MARIKO 6 - Bibilia Kui Mdedie fo Kimochi

¹ Yesu kakureho kahenda kulya mṟinyi kundu awukye, arianyi na wa kiloshyonyi kyake.

² Mfiri fo sabato fomshika kawoka ilosha ipfo sinagogenyi. Na walya wafoi waleadanya wakaṟihyo wechihamba, “Mndu chu kundu awutye ishi nyiku? Na wuṟango wu awode nyi woku? Na mawuto hado ha finya hawuto ku mawoko hake?

³ Ichu chi ulya motsana shidi, ai mana o Maria na manomae o Yakobo na o Yose na o Yuda na o Simon? Na washiki wake chi wakeri iya kodu?” Wakawa kiṟuma ṟuma kipfa kyake.

⁴ Yesu kawawia, “Kuwode kundu mwikimbi amenekyemenekyepfo, chila na kulya mṟinyi koke na ko washari wake na kulya kanyi koke.”

⁵ Nao ma alaidime iwutia-pfo ṟiho shile wandu waluo maata alewahekya mawoko kawachiṟa.

⁶ Kaṟihio mnu kyawo, ili wai wado wandu walaidikye. Nao Yesu kawa motengetatengeta kulya mṟinyi ya kufui kechilosha.

Yesu aduma wa kiloshionyi ikumi na wawi

⁷ Kalaha walya wa kiloshinyi ikumi na wawi kawoka iwaduma wawi wawi. Kawaenenga pfinya yefuna waṟufu wa ngafu.

⁸ Kawawasa, “Muladuo kindo njienyi shila ndichi tupu. Ma mkate ma kichoṟe ma mapesa ipfo shikuchunyi shanu.

⁹ Ṟaenyi shadu. Manya mlaṟae nguwo tsiwi tsa wanda.”

¹⁰ Kawawia-se, “Kokoya moambio na mba ko mndu, mkukaye-ho mtane mokure-pfo.

¹¹ Mkakoya kundu walechimwambia ma imwadanya, wukyenyi-ho na ikutakuta kiluli kii shia madende hanu, kiwe kiṟingishyo kowo.”

¹² Wakakuhendya wakaongoya wandu wadumbuye.

¹³ Wakafuna waṟufu wawicho wafoi wakashia wandu wai mtengeṟi mafuda wakawachiṟa.

Opfu lo Yohane Mpatisi

¹⁴ Kyasia mangi Herode kaicho isho shose kiṟumi kya Yesu kiledung'ana orio handu. Wandu maata wawekehamba, “Yohane Mpatisi ameṟuka awuka ko wapfu, nkyo kitewe pfinya tsa ṟiho tsiṟunda kiidi kyake.”

¹⁵ Wengi wakahamba, “Mndu-chu nyio Elia.” Wengi wakahamba, “Nyi umuho o waikimbi walya.”

¹⁶ Herode ameicho mbonyitsi kahamba, “Ichu nyi Yohane! Njilemdumbuo mdo, nyio ichu aṟuka.”

¹⁷ Nyi ili Herode awedumie iwada Yohane na imshingya kipfungyonyi kipfa kya Herodia, mka o manomae o Filipo, nao amwalikie.

¹⁸ Kipfa Yohane alewia Herode, “Kikusumuhanye ukae na mka o manomayopfo.”

¹⁹ Kyasia Herodia kawadia Yohane kiṟumbo kakunda imbaha, nalaidime.

²⁰ Nyi kipfa Herode nyaweowoe Yohane kammanya, ke nyi mndu o wusumhanyi na mndu mwele, kamringa. Herode kakunda iadanya Yohane; kawa morohio mnu mrimenyi kiheri amemwadanyia.

²¹ Nahong'u kukacha mfiri fokumbuo ifeo lya Herode, Herode kasungusia mfuho kalaha wanjama wake, na wasoṟo wa shidenyi na wanene walya wa Galilaya mfiri fokumbwo ifeo lyake.

²² Mana o Herodia o waka kaida-ho kashinyia-ho kachihiṟa Herode na walya waiho welya shelya. Mangi kawia mana ulya o waka, “Kenterewa kindo kyose okundi na njechikuinenga.”

²³ Kamlia nyamu kambia, “Kindo amenjiterewa na njekuinenga, ma kokoya kishikie ma kifunjo kya wumangi woko.”

²⁴ Mana ulya o waka kahenda ipfo nja kawia mae, “Nyikiki njechimterewa?” Nao kambia, “Na mdo fo Yohane Mpatisi.”

²⁵ Mana ulya o waka kakambiṟa iwuya na ko mangi kamterewa kehamba, “Njikundi mdo fo Yohane icho Mpatisi njiwikyo oo ipaluhu wulalu kudi.”

²⁶ Mangi kawado mnu nyi fowa, alakikunde imlehya kipfa kya nyamu iya na wandu walya waiho welya shelya.

²⁷ Mangi kakambiṟa iduma wasikari wake umu-ho kawawasa, kuendo mdo fo Yohane. Msikari kahenda kadumbuo mdo fo Yohane ipfo kipfungyonyi

²⁸ kaende mdo foke na ipalu kainengya mana ulya o waka na mana ulya o waka kainengya mae.

