MATAYO 14 - Bibilia Kui Mdedie fo Kimochi

¹ Kyasia mandi halya kuwepfo mangi tsa oruka tsiina, ulya umu-ho nyi Herode. Eleicho mbonyi tsa Yesu tseehambo wandunyi.

² Kawia wasoṟo walya wake, “Ichu nyio Yohane Mpatisi. Nyi aleṟuka awuka ko wapfu wai! Nkyo kyainenga pfinya tsing'anyi tsikawoneka ipfo koke.”

³ Nyi kipfa Herode amewada Yohane kampfunga kamshingya mba ya wapfungo kipfa kya Herodia ai mka o manomae Filipo.

⁴ Kipfa lyandi Yohane alewa mombia, “Kikusumuhanye imduofo.”

⁵ Nao kakunda imbaha, kawuya yowuo wandu kipfa lyaindi waichi nyi ai mwikimbi.

⁶ Kyasia komeshika mfiri fokumbuo alya mafeonyi ha Herode, naho mana o Herodia o waka kahomia makidi hawi ha wandu. Katana achihiṟa mnu Herode.

⁷ Nakyo kikamnenga kambia ke nyi echimnenga kindo amekuterewya kelia-ho nyamu.

⁸ Nao kahenda kuloshyo nyi mae kahamba, “Ngaterewa ukunnengye mdo fo Yohane Mpatisi na ipalu!”

⁹ Na mangi kawado nyi fowa, kya indi nyi kipfa kya nyamu tsilya na wandu wadamye nao kimu kilionyi kya choonga nkyo kyamnenga kawawasa nainengo.

¹⁰ Naho kaduma mndu kahenda idumbuo Yohane mdo kulya kipfungyonyi.

¹¹ Naho mdo foke fukaendo naho furio nyi ipalu. Fukainengyo mana ulya. Nao kahenda fudaya mae.

¹² Na walya wa kiloshyonyi kyake wakacha ira mnying'a fulya, wakafuṟika. Wakahenda wakaongoya Yesu mbonyi tsilya.

Yesu aihutsa wandu shiku shitanu

¹³ Yesu kaicho kakure pfo kahenda airo nyi ngalawa kahenda ikaa olele kuleshe na wandu. Wandu wakammanya wakambingya wechumia wawuka mṟinyi iya.

¹⁴ Kawuka-se kundu avei kawona mamwingi fulya kawaichyo wukiwa kachira wanyonge wawo.

¹⁵ Kyasia komshika iila walya wa kiloshyonyi wakacha na handu ai wakahamba, “Kundu ku nyi nuka na kiheri kyameidya Kesama-ng'u mamingi fu fo wandu, wahende kulya mamṟinyi wakuhuṟye-pfo shelya!”

¹⁶ Nao Yesu kawawia, “Wahende wada? Kewainenge shelya nyo muwenyi.”

¹⁷ Nawo wakambia, “Luwode kindo iyapfo chila na mkate itanu, na makunga hawi.”

¹⁸ Nao kahamba, “Njiendye-nyi na iya handu njii!”

¹⁹ Naho kawawasa wandu walya mamwingi wadamye alya maṟenyi. Kaira mkate iya itanu na makunga hawi. Kaambuya ruwehu kaidapfuma Ruwa. Kaifunja shifunjo kainengya walya wa kiloshyonyi mkate iya, Walya wa kiloshyonyi wakainengya wandu.

²⁰ Wakalya handu hamu wose wakaihuda. Wakasanya mtsuhaṟo fo shipeṟengu shilya wakaichuṟa shikunja ikumi na shiwi shiichuo pacha.

²¹ Na walya walelya wawefoi cha kufui na womi tupu shiku shitanu kulaipfo waka ma wana.

Yesu achumia huya mṟinga

²² Naho kaitikya walya wa kiloshyon waide na alya ngalawenyi wahende ambadya kya kulya wamsongoe natane asama wandu walya mamwingi.

²³ Nao amidima isama wandu walya mamwingi kado na kulya fumwuhu kui kuleshe na wandu nyi kundu naterewe. Kyasia komshika iila kakaapfo amonyi.

²⁴ Na ngalawa iya ishikye kulya makidi hawi ha ipalyipalyi ihataṟo mnu nyi masinanu kipfa lyaindi otanu luwasumuhanye oshangunyi.

²⁵ Kyasia kuipfo iringa lya kamba lya kaana lya kio lyamshika nalyo kacha na kundu wai kechumia huya-ipalyipalyi.

²⁶ Wamembona kechumia huya-ipalyipalyi wakaangalala wakahamba, “Nyi kiṟishe!” Wakafihiṟa kipfa kya wowu wulya.

²⁷ Wadi Yesu kadeda nawo kahamba, “Kewuyonyi moo nyio inyi ma mlaowuo!”

²⁸ Kyasia Petro kamhaluo kahamba, “Hoi Mndumii, kokoya nyi iyo kewawasa njiche na handu ui njiide kulya mṟingenyi!”

²⁹ Nao kahamba, “Kucheye!” Na Petro kasoka kulya ngalawehu kachumia huyamṟinga kacha na handu Yesu ai.

³⁰ Ili kewona otanu lulya kawuya yowuo kawoka isoṟowya mṟingenyi kafihira kahamba, “Hoi Mndumii kenletsa-wo!”

³¹ Nalyo liyenyi Yesu kahoṟuo owoko kambada kambia, “Ui mndu moidikya kitutu tupu! Nyi ki ili owuya iwado nyi mkeukeu?”

³² Kyasia wamdoya alya ngalawehu, naho otanu lukatsia.

³³ Kyasia walya wa kulya ngalawenyi wakamolokya wanda wakahamba, “Na lohi na ukeri Mana o Ruwa!”

Yesu achiṟa wandu Genesareti

³⁴ Naho wakaambadya kya kulya ora lo kawi wakaduo ngalawa mbarinyi ya oruka kulya Genesareti.

³⁵ Kyasia na wasoṟo wa kundu kulya wamidima imanya wakaduma wasu kulya orukenyi kundu kutengye kose. Wakamendye wandu waiwawyo wose.

³⁶ Na iterewa wakawa nyi imterewaterewa wapaye ma mambo tsa nguwo yake. Na walya wepaya wakawechia wose.