MARIKO 9 - Bibilia Kui Mdedie fo Kimochi

¹ Yesu kaengera iwawia, “Nyi kya lohi ngambia, wandu wa wahoṟoki iya kukeri-ho maata-ho wekaa walasaha opfu, na watane wawona wumangi wo Ruwa wochicha na pfinya.”

Yesu ailachika fana

² Kyasia komida-ho mfiri iṟandaṟu, nao Yesu kaduo-ho Petro na Yakobo na Yohane kahenda nawo wawenyi kado kundu ko fumvu-hu li ileshe handu ha kisekenyi. Waipfo wechimwambuya, Yesu kailachika fana wawonyi,

³ nguwo tsake tsikaila weṟu, kota chando mndu mosanja nguwo o iya orukenyi eketsiilisha.

⁴ Na Elia na Mose wakakuloṟa nawo, wechideda na Yesu.

⁵ Kyasia Petro kawia Yesu, “Mlosha, iya nyi handu haluchihie ikaa-ho. Nanga luwike-ho matengo haṟaṟu limu lyafo, na limu lya Mose na limu lya Elia.”

⁶ O na wodoye waleowuo mnu alamanye ma kindo aihamba.

⁷ Kyasia ipuchi lilya likacha lyikawashikia, ṟu likacha alya kiidi kya ipuchi lyehamba, “Ichu nyi ai Mana oko mkunde, kemwadanyenyi!”

⁸ Naho peṟeseng'u wa kiloshionyi wekiambuya-se, walakiwone-se ma mndu shila na Yesu amonyi nawo.

⁹ Kyasia ili wesoka kulya fumvuhu, Yesu kawawawasa, walaongoye ma mndu shilya waleshiwona, na mtano Manomndu aṟuka awuka wapfunyi.

¹⁰ Nahong'u wakaiṟicha iwawaso-lyo indi wakawa wechiwesana wo wenyi na wenyi, kilya kya iṟuka wapfunyi nyi kiki?

¹¹ Wakawesa Yesu, “Nyiki ili Wafarisayo na walosha wa wuwawaso wahamba, ke Elia kimsumhanyi nasonguo icha?”

¹² Nao kawahaluo, “Ee-da, Elia na echisonguo icha, naachikie shindo shose. Na kya Manomndu nyi wuda ki kiṟehye kyake ipfo Shitapunyi Shiele ke Mana o Mndu nechiliso wukiwa wufoi na iilo?

¹³ Kyaindi ngambia, ke Elia alemcha, nawo wakambutya shose, chando walekunda, chando ki kiṟehye kyake.”

Yesu achiṟa mana awodo nyi mṟufu

¹⁴ Naho wekicha na ko wa kiloshyonyi kyake walya wengi. Wakawona-ho kituṟu king'anyi kya wandu kiiho. Na walosha wa wuwawaso, wechiwesana nawo.

¹⁵ Nalyo lienyi kituṟu kilya kya wandu wekimbona, wose wakawuko nyi madima wakambingya wakamiṟikiṟa.

¹⁶ Yesu kawawesa, “Kindo muiwesana nawo nyi kiki?”

¹⁷ Umu-ho o kituṟu kilya kya wandu kahaluo, “Mlosha, ngaende manoko o womi na kopfo, awodo nyi mṟufu aladeda.

¹⁸ Na kiheri amembada, kamduka na imwolotsa wanda, naidosa mawuruwuru kalya mkongoṟo kaoṟomoka. Ngaterewa wa kiloshyonyi kyapfo wafune mṟufu fo walaidime.”

¹⁹ Yesu kawahaluo kahamba, “Nyo Mui mbaṟi ya wandu ilawode idikya, Njikae nanyo njishike indii? A njimpfirilie njishike indii? Mwendenyi na iya hando njikeri.”

²⁰ Wakamendye na koke. Mṟufu-fo fokiwona Yesu fukasingitsa mana ulya, kaho wanda kakuhalihatsa, kechidosa mawuruwuru. Nao Yesu kawesa ndeye,

²¹ “Kiheri kida amboke ado?” Ndeye kahamba, “Wokya ututu woke.

²² Na kafoi mṟufufo fokemkumba modonyi na mṟingenyi, kundu namrumatse; Kyaindi koka kochiidima kindo kelutarame kochilusaṟya.”

²³ Yesu kambia, “Ke wai, koka kochiidima! Shose shedimika ko ulya aidikie.”

²⁴ Adi ndee o mana ulya kafihiṟa naṟu lying'anyi kahamba, “Ngaidikia! Kenjitarama iidika lyako lilitutu.”