²⁹ Wa kiloshyonyi kya Yohane wameicho mbonyitso, wakacha wakaira mnying'a foke wakafuṟika ṟungunyi.

Yesu ainenga wandu shiku shitanu kelya

³⁰ Nahong'u wasu walya wakawuya wakakusanza ko Yesu wakambia mbonyi tsa shilya walewuta shose na ilosha.

³¹ Wandu wafoi wawekecha na ko Yesu na iwuya tane Yesu na wa kiloshianyi kyake wawuṟa ma mweke folya kelya. Yesu kawia wa kiloshionyi kyake, “Nndenyi luhende handu ha kyaanya lusie ho moo kituntu.”

³² Wakakuhendya wawenyi kundu ko kisekyenyi wario nyi ngalawa, wakashika kundu ku kuleshe na wandu.

³³ Wandu wafoi wakawawona wechihenda, wakawamanya wakawaituma na madende wa mṟi yose wakawasongoya ishika kulya kundu Yesu na wakiloshionyi waihenda.

³⁴ Nawo wameshika, Yesu, kawona kituṟu kya wandu king'anyi kawaichio wukiwa, cha kipfa wakeri cha machondi halawode mlisi, kawoka iwalosha shifoi.

³⁵ Mfiri fomeela, naho-ng'u wa kiloshyonyi kyake wakamchea wakambia “Iya nyi nuka na wulalu mfiri fomeela.

³⁶ Kewasame, kundu wakuhendye ipfo mndenyi na ipfo mamṟinyi ha mṟasenyi, wakuhuṟye-pfo kindo kyekulia.”

³⁷ Nao Yesu kahalwo kawawia, “Wainengenyi nyo shelya.” Nawo wakambia, “Ngesa luhende ihuṟa mkate ya dinari mahana hawi, luwainenge kyekulia?”

³⁸ Yesu kawawesa, “Mkate inga muwode? Hendenyi yambuya.” Wamemanya, wakahamba, “Nyi itanu na makunga hawi.”

³⁹ Yesu kawawasa wakiloshionyi wadamiṟe wandu wose kui madembo ipfo maṟenyi hadoe-pfo.

⁴⁰ Wakadamia wanda kui makamba, kui ihana ku ihana na makumi hatanu makumi hatanu.

⁴¹ Nahong'u Yesu kaira mkate iya itanu na makunga halya hawi kaambuya huye ruwehu kaidapfuma Ruwa kafunja mkate yo shifunjo kainengya wa kiloshyonyi kyake, kundu wawadaye, na wudo makunga halya hawi kawahawya wose.

⁴² Wandu wose wakalya wakaihuda.

⁴³ Wakadodwo mtsuhaṟo fo shipeṟengu sha mkate na makunga wakaichuṟa shikunja ikumi na shiwi shiichwo pacha.

⁴⁴ Na walya walelya mkate iya, waweshikye wasoṟo shiku shitanu.

Yesu achumia huya mṟinga

⁴⁵ Yesu kakambiṟa iitikya walya wa kiloshyonyi kyake, waide na ngalawenyi, wamsongoye yambadya kya kulya Betisaida mataya ya nduwa, natane asama wandu walya wa mamwingi.

⁴⁶ Amsamana nawo, kahenda ipfo ifumvuhu iterewa.

⁴⁷ Komshika iila, ngalawa ikeri ipfo makidi hawi ha nduwa, nao ai handu hahadutsu amonyi.

⁴⁸ Kyasia kekiwona wa kiloshionyi kyake wahataṟo wekuruo ngalawa iya, kipfa otanu luwasumhyanye oshangunyi. Kufui na aheṟa Yesu kawahendya kechichumia huya mṟinga. Kakunda ikwidya mbele yawo.

⁴⁹ Indi walembona, kechumia huya mṟinga, wakakusaṟa nyi kiṟishe wakafihiṟa.

⁵⁰ Kipfa walya wawembonyi wose waleangalala. Wadi Yesu kadeda nawo kawawia, “Kewuyonyi nyi moo, nyio inyi Mlaowuo!”

⁵¹ Kadoya ipfo ngalawenyi kundu wawei, otanu lukahuma; wakauma mnu mkahai dang'a ipfo kidi kyawo.

⁵² Nyi ili mbonyi tsilya tsa mkate iya tsilawemewatambalukie na mrima yawo iwei nlemeri.

Yesu achiṟa waluo kulya Genesareti

⁵³ Wamambadya kya kulya mbai ya nduwa, wakashika kulya orukenyi lo Genesareti wakapfungya-ho ngalawa iya.

⁵⁴ Kyasia wambuka ipfo ngalawenyi oweṟe wandu, wakammanya Yesu.

⁵⁵ Cha ili wakatengeta orukenyi lulya lose wakawoka yende walya wakeri iwawyo wario na shitaṟa na orio handu Yesu ai, kipfa waleicho ke nyi akyeri-ho.

⁵⁶ Orio handu Yesu amehenda mṟinyi ing'anyi ang'u ntutu, ang'u mndenyi wandu wakaende naho wandu waluo wakamterewa wapaye ma mambo tsa nguo yake. Na walya wose waletsipaya walechia.