MATAYO 15 - Bibilia Kui Mdedie fo Kimochi

Mbonyi tsa waku

¹ Naho kulya ko Mndumii Yesu kukacha napfo Wafarisayo na walosha wa wuwawaso wawuka kulya Yerusalemu wakahamba,

² “Nyi kili wa kiloshyonyi kyafo wekeumbuya mbonyi luwadeye nyi waku? Kili welekesamba mawoko ili washika ilya mkate.”

³ Nao kawahaluo, “A kyanu nyo nyi kiili mokeumbuya iwawaso lya Ruwa kipfa kya mbonyi tsanu mu wadee tsa kacha?”

⁴ Cha kipfa Ruwa nyi awawasye kahamba, “India ndeo na mayo na moruma ndee anu mae nyi opfu napfe.”

⁵ Nanyo mukahamba kya ichu echiwia ndee ang'u mae, “Nyi kindo kehenda dasa ikyo muwechiwona koko.”

⁶ Kyake nyi mokehamba ke nalawone keindya-se nakyo ma ndee ma mae. Kikawa nyi mupfuluye iwawaso lya Ruwa kipfa kya mbonyi tsanu muwade tsa kacha.

⁷ Mui makulembetseṟe, na kicha kilya Yesaya alededa kyanu kehamba kisuku kahamba,

⁸ “Wandu wa oruka-lu nyi wekenjindya na madumbu hawo kya indi ngoo tsawo tsikahenda kuleshe na inyi.

⁹ Nyi wekenjio-lokyaolokya kya maai waipfunda njopfundo tsii mawawaso ha wandu.”

¹⁰ Nalyo kalaha wandu walya waiho mamwingi na ipfo koke kawawia, “Keadanyenyi imanya mumanye!

¹¹ Kiteṟefutsie mndu wuwicho chi iki kehenda dumbunyipfo, nyi iki kyawuka dumbunyi nkyo kindo keterefutsa mndu wuwicho!”

¹² Naho walya wa kiloshionyi wakacha na hando ai wakambia, “Na oichi ke Wafarisayo nyi wasukyo nyi idedo lyo waicho wado.”

¹³ Nao kahaluo kahamba, “Orio kindo ki kidonge kulawode nyi Wande o ruwehu akidongye na kekuṟuo.

¹⁴ Lekanenyi nawo! Nyi wasongoru wai wapfu meso waisongoya wapfu meso. Kya indi mpfu-meso kasongoya mpfu meso njia nyi wechioloka ṟungunyi wa wawi.”

¹⁵ Kyasia Petro kahaluo kambia, “Kelutambahuye-wo mbonyi-tso tsa mfanano!”

¹⁶ Nao kahamba, “Ate na nyo momanya kindo?

¹⁷ Nyi mlaichi orio kindo kyose kyaida na dumbunyi nyi kehenda ndeunyi kikahenda wiko ṟungunyi kundu kovika mando?

¹⁸ Kya indi ishi sheuka dumbunyi nyi shekecha shiuka mrimenyi nasho nyisho shewikya mndu wuwicho.

¹⁹ Cha kipfa ipfo kiidi kya mrima nyi kokedo-pfo mahio mawicho na wuwahi na mbonyi tsa iṟuhuya na tsa wulala na wuiwi na madedo ha wongo hewonya mndu owingo na shirumo.

²⁰ Nyi sho-ng'u shindo shewikya mndu wuwicho. Kya indi kolya kulasambie mawoko chikyo kyawikya mndu wuwichopfo.”

Wuidiki wo mndu mka umu

²¹ Naho Yesu kakure kulya kundu akeri kahenda kuleshe kulya shihongonyi sha Tiro na Sidon.

²² Naho adi a ulya mka o Wakananyia kacha napfo auka kulya mṟasenyi iya kakoṟoṟoma ilaha kahamba, “Kensaṟya-wo wukiwa woko hoi Mndumii ui Mana o Dawidi! Mana oko o waka aituro mnu nyi mṟufu mbicho fumbode.”

²³ Nao ma nalahaluo ma kindo ma kimu. Naho wa kiloshionyi wakacha na hando ai wakamterewa wakahamba, “Kemsame-wo nyi aifihiṟa kunu numa-du.”

²⁴ Nao kahaluo kahamba, “Njii mdume kundupfo chila na ko machondi hadekye ha mba ya Israeli.”

²⁵ Nao kacha naho kamwolokia ndenyi kahamba, “Hoi na hoi Mndumii njitarama-wo!”

²⁶ Nao kahaluo kahamba, “Chi kindo kisumuhanyi kosoka shiwana kando kokumbya makitepfo.”

²⁷ Nao kahamba, “Ee-wo Mndumii. Kya indi ma makite na hekekuliya shipeṟengu sheoloka kitaṟenyi kya wenyi-sho.”

²⁸ Nalyo Yesu kahaluo kahamba, “Ee mka kiidikyo kyapfo nawo king'anyi. Na chando uwekundi nakyo kiwekushikya kido.” Naho mana ulya oke o waka kachia kiwokia saa na iya.

Yesu achiṟa wandu wafoi

²⁹ Kyasia na Yesu kawuka kulyando akeri kahenda kungi kashika kulya mawambao ha ipalyipalyi lya Galilaya. Naho kado na kulya fumwunyi kadamia-ho.

³⁰ Na wandu wakacha na hando ai mamwingi sa fung'anyi warie wandu wai shiricheche na wai ngokoṟo na wapfu meso na wai pipi na wengi wafoi. Wakawaleṟya oo madedenyi hake. Nao kawakiṟa.

³¹ Itane wandu walya wakeri-ho mamwingi waṟihio ili wawona walya wai pipi wewuya ideda na walya watiliwanyi maungo wakachia na walya wai shiricheche wakawuya ichumia na wapfu meso wakawuya yambuo. Nawo wakaidapfuma Ruwa o Israeli.

Yesu aihutsa wandu shiku shiina

³² Kyasia Yesu kalaha wa kiloshionyi kyake na ipfo koke kahamba, “Ngasaṟa wukiwa wo mamwingi fo wandu-wa kyamba wamtsinda kunu koko mfiri iṟaṟu ma walawona kindo kelya. Na isama njikundi wasama walasusuopfo. Nyi wewona wearisikya njienyi.”

³³ Na walya wa kiloshionyi wakambia, “A nku lochiwuta kando kafoi kadi kunu nuka wandu-wa wafoi wadi watane waihuda wose?”

³⁴ Na Yesu kawawia, “Nyi mkate inga muwode?” Nawo wakahamba, “Nyi mfungade na shikunga shitutu.”

³⁵ Nalyo kawawasa mamwingi fulya fo wandu wadamie wanda.

³⁶ Kaira mkate iya mfungade na shikunga shilya. Kaana Ruwa. Kafunja-funja kainengya walya wa kiloshionyi. Na wa kiloshionyi wakainengya mamwingi fulya fo wandu.

³⁷ Wakalya wakadung'ana wose wakaihuda. Na mtsuhaṟo fulya-fo shipeṟengu shilya wakadoduo. Shikunja mfungade shikaichuo.

³⁸ Kya indi walya welya-ho nyi wasoṟo washikye shiku shiina, kouta wana na waka.

³⁹ Naho kasama mamwingi fulya fo wandu. Kadoya kulya ngalawenyi. Kashika kulya mambatsana na kulya Magadanyi.