MARIKO 8 - Bibilia Kui Mdedie fo Kimochi

¹ Mfiri iya kuwei-se ho kituṟu king'anyi kya wandu, walawode kindo kyela, Yesu kalaha wa kiloshyonyi kyake Wasanzye oo hando ai kawawia,

² “Ngakusaṟa wukiwa wo wandu-wa, kyamba wamtsinda kunu koko mfiri iṟaṟu, ma walawode kindo kelya.

³ Na kokoya ngawasama, wahende kanyi kowo, walasusuo, wechiariskya njienyi; nawo maata-ho wacheye wawuka kuleshe.”

⁴ Wa kiloshyonyi kyake wakamhaluo wakahamba, “A nyku mndu echiidima iwuta mkate yechiwaihutsa wose iya nuka.”

⁵ Yesu kawawesa, “Nyi mkate inga mbode?” Wakahamba, “Nyi mfungade.”

⁶ Kawawasa kituṟu kilya kya wandu wadamie wanda; Nahong'u kaira mkate iya mfungade kaana Ruwa kafunjafunja kaenengya wa kiloshyonyi kyake, kundu wawadaye; nawo wakadaya kituṟu kilya.

⁷ Wawode na shikunga shitutu; Yesu kaidapfuma Ruwa kawawasa shidaayo wandu.

⁸ Wandu wakalya wakaihuda Wakadodwo mtsuhaṟo fo shipeṟengu shikunja mfungade.

⁹ Na wandu walelya waweshikie cha shiku shiina; Yesu kawasama.

¹⁰ Nalyo lienyi kaida na ngalawenyi handu hamu na wa kiloshyonyi kyake wakahenda wambaṟa ya Dalmanuta.

Wafarisayo wakundi kiṟingishio

¹¹ Wafarisayo wakacha, wakawoka iwesana na Yesu kui imhesha wakakunda nawawutie ṟiho iwe kiṟingishio ke nawode pfinya iwukie ruwehu.

¹² Yesu kasokyo nyi fowa mrimenyi foke kahamba, “A nki ili mbaṟi ii ikundi kiṟingishyo? Nyi kya lohi ngambia, mbaṟi ii yechiloṟo kiṟingishio manyale-pfo.”

¹³ Kawada kaida-se na ngalawenyi kaambadya kya kulya mataya ya nduwa.

Mtarang'ao fo Wafarisayo na fo Herode

¹⁴ Wakiloshionyi wakahadima iduo mkate, nyi mkate fumu tupu wawerie ipfo ngalawenyi.

¹⁵ Yesu kawawawasa kechihamba, “Keambuyenyi mkuṟise mtarang'ao fo Wafarisayo na fo Herode.”

¹⁶ Wa kiloshionyi wakakusaṟa wo wenyi na wenyi. Nyi ahamba ado kipfa lulawode mkate.

¹⁷ Yesu kamanya kawawia, “Nyi kili muiwesana kya ili mlawode mkate? Nyi mlametawuka imanya ma mlamewada wuṟango? Na ngoo tso tsanu tsiwei ntumhari?

¹⁸ Nyi muwode meso, mlawone? Mbewode madu, mlaicho manya mlakumbuo?

¹⁹ Mukumburie lilya njilefunjyafunjya shiku shitanu mkate itanu? Muledoduo mtsuhaṟo shipeṟengu shechiichuṟa shikunja shinga?” Wakambia, “Nyi ikumi na shiwi.”

²⁰ “Na ili njilefunjyafunjya walya shiku shiina mkate iya mfungade, mledoduo mtsuhaṟo fo shipeṟengu sha shikunja shinga?” Wakahamba, “Na mfungade.”

²¹ Nao kawawia, “Na mṟasa wulalu. Mulamemanya?”

Yesu achiṟa kipfupfuṟe o Betisaida

²² Yesu na wa kiloshionyi kyake wakacha na Betisaida. Wandu wakamendye mndu a mpfu meso wakamterewa, ke nampaye.

²³ Yesu kawada ulya mpfu meso kuwoko kambuta kulya mṟinyi kamduo nja ya mṟi fulya kamshia mada ipfo mesonyi hake na imhekya mawoko kambesa, oidima iwona kindo?

²⁴ Kipfupfuṟe kechiambuo kahamba, “Njiwonyi wandu wechumya, njiwawonyi wai cha mashidi haichumia.”

²⁵ Nahong'u Yesu kawuya imhekya se mawoko mesonyi hake, kawanza iambuo kawuya iwona, pfinya yake yeambuo ikamchea, kawona shose necha.

²⁶ Yesu kamduma nahende kanyi koke, kechimbawasa, “Ma kulawuye na kulya mṟinyi.”

Petro aṟingishia ke Yesu nyi Mesia

²⁷ Yesu na wa kiloshionyi kyake wakahenda mṟinyi ya Kaisaria Filipi. Wachihenda Yesu kawesa wa kiloshionyi, “A wandu wekededa wada kyako, ke inyi nyi wu?”

²⁸ Wakambia “Wengi wekehamba iyo nyi Yohane Mpatisi, na wengi, nyi Elia, na wengi, nyi umu o waikimbi.”

²⁹ Nao kawawesa, “A nyo mohamba ke inyi nyi u?” Petro kahaluo kambia, “Iyo nyi ukeri Kristo.”

³⁰ Yesu kawakekedya, ma walawie mndu oose mbonyi tsake.

Yesu ahamba kya mawawio, opfu na iṟuka lyake

³¹ Yesu kawoka ilosha wa kiloshionyi kyake, “Mana o mndu, kimbaṟi naliso wukiwa wung'anyi na imino nyi wasongoru wa wandu na wakohanyi wanene na walosha wa wuwawaso Nechiwoho, na ili lya kaṟaṟu naṟuke.”

³² Yesu kawawia ado na pata. Petro kamduo kyaanya kawoka imdedya.

³³ Nao Yesu aminduka, kechiambuya wa kiloshyonyi kyake kadedya Petro kahamba, “Kewuya na numa yako Satana, nyi kipfa chando uihia chi ha Ruwapfo, nyi ha kiwandu.”

³⁴ Numa Kalaha kituṟu kya wandu handu hamu na wa kiloshyonyi kyake kawawia, “Kokoya mndu akunda oshana na inyi, kimbaṟi nakukane amonyi, nakudike na msalaba foke, naoshane na inyi.

³⁵ Kipfa mndu echikunda letsa moo foke amonyi, nyechifudetsa. Na mndu echidetsa moo foke kipfa kyako inyi na kipfa kya Mbonyi tso Njicha nyi echifuletsa.

³⁶ Kipfa kiira kiiho nyi kiki, ili mndu awinya wuyana wuwose, wukawa woke, kadetsya-pfo moo foke?

³⁷ Ang'u kindo mndu echiwika kiwe ndalai ya moo foke nyikiki?

³⁸ Mndu oose monjiwadia sonu inyi na madedo ha hako kunu kiidi kya mbaṟi ya wanyamaṟi na walasaṟie Ruwa, na Manomndu nyi echimbadia sonu ili echikaa nache na wusuṟi wo Nde handu hamu na wamalaika waele.”