na ṟochenyi lya sindano kota mndu msuṟi naide na ipfo wumanginyi wo ruwehu.’”

²⁵ Kyasia walya wa kiloshionyi kyake wekiicho wado wakawuko nyi madima wakahamba, “Kokoya na wudo a nyi wu-se echiidima ikiṟo.”

²⁶ Nalyo Yesu kawaambuya kahamba, “Kindo-kyo kunu ko wandu kechiwa iwutapfo, kya indi ipfo ko Ruwa shindo shose na shechiwutika tupu.”

²⁷ Nalyo Petro kahaluo kambia, “Ambuya so nyi ludeye shindo shose lukakwituma iya numaa-pfo kyadu lochiwona-ho nyi kiki-wo?”

²⁸ Yesu kawawia, “Nyi kya lohi ngambia, ‘Nyo mui wandu weoshana na inyi ili koeshika iya mafeyonyi hewihiṟyo wuhya ilindi Mana o mndu echidamya loṟikehu lo wusuṟi woke nanyo mbedamya lorike-hu tsilya ikumi na tsiwi na idumbuo mondu ya mbaṟi tsa Israeli itsi ikumi na tsiwi.’

²⁹ Na orio mndu ose ma oku ma oku ichu adeye ma wana wamae ma washiki wake ma ndee ma mae ma wana ma mhunda ma mba kikawa nyi kipfa kya rina lyako inyi orio kindo adee naweengeṟyo shipfoi naweoṟa na moo fokaa mlungana.

³⁰ Kya indi kiwe wafoi wa wasongoru nyi wehaluka wafurumi na iwo wafurumi wawewa wasongoru.”