MATAYO 11 - Bibilia Kui Mdedie fo Kimochi

¹ Naho kikashika Yesu amidima iwawasa walya wa kiloshyonyi kyake ikumi na wawi, nao kakure kulya kundo akeri kahenda losha na yonguo kulya mamṟinyi hawo.

² Kyasia Yohane nyi kulya kipfungonyi avekeri kaicho mawuto ha Kristo, kamdumya wa kiloshyo kyake kambia,

³ “Nyio iyo ichu a mhambe nekaa nache ang'u luwedye ungi?”

⁴ Yesu kahaluo kawawia, “Hendenyi mushitsye Yohane mbonyi tso moicho na iwona.

⁵ Wapfu meso a-iwang'u waiwona, na shiricheche aiwa waihenda. Na waluo saka waiheremka, wapfu madu a iwa waicho, na wapfu nyi waṟuka, na wakiwa a iwa waiongoyo mbonyi tsa sia.

⁶ Nanga ulya alesukyo nyi inyi.”

⁷ Kyasia walya wa kiloshyonyi kya Yohane wahenda Yesu kawoka iwia wandu walya mamwingi mbonyi tsa Yohane kahamba, “A nyi kiki mulehenda ambuya kulya nuka? Ngesa nyi iṟeṟe lisingitso-singitso nyi otanu?

⁸ A nyi kiki mlehenda ambuyawo? Ngesa nyi mndu aṟee nguwo tsa kimamile? Walya waṟee nguwo tsa kimamile a walya wai mbenyi tsa wamangi.

⁹ A kilawe nyi kiki kilemnenga ihenda-pfo? Nyi kundu mochiwona mwikimbi ngesa? Ee ngambia na kota mwikimbi.

¹⁰ Kifa nyio amṟehye kehamba kyake, ‘Ambuya na njekaa njidume msu oko mosonguo oshangu lopfo nao nakweke achikya njia yapfo ipfo mbele yapfo.’

¹¹ Na kya lohi ngambia, ‘Kiidi kya iwa wa wafee nyi mka kulemekure mndu ang'anyiye Yohane Mpatisipfo. Indi ichu a mtutu o wose ipfo wumangi wo Ruwa nyi ang'anyi kota o.

¹² Kiwokia mafiri halya ha Yohane Mpatisi koshika wulalu wumangi wo ruvehu nyi wokewado na pfinya, na waafinya nyiwo wewurakwo-ho.

¹³ Kipfa waikimbi wose nyi walehamba shisuku na wuwawaso, nawo wakashika Yohane.

¹⁴ Na kokoya nyi mochikunda iidikya, o nyiong'u Elia ichu a mhambe nache.

¹⁵ Mndu awode madu headanya naweadanya.’

¹⁶ ‘A nyi mfanano fo iki njewika mbaṟi i ya wandu?’ Nyi wafanana na shiwana shidamye tumo shechilaha wodoyawo shikahamba,

¹⁷ ‘A ili lowemkapya mtoṟiṟo, nanyo ma mlashine. Nyi lomekapa shilio, nanyo ma mlafuhe?’

¹⁸ Nyi kulecha napfo Yohane mpatisi, ai mndu alelya, ma inyo, nawo wakahamba, ‘Nyi awodo nji mṟufu mbicho.’

¹⁹ Kukakaa kukacha napfo Mano-mndu, ai mndu echilya, na inyo, nawo wakahamba, ‘A ichu ai makilya na makinyo mvinyo, nyi mbuya ya wesana okamba na wenyamaṟa.’ Na wuṟango wo Ruwa wukaṟingishyo ilyi wuiṟunda.”

Mṟi ilaidikie

²⁰ Nalyo Yesu kawooka dedya mamṟi halya kundo kuwutikye shilya shake awutye sha kiṟiha shifoi kipfa lyandi walaledumbuya kahamba,

²¹ “Ochia lopfo iyo Korasinyi ochia lopfo iyo Betisaida! Nokoe nyi kulya Tiro na Sidon kulewutika shindo sha kiṟiha cha isho shiwutikye kunu kiidi kyanu nawo nyi wawechidumbuya wunyamaṟi wowo lya kacha wakuṟaaye na shisaṟa sha wukiwa na ifu iloṟa idumbuya.

²² Kya indi nyi ngambia, kilya kya Tiro na Sidon nyi kyechianguo ili mfiri fo mondu kota kyanu.

²³ Na iyo Kapernaumu, chi kuwemdosye kokoya ruvehu? Nyi ochikaa noolotso ushike Gehena. Kipfa kulya Sodoma nokoye nyi kulewutika-ho shindo sha kiṟiha cha isho shiwutikye kidi kyapfo, na mṟi fulya nokoe fuledeo-pfo fushike mfiri fo inu.

²⁴ Nahonu ngamuwia, Kilya kya Sodoma nyi kyechianguo ili mfiri fo mondu kota kyapfo iyo.”

Njonyi musie moo

²⁵ Kyasia mandi na halya Yesu kahaluo kahamba, “Ngakuana, hoi Wande, kui mnene o ruwehu na oruka, kipfa ili mbonyi tsi utsiṟikye iwo waṟango na iwo waamtsu kowuya idambuya shikoku.

²⁶ Na wudo kikeri-wo, hoi Wande, nyi kipfa kiwekuchihie kihende kido.

²⁷ Shindo shose njiledambikyo nyi Wande. Ma kuipfo aichi Manapfo chila na Wande, ma kuipfo aichi Wandepfo chila na Mana na ichu Mana echikunda imdambuya.

²⁸ Kekucheenyi na koko nyo, mukeri iwina muwei walemye nyi maṟio malemeri; na inyi njimuwihiṟye moo.

²⁹ Kekudikenyi ngada njioke nyi inyi muche kuloshyo nyi inyi! Kyamba inyi nyi mhoo njikeri na mokunyinyiṟa kui mrima. Naho mochiwona koonyonya ko mrima yanu.

³⁰ Nyi ili ngada njioke nyi inyi nyi nyioloṟu na iṟio lyako likaanguo.”