MATAYO 10 - Bibilia Kui Mdedie fo Kimochi

¹ Naho kalaha wa kiloshiyonyi walya ikumi na wawi kawainengya pfinya yeng'anya mrufu mbicho kundu wechiifuna na ikiṟa ndaṟe tsose na wunyonge wose.

² Na wasu walya marina hawo nyiho iha, o kuwoka nyi Simon ewio nyi Petro na Andrea manomae, na Yakobo ai mana o Sebedayo, na Yohane ai manomae.

³ Filipo na Bartolomayo, Toma na Matayo ichu awei msanyi o okamba, Yakobo ai mana o Alifayo na Lebayo,

⁴ Simon o kulya ya Kana na Yuda Iskariote nyio ichu alemṟingya.

Yesu aduma wasu ikumi na wawi

⁵ Iwa ikumi na wawi nyiwo Yesu alewaduma kawawawasa kahamba, “Manya mlahende ko wandu wa mbaṟi njihenu, ma mṟinyi ko Wasamaria mlaide napfo.

⁶ Indi mwengeṟe ihendya machondi hadekye ha mba ya Israeli.

⁷ Kya indi ili muihenda keongwonyi muhambe, ‘Dumbuyenyi kyamba wumangi wo ruwehu womeafukya kufui!’

⁸ Kiṟenyi iwo waluo, ṟutsenyi iwo wapfu, heṟemtsenyi iwo wawodo nyi iwawe, funenyi mṟufu mbicho. Nyi mleambya kya wulya, keveinengyenyi kya wulya.

⁹ Ma mlakuwonye sahabu na shilingi ma pesa sheṟika ipfo kikuchunyi kya ngowa mukupfungye natso.

¹⁰ Ma kichoṟe kya kyaṟo ma kanzu tsiwi ma shadu ma kidi kechumia. Kipfa moṟunda nyi asumuhanye na shelya shake.

¹¹ Kya indi mṟinyi ko wandu wafoi kundu momeida napfo mṟinyi ko wandu watutu ketumenyipfo mndu akeri-ho asumuhanyi Napfondo mochikukaya mtane mokure muhende kungi.

¹² Indi mukaanga mba ya mndu keiṟikiṟenyi!

¹³ Na mba-yo kokoya nyi isumuhanyi na ofoṟo lonu luisoke huye yayo. Kya indi ikada ilasumuhana na ofoṟo lo luwembuuya nyo.

¹⁴ Na mndu alamondwo na kanyi koke alaadanye ma madedo hanu, nanyo mkashika wuka kulya mba ang'u mṟinyi kekutekutenyi madende kiluli-kyo kiwuke-pfo.

¹⁵ Na kya lohi ngambia, kilya kya oruka lo Sodoma na Gomora nyi kyechyiangwo ili mfiri fo mondu kota kya mṟifo.”

Matuuro na mawukiwa

¹⁶ “Ambuyenyi inyi njiimduma cha machondi hai kiidi kya makite ha ngeṟenyi Kyasia-ng'u kekaenyiho mui na wuṟango cha njoka mlai na mtambo mui cha mbeta.

¹⁷ Kya indi kuṟisenyi na wandu Kipfa nyi wechihenda mduo kulya mba wededya shama shawo na kulya sinagogenyi tsawo wawemkapa na ngowa-tso tsii njitochye msha.

¹⁸ Na oshangunyi lo wachili na wamangi muwedao kipfa kyako, kiwe nyi kya kiṟingishyo kyawo na wa mbaṟi njihenu.

¹⁹ Indi mkamkoya wehenda mdambika wado, nanyo ma mlawado nyi makusaṟo chando mochideda-ho ke nyi wuda anu ke nyiki, cha kifa saa iya nyi mochinengyo ishi shehamba-ho.

²⁰ Nyi ili wededa-ho chi nyofo, nyi Mumuyo o Ndeyanu ededa ai nanyo.

²¹ Kya indi kukae manomae o wandu nadambike manomae kya opfu na ndee o mndu nawedambika mana, na wana wa wandu waamkye iwo wawafeye na ihenda iwashihiya ofu!

