MATAYO 13 - Bibilia Kui Mdedie fo Kimochi

¹ Kyasia mfiri fukeri na fulya Yesu kawuka ipfo mba, kahenda damya alya hambehu lya ipalyipalyi.

² Naho wandu wakacha kuwumbya nao mamwingi sa funanyi Katana adoya alya ngalawehu kadamya-ho. Na mamwingi fulya fo wandu fuhoṟoki kulya hambehu.

³ Nao kadeda nawo mbonyi tsifoi tsikeri tsa mfanano kahamba, “Ambuya mndu mbaai alehenda waya mbeu.

⁴ Na ili kewaya tsilya maata tsikaoloka oo mbai ya njia Na shilehe shikacha shikatsimaa-ho.

⁵ Tsingi tsikaoloka hando hawode maho naho tsilawone-ho teri imoṟi. Natso kudi tsikakambiṟa ido owinyi kifa lya tsilawode teri ifo wanda.

⁶ Mnengeṟi fomedo tsikahya mu, natso kyamba tsilasotsye mri tsikauma.

⁷ Kya indi tsingi tsikaoloka kiidi kya msha. Na msha iya ikado ikatsipfumba.

⁸ Kya indi tsingi tsikaoloka ifo terinyi njicha. Tsikakumbya kilimu. Iya imu ikakumbaya ihana, iya ingi makumi haṟandaṟu, na iya ingi nyi makumi haṟaṟu.

⁹ Ichu awode madu headanya naweadanya!”

Kiinengo kya mfanano

¹⁰ Walya wa kiloshyonyi kyake wakacha na hando ai wakambia, “Nyi kili odeda nawo kui mbonyi tsa mfanano?”

¹¹ Nao kawavia, “Wandu wa wainengye imanya mbonyi tsa wumangi wo ruvehu tsii njiṟike nyiwo nyo, kya indi walya wa wanengyepfo.

¹² Kipfa ichu awode nyi echinengo na yengeṟa kaveengeṟyo-engeṟyo. Kya indi ichu alawode na shilya awode echisoko da.

¹³ Nkyondo ngadedya nawo ku mbonyi tsa mfanano, kyamba nyi wechiambuya na meso walechiwona, nyi vechileshya-ho na madu walechiicho ma itawuka.

¹⁴ Nyi kundu kuhoye ipfo kowo kisuku kilya Yesaya ahambye kehamba, ‘Kya iicho mochiicho, mlemanya ma kindo, na yambuo mochiambuo mlewona ma kindo.

¹⁵ Nyi ili mrima ya wandu wa oruka-lu ii mumiṟe. Na madu hawo hakawa nyi malemeri yadanya Na meso hawo nyi watsingiṟi. Nawo kundo walewona na meso ma iicho na madu, ma imanya kindo na mrima wawone wewuya na numa, na inyi njiche iwakiṟa.’

¹⁶ Kya indi sia na yanu nyo meso hanu, kyamba nyi haiwona ishi mokewona na madu hanu hakaicho ishi mokeicho.

¹⁷ Na kya lohi ngambia, ‘Kuwepfo waikimbi wafoi na wandu wa wusumuhanyi wailanga iwona ishi mokewona, nawo na ma walawone, na iicho ishi mokeicho, nawo ma walaicho.’”

Mdambuye fo mfanano fo mkumbi o mbeu

¹⁸ “Keadanyenyi ng'u nyo mbonyitsi tsa mfanano tsa mndu mbaai o mbeu.

¹⁹ Orio mndu ose ili ekeicho dedo-lyo lya mbonyi tsa wumangi nalamanye, nyi ichu mbicho acha napfo karakuo-ho kilya kii kiwaaye ipfo mrimenyi koke Nyio ichu ambaye oo mbarinyi ya njia.

²⁰ Na ichu ambaaye handu hawode maho nyio ichu echiadanya dedo lilya naho kakambiṟa iliidikya na sia.

²¹ Kya indi alawode mri asotsye ipfo kiidi kyake, nyi akeri nyi mokaa-ho oweṟe. Indi kambona kuiho wukiwa na iterengyo kipfa kya idedo-lyo nahonu kakambiṟa isukyo owinyi.