²⁵ Yesu kekiwona, ke kituṟu kya wandu kechikuwumbia ho, katoloma mṟufu ulya o ngafu kambia, “Aiyo mṟufu utewie mana-chu alaidima deda; ma iicho inyi ngakuwawasa. Wuka mana-chu, ma ulawuye-se na koke.”

²⁶ Mṟufu fulya fukakoṟoṟoma naṟu, fukamrakwo mnu fukamwolotsa wanda fukambuka; kawa cha ili apfie katana wafoi wahamba, “Ampfa!”

²⁷ Kyaindi Yesu kambada owoko kamhoṟotsa, nao kahoṟoka.

²⁸ Yesu amiida na mba, wa kiloshionyi kyake wakambesia kisekenyi, “Nyiki ili so lulaidima imfuna?”

²⁹ Nao Kawawia, “Waṟufu wa mbaṟi i wewa ifunopfo shila kui iterewa tupu.”

Yesu ahambase kya opfu loke

³⁰ Yesu na wa kiloshionyi kyake wekiwuka-ho, wakakuhendya waida Galilaya. Yesu alakunde wandu wamanye handu ai.

³¹ Kipfa nyi awelosha wa kiloshyonyi kyake Kawawia, “Manomndu echidambiko mawokonyi ha wandu wechimbaha, nao kamboho mfiri iṟaṟu nyi yechisia naṟuke.”

³² Wakiloshionyi walamanye, ili awawia ado, wakaowuo imbesa.

Mnene nyi u

³³ Wakacha na Kapernaumu. Akeri ipfo mba kawawesa, “Kindo muwei. Wesana kyakyo nyi kiki kulya njienyi?”

³⁴ Nawo wakatsia, kipfa waweiwesana kya msa echiwa msongoru o wengi kiidi kyawo.

³⁵ Yesu amdamia kalaha walya ikumi na wawi kawawia, “Mndu kakunda iwa msongoru, kimbaṟi nawe mfurumi nawewa mpfuṟukanyi o wose.”

³⁶ Kaira kimana kitutu kambika ipfo makiidi hawi hawo kamchunguṟya kawawia,

³⁷ “Msa echiambia mana cha ichu kui rina lyako, nyio inyi anjambya; mndu kanjiambya inyi chio inyi anjambyapfo, nyi aambia ichu anjidumye.”

Msa alailukaṟuo nai ora lodu

³⁸ Yohane kambia, “Mlosha, lulewona mndu kechifuna waṟufu wawicho ku rina lyapfo, alaioshana naso, lukamima, kipfa alaluosha.”

³⁹ Yesu kahamba, “Mlamime; kipfa kuipfo mndu echiwuta ṟiho kui rina lyako naidime ideda owicho kyakopfo.

⁴⁰ Kipfa sa alasuanyi naso, nyi aduanyi naso.

⁴¹ Kipfa mndu oose echimrutsa mṟinga fonyo na kirahu kui rina lyako, kipfa mui wa Kristo, nyi kya lohi ngambia, mndu chu echiwuṟa woṟunda wokepfo.

Madekesha

⁴² “Na mndu ose echitewa iwa wanjiidikye ma ichu mtutu umu-ho nawute wunyamaṟi, kyake kiwei kichakicha-ho nyi ipfungyo iho lya iseo lying'anyi oo nzingonyi nahende kumbo ipalyipalyinyi.

⁴³ Na kokoya kuwoko kopfo kukokudekesha kyekudumbuo-ho! Nanga iyo koida na ipfo kiidi kya moo kui kikonu, kota ili uwode mawoko hapfo hahawi koida na Gehena ipfo modonyi fulechiruma. [

⁴⁴ Mpfo kundo kiwiro kyewawiṟa kilechitsia na modo fowakoṟa fulechiruma.]

⁴⁵ Na koka kudende kopfo kokudekesha, kyekudumbwo-ho! Nanga iyo koida na ipfo kiidi kya moo, kui kiricheche, kota ili uwode madende hapfo hahawi kokumbo ipfo Gehenenyi. [

⁴⁶ Mpfo kundo kiwiro kyewawiṟa kilechitsia na modo fowakoṟa fulechiruma.]

⁴⁷ Na kokoya riso lyapfo lyakudekesha, kyelitufuoho! Nanga iyo koida na wumanginyi wo Ruwa kui njeche kota ili uwode meso hawi kokumbo ipfo modonyi fo Gehenenyi.

⁴⁸ Mpfondo mashinu haiipfo helekepfa, manya modo fulekerumisho manyale.

⁴⁹ Kipfa orio mndu echiwikyo monyo na modo.

⁵⁰ Monyo nyi kindo kicha, kyaindi monyo fukomba ifinda fochikoṟa-se ki? Wadenyi monyo ipfo kiidi kyanu mbekukaya na ofoṟo nyo wenyi na wenyi.”