²² Nanyo muwe nyi mochisukya wandu wose kipfa kya rina lyako. Kya indi ichu mokarishya-ho kaweda kushike ili masiyonyi echikiṟo.

²³ Kya indi mkamkoya wemterengya kunu mṟinyi ifu kedichyenyi fulya fungi. Kifa nyi kya lohi ngambia ma mochimaa mamṟi ha Israeli Manomndu alachapfo.

²⁴ Molosho neida moloshapfo, ma isinga lyekaa huye ya Mndumii olyopfo.

²⁵ Nyi kyashika molosho ili awa cha mlosha oke, na isinga ili lyawa cha mndumii olyo. Wamtana wamlaha menyi nyi Belsebuli, a wana wa kanyi koke kyawo chi kya wuera?”

Wawaṟi iowoyo

²⁶ “Kyasiang'u manya mulawone mochiwaowuo. Kipfa kwipfo kindo kii kipfinyike kide kilapfunuka numapfo, ma kindo kii kiṟike kide kilapfunuka numapfo, ma kindo kii kirike kide kilamanyikapfo.

²⁷ Iki ngambia meemenyi kekihambenyi senyi na kindo moicho mowewedyo madunyi kekyongwonyi na pata.

²⁸ Nanyo ma mlaowuo walya wewaha mbihu kya indi mrima-fo walaidime ifuwaha. Keengeṟenyi yowuo ichu moidima idetsa na mrima na mbihu handu hamu ii iwi idekye kulya Gehena.

²⁹ A njoṟiwu tsiwi chi tsekekumbo senti imu? Natso ma imu-ho yemanya iho wanda kulawode Ndeyanu akundipfo.

³⁰ Ma njui tsa kunu mdonyi konu na tsiwenjiitale tsose.

³¹ Kyasia-ng'u ma mlaowuo, na nyo chi mung'anyi kota njoṟiwu ma tsikafo chi muweng'anyi nyo?”

Iṟingishia na Ikana

³² “Nahonu orio mndu ose ichu echinjihamba oshangunyi lo wandu, na inyi mbemhamba oshangunyi lo Wande o ipfo ruvehu.

³³ Kya indi orio mndu ose ichu echinjikana oshangunyi lo wandu, na inyi mbemkana oshangungi lo Wande o ipfo ruwehu.”

Mlusano

³⁴ “Ma mlawone mochihamba kindo njicheye iwika kunu masangenyi nyi ofoṟo. Chi ofoṟo njicheye yende napfopfo, nyi oshu.

³⁵ Nyi njicheye njiletsane mndu na ndee, na mana o waka na mae, na mali o mana na mamii oke.

³⁶ Na wakituwa wa mndu kiwe nyiwo wana wa kanyi koke.

³⁷ Ulya akundi ndee ang'u mae kawakunda kota inyi, nanjiwaṟi-pfo. Na ulya akundi mana o womi anu o waka kawakunda kota inyi nanjiwaṟipfo.

³⁸ Na mndu ada alakudika msalaba foke na icha oshana na inyi kunu numaako nanjiwaṟipfo.

³⁹ Na mndu mowona moo foke nyi echiwuya ifudetsa; na mndu modetsa moo foke kikawa nyi kipfa kyako inyi nyi echiwuya ifuwona.”

Wueri

⁴⁰ “Mndu echimuambya ipfo kanyi koke nyi inyi anjiambya. Na monjijambya inyi nyi aambya ichu anjidumye.

⁴¹ Mndu echiambya mwikimbi kikawa nyi kya rina lya mwikimbi, nyi echiwona kya woṟunda wo waikimbi. Na ichu echiambya mndu o wusumuhanyi, kikawa nyi kya rina lya mndu o wusumuhanyi nyi ewona kya woṟunda wo mndu o wusumuhanyi.

⁴² Na ichu echirutsa iwa watutu ya wose ma umu-ho kamrutsa na mṟinga mcheleri na kirahu kimu, kikawa nyi kya rina lya mndu o kiloshyonyi na kya lohi ngambia mndu-cho kyake kya woṟunda ma kyekaa kidekesepfo.”