MARIKO 7 - Bibilia Kui Mdedie fo Kimochi

¹ Wakakusanza ipfo ko Yesu Wafarisayo na walosha wa wuwawaso maata-ho walewuka Yerusalemu.

² Wakawona wa kiloshyonyi kyake maata wechilya mkate na mawoko haterefukye, nakyo nyi ili walawesanjie mawoko.

³ Kipfa Wafarisayo na Wayuda wose wekelya walasamba mawoko-pfo, wekeringa mnu kido kya waku wawo.

⁴ Na wekelya kindo wahuṟa tumo-shile wakisanjapfo. Kuwode na shingi shifoi waambye shelindia, na kya isanja shirahu na shiṟambo na shitela.

⁵ Wafarisayo na walosha wa uwawaso wakawesa Yesu, “Nyikili wa kiloshyonyi kyapfo walaiwuta kisumhanyi na shilya lui wadeye nyi waku wadu, wakalya shelya na mawoko haterefukye?”

⁶ Yesu kawawia, “Nyo makulembetseṟe na kilya Yesaya alededa kya lohi kehamba kisuku kyanu, chando kii kiṟehye kehamba, ‘Mbaṟi ii ya wandu; Ruwa ahamba, yecha injindya kui madedo ha wulya, kyaindi ngoo tsawo tsikeri kuleshe na inyi.

⁷ Ili wekenjiichika kya mai, ili waipfunda njopfundo tsii mawawaso ha wandu.’

⁸ Momda iwawaso lya Ruwa mkahenda iwada shilya mui wadeye nyi wandu.”

⁹ Yesu kaengeṟa ihamba, “Nyi wudo-ng'u, Mawawaso ha Ruwa nyi mutahachye kui wuṟango, mkawada shilya mui wadeye nyi waku wanu.

¹⁰ Kipfa Mose alehamba, ‘Keindya ndeo na mayo,’ na, ‘Moruma ndee ang'u mae, nyi opfu napfe.’

¹¹ Kyaindi nyo mokelosha, kokoya mndu awode kindo awechiidima itarama nakyo nde ang'u mae indi kahamba ke kindokyo nyi Korbanyi (kidaso ko Ruwa).

¹² Kimbaṟi natarame-se wafee wake-pfo.

¹³ Nyi wudong'u mokepiṟa idedo lya Ruwa kipfa kya shilya shanu muiwadeye mkadeya. Na wudo na shindo shifoi shido mokewuta.”

Shindo shekefanyiṟa mndu

¹⁴ Yesu kalaha-se kituṟu kilya kya wandu na handu ai kawawia, “Munjiadanye mose na imanya.

¹⁵ Kuwode kindo kii ipfo nja ya mndu kyechiida na ipfo kiidi kyake kechiidima imterefutsapfo. Kyaindi shilya shawuka ipfo kiidi kya mndu nyisho shii sheterefutsa.” [

¹⁶ “Ichu awode madu headanya naweadanya.”]

¹⁷ Kiheri amida na mba, awuka kulya kituṟunyi kya wandu, wa kiloshyonyi kyake wakambesa kya mfanano fulya.

¹⁸ Nao kawawia, “Nanyo na wudo-ng'u mlamanya kindo? A mlaichi, ke shose sha nja sheida na ipfo kiidi kya mndu shechiidima imterefutsapfo.

¹⁹ Nyi kipfa shilechiida na ngoonyi yake, shila nyi ndewunyi yake shechiida napfo shikakuwukya-ho shewiko ṟungunyi kundu kowika mando. (Ili Yesu alehamba ado nyi aleharamisha shelya shose.)”

²⁰ Kaengeṟa ihamba, “Kilya kyekyeuka ipfo kiidi kya mndu, nkyo kyekyeterefutsa mndu.

²¹ Kipfa kyekyeuka ipfo ngoonyi ya mndu nyisho mahio mawicho; isokomba na isokombo; wuiwi na wuwahi.

²² Na iṟuhuya na iṟuhuyo; wununyi na wuwicho; ngeṟo na mpuria; riso linenyi na shirumo na ikushela na wutondo.

²³ Shiwicho sho shose shekewuka ipfo kiidi kya mndu shikaterefutsa mndu.”

Iidikya lya mndu mka umu

²⁴ Yesu kakure-pfo kahenda ipfo mṟasenyi ya Tiro. Kaida na mba kiṟika ma mndu nalamanye, indi nalaidime ikuowya-ho.

²⁵ Oweṟe lulya mndu mka umu, kimana kyake kya waka kiwodo nyi mṟufu o ngafu kaicho mbonyi tsa Yesu, kaida-ho kamolokya ndenyi.

²⁶ Na mka ulya awekeri mndu Mgriki o ipfo mbaṟinyi ya Wafoenyike wa Kisiria. Katerewa Yesu ke nafune mṟufu ulya o ngafu nauke mana-cho oke o waka.

²⁷ Nao Yesu kambia, “Kyeleka shiwana shiihutso kuwoka; kipfa chi kicha osoke shiwana kando nokumbye mashitepfo.”

²⁸ Indi mkacho kahaluo kambia, “Ee-wo Mndumii; kyaindi ma shite shekaa shia mesa shekyekulia na shipeṟengu sheolotso-olotso-ho nyi shiwana.”

²⁹ Nao Yesu kambia, “Omtana omhamba kudo, kuhendye, Mṟufu cho ambuka mana chu opfo o waka.”

³⁰ Amekuhendya kanyi koke, kakoya manoke a mlaṟe ipfo kitaṟenyi, ambuko nyi mṟufu ulya.

Yesu achiṟa mndu mpfu madu apfungikie olimi

³¹ Yesu ambukase ipfo mṟasenyi ya Tiro, kaida Sidon kashika kulya nduwenyi ya Galilaya, echiida makidi hawi ha mṟasa ya mṟi iya ikumi (Dekapoli).

³² Wakamendye mndu a mpfu madu apfungikye na olimi, wakamterewa, namhekye mawoko.

³³ Yesu kambuta o kituṟunyi kya wandu kamduo kyanya kamhekya shimnyo kulya madunyi hake kapaya olimi loke kechipuchia mada.

³⁴ Kaambuya ruwehu kasumukya kambia, “Efata,” ikyo nyi “Tambaṟuka!”

³⁵ Oweṟe madu hake hakatambaṟuka, cha ili olimi loke lupfungikye lukatambahaluka, kawoka ideda necha.

³⁶ Yesu kawawawasa walawie ma mndu mbonyi tso. Kyaindi chando alewawasa, nyi wudo nawo waleengeṟa yonguo.

³⁷ Wandu wakawa mkahai dang'a, wechihamba, “Shose ashiwutye necha, katarama walya wapfu madu iicho, na walya walaideda kawainenga ideda.”