²² Na ichu a mbaaye kiidi kya msha nyio ichu echiadanya idedo-lyo. Kukakaa-pfo mawina ha kunu orukenyi na wulembi wolembo nyi masaa shikapfumba idedo-lyo lilakikumbye-se kilimu.

²³ Kya indi ichu a-mbaaye ipfo terinyi njicha nyio ichu echiadanya idedo-lyo na ilimanya naho kahenda ikumbya kilimu. Ichu umu kawika ihana, na ichu ungi makumi haṟandaṟu, na ichu ungi makumi haṟaṟu.”

Mfanano fo mambuṟo

²⁴ Kawuya kawaloṟa mbonyi tsingi tsa mfanano kahamba, “Wumangi wo ruwehu nyi wufananyi na mndu alekumba mbeu njicha ipfo demehu lyake.

²⁵ Ili wandu walee mado kukacha napfo mkituwa oke, kaengeṟa ikumbapfo mbeu tsa mambuṟo ipfo kiidi kya mbeke tsilya. Kakuhendya.

²⁶ Kyasia mbeke tsamedo na ikumbya mahaa naho mamburo hakawewoneka.

²⁷ Kyasia masinga ha menyi kanyi akacha naho hakambia, ‘Akashika-wo Mndumii, chi ulewekumba mbeu njicha kulya demehu lyafo. A nyiku-se lyawada-se mamburo?’

²⁸ Nao kawawia, ‘Nyi mndu mkituwa aletana ado.’ Masinga halya hakambia, ‘Ngesa nyi ukundi luhende luhakuṟuo?’

²⁹ Nao kahamba, ‘Ote,’ ili muikuṟuo mambuṟo-ho nyi mochiwona mokuṟuo na mbeke tso mutsisanze naho.

³⁰ Kelekenyi shing'anyishane shi shiwi shishike iya mawehyenyi Komshika iya masanyonyi na inyi njiwie walya wesana, ‘Kesongwonyi isanya mambuṟo-ho muhafunge na shikonde kundu mochihakoṟa, kya indi mbeketso muhende itsisanya ipfo kikumbinyi kyako.’”

Mfanano fo mbeu ya haradali

³¹ Kawuya kawaloṟa mbonyi tsa mfanano tsingi kahamba, “Wumangi wo ruwehu nyi wufananyi na mbeu ya haradali iwekeri-fo. Mndu kaiduo kaiwaya kulya demehu lyake.

³² Nayo ii njitutu ikaida mbeu tsingi tsose. Kya indi kombona yamedo ikang'ana ikaida huye ya shindo shii shiwaye kulya demehu shose isho shitutu-tutu. Ikawa mdi fung'anyi. Na shilehe sha ruwehu shikatana shacha shikalaa marambenyi hayo.”

Mfanano fo mdi fo shimbiṟa mso

³³ Kawuya kawaongoya mbonyi tsa mfanano tsingi, “Wumangi wo ruwehu nyi wufananyi na mdi foshimbiṟa mso. Mka kafuduo kafusanganya msonyi ipongo kaṟaṟu. Fukatana fotarang'a fose piu.”

Ihamba kui mfanano

³⁴ Mbonyi-tsi Yesu alededa ku mfanano tsose. Ma naladede nawo ma kindo kulawode nyi mbonyi tsa mfanano.

³⁵ Nyi kundu kuinukye kilya ki kidede nyi mwikimbi Yesaya kehamba, “Njechitambaṟuo dumbu lyako kui mbonyi tsa mfanano, njechyedya shilya shiwei shirike kiwokia oruka lombiko.”

Yesu adambuo mfanano fo mambuṟo

³⁶ Nalyo Yesu kasama wandu walya wakeri-pfo mamwingi. Kahenda ipfo mba koke. Walya wa kiloshyonyi kyake wakacha na handu ai wakahamba, “Kelutambahaluye-wo mbonyi tso tsa mfanano tsa mambuṟo ha alya demehu!”

³⁷ Nao kahaluo kahamba, “Ichu mowaya mbeu njicha nyi Manomndu.

³⁸ Na dema nyi wuyana-wu. Na mambuṟo-ho nyi wana wa ichu mbicho.

³⁹ Na mkituwa aletsiwaya nyi Satana. Na ili masanyonyi nyi iya masiyonyi ha wuyana. Na iwo wesana nyi wasu wa Ruwa.

⁴⁰ Nahong'u chando mambuṟo hekesanyo na ihenda ikoṟo na modo na ili kochishika iya masiyonyi ha wuyana kiwe nyi wudong'u.

⁴¹ Manomndu nadume wasu wake ipfo wumanginyi woke wasanye mando haendye wusutsu hose na iwo wawutye sha mkika wawewasanya.

⁴² Wahende iwakumba kulya nungunyi ya modo Napfo kukae-pfo nyi ifihiṟa na imadya ngamru.

⁴³ Walya wa wusumuhanyi wawewaa ngeela cha mnengeṟi ipfo wumanginyi wo Nde-awo. Ichu awode madu naveadanya.”

Mfanano fo kisa kii kiṟike

⁴⁴ “Wumangi wo ruwehu nyi wufananyi na kisa kya shindo sha wuitoṟi kiwei kiṟike wanda demenyi Mndu kakiwona kahenda kakiṟika. Nao lyandi awodo nyi sia kahenda kumba shilya awode shose piu, kacha ihuṟa dema lilya.”

Mfanano fo Lulu

⁴⁵ “Kingi-se wumangi wo ruwehu nyi wufananyi na mndu mokapa mbucha echipfula lulu njicha.

⁴⁶ Kyasia amewona lulu imu iwode mnu wuhuru wung'anyi, kahenda, kakumba shilya awode shose, kacha kaihuṟa.”

Mfanano fo mdeho fo makunga

⁴⁷ “Kingi-se wumangi wo ruwehu nyi wufananyi na kindo kyedeha makunga kyeolotso alya ipalyipalyinyi kikadeha orio mbaṟi yose.

⁴⁸ Kyameichuo wakakikuruya hambehu. Wakadamya-ho. Halya mecha wakahawiluya ipfo matelenyi. Na halya mawicho wakahakumba kuleshe.

⁴⁹ Ili koshika masiyo ha wuyana na wudong'u Nyi wasu wa Ruwa wechicha wahende waweletsana iwo wawicho na iwo wa wusumhanyi.

⁵⁰ Iwo wawicho wawehenda ikumba kulya nungunyi ya modo. Napfo kukae-pfo ifuha na imadya ngamru.”

Kisa kya kacha na kihya

⁵¹ Yesu kawawesa, “Ngesa nawo mowemanya mbonyi-tso tsose?” Wakambia, “Ee!”

⁵² Nao kawawia, “Kyasiang'u orio mlosha o mawawaso ose ichu a mloshe kya wumangi wo ruwehu nyi afananyi na mndu menyi kanyi awode kisa kyake aṟikye kawa moende-ho shindo shihya na sha kacha.”

Yesu aleho Nasareti

⁵³ Naho kikashika Yesu amidima ilosha mbonyi tsilya tsa mfanano tsose kakure kulya-ndo akeri.

⁵⁴ Kacha na kulya mṟinyi kundu awukye. Kawaloshia kulya mba kundo wekumbuhananyia. Wakatana wawa mkahai. Wakahamba, “A mndu-chu kundu awutye wurango-wu na mawuto-ho ha finya nku?

⁵⁵ Ichu chi mana o ichu mopacha shidi? Na Mae chi ewio nyi Maria na wanawamae chi Yakobo na Yosefu na Simon na Yuda?

⁵⁶ Na washiki wake chi hondo wakeri wose kunu kodu? Alae mbonyi tso nku tsimbukya ngesa?”

⁵⁷ Wakasukyo nyio. Na Yesu kawawia, “Nyi kipfa kuwode kundu mwikimbi amenekye-menekyepfo kulawode na kulya mṟinyi kundu awukye na kulya kanyi koke.”

⁵⁸ Nao ma alawute mawuto ha pfinya hafoi kulya kipfa lyaindi walaidikye.