MARIKO 5 - Bibilia Kui Mdedie fo Kimochi

¹ Wakaambadya kya kulya mataya ya nduwa orukenyi lo Wageraseno.

² Oweṟe lulya Yesu ambuka ngalawenyi, mndu awodo nyi mṟufu o ngafu kakambiṟa imkumbuhana acha awuka maṟungunyi ha wapfu.

³ Nao mndu cho nawekekaa maṟungunyi ha wapfu, ma kuipfo mndu aleidima impfunga manya na mshe-pfo.

⁴ Kipfa kafoi nawempfungie matima na ipfungo na mshe kadawuo mshe iya kawefunja na matima halya, ma mndu alaidime imlamiṟia.

⁵ Mfiri na kio echikaa maṟungunyi na mafumvunyi kyechipoṟohoṟa kechikukapa na maho.

⁶ Amewona Yesu ai kuleshe kakambya kamhoya ndenyi.

⁷ Kafihiṟa na ṟu ling'anyi kahamba, “Nyikiki kyako na iyo, Yesu ui Mana o Ruwa, Mwitoṟi? So hoi Ruwa ulanjiture.” (

⁸ Cha kipfa Yesu awemehamba, “Lekana na mndu chu iyo mṟufu o ngafu!”)

⁹ Nao Yesu kambesa, “Rina lyapfo nyi u?” Kambia, “Rina lyako nyi itorito (Legionyi,) kipfa lui wafoi.”

¹⁰ Kamterewa mnu, Yesu kundu nalawafune wawuke kulya orukenyi.

¹¹ Kyasia na alya fumvunyi kukeri iliso ipoo lying'anyi lya nguwe.

¹² Waṟufu walya wakamterewa wakahamba, “Keludume alya nguwenyi kundu luide na kiidi kyatso.”

¹³ Kawainenga momu. Waṟufu walya wa ngafu wakawuka-ho wakaida na kiidi kya nguwe. Ipoo lyo lya nguwe likapufukya msaṟihu likakwolotsa kulya nduwenyi tsikapufuka, na tsiweshikie cha shiku shiwi tsikapfumbikya kulya mṟingenyi.

¹⁴ Walya wetsilisa wakadicha wakashitsa mbonyi kulya mṟinyi na mhundenyi ya wandu; wandu wakacha iwona kilya kiwutikye.

¹⁵ Wakachea Yesu wakawona-ho mndu ulya awewodo nyi mṟufu mbicho, adamye aṟee nguwo amṟamtsu, wakaowuo.

¹⁶ Walya walewona mbonytso wakawaongoya wengi chando mndu ulya awewodo nyi mṟufu mbicho ambutyo na kya nguwe tsilya.

¹⁷ Wakawoka imterewa, nawuke kulya orukenyi lowo.

¹⁸ Nahong'u Yesu kyechiida na ngalawenyi, mndu ulya awewodo nyi mṟufu mbicho kamterewa nahende nao.

¹⁹ Indi Yesu kamlehia, kya indi alembia, “Henda kanyi kopfo, ko wandu wapfo, nowaongoye chando Mndumii akuwutya shindo shing'anyi kakusaṟya.”

²⁰ Nao mndu ulya kakuhendya kawoka yonguo kulya Dekapoli (mṟinyi ikeripfo ikumi,) chando Yesu ambutye shing'anyi wandu, wose wakaṟihio.

Mana o waka o Yairo na mndu mka umu wachiṟo

²¹ Kyasia Yesu amambadya kya kulya na ngalawa, Kituṟu king'anyi kya wandu kikakuwumbya koke, akeri alya mbarinyi ya nduwa.

²² Kukacha mnene umuho o walya weambuya sinagoge, rina lyake nyi Yairo, Ambona Yesu kakuhutsa wanda madendenyi hake.

²³ Kamterewa mnu kechihamba. “Manowaka oko nyi ineuka ai, Hoi kekuchee umhekye mawoko hapfo, kundu nachie nakae na moo!”

²⁴ Kyasia Yesu kakure nao, Wandu wakaoshana nao kituṟu king'anyi wakampeṟehetsa.

²⁵ Umu-ho nyi mndu mka awewoda nndaṟe kechiwuka samu maka ikumi na iwi.

²⁶ Mka-cho awemlya mnu wukiwa wung'anyi wo wahanga wafoi. Amaiye masaa awewode hose, alawone achia, kya indi kawona, kechiengeṟa iwichwowichwo.

²⁷ Awemiicho mbonyi tsa Yesu, kacha numa yake kakupeṟehetsia ipfo kituṟunyi kya wandu kapaya nguwo yake.

²⁸ Kipfa nyi alehamba mrimenyi, “Ma kokoya njechipaya nguwo tsake tupu, na njechichia.”

²⁹ Oweṟe mra fo samu yake ikauma, kakuicho ipfo mbihu koke, ke amechia ndaṟe iya iwembonde.

³⁰ Yesu kamanya mrimenyi foke, ke ambuko nyi pfinya, kaindukya kituṟu kilya kya wandu kahamba, “Nyiu anjipaya ṟao lyako?”

³¹ Wa kiloshyonyi kyake wakambia, “Uwonyi, kituṟu-kyo kya wandu kechikupeṟehetsa, kohamba, nyi u anjipaya?”

³² Yesu kaing'uṟung'uṟu iwona nyiu ambutia ado.

³³ Nahong'u mka ulya ambona ambutyo ado, kacha, ikuloṟa kechiowuo na idedema, kaolokya Yesu ndenyi kambia shose sha sungusihu.

³⁴ Nao Yesu kambia, “Manoko o waka, iidikya lyapfo lyamekukiṟa, kuhendie na kipuo nowechia na ndaṟe i iwekuwode.”

³⁵ Yesu kyechideda ado wakacha wa kulya ko mnene ulya moambuya sinagoge wakambia, “Manopfo o waka ampfa, Nyikise owinyisha mlosha?”

³⁶ Na Yesu nalasaṟe kilya amicho kihambo kido kawia mnene ulya moambuya sinagoge, “Kulaowuo kewekuidekye tupu.”

³⁷ Alalekye mndu nahende nao shila Petro na Yakobo na Yohane, monomae o Yakobo.

³⁸ Wakashika kanyi ko mnene ulya moambuya sinagoge Yesu kaicho kitohyo na ilia wechilia na ifihiṟa mnu.

³⁹ Kaida-na mba kawawia, “Nyiki ili muitohya na ilia? Mana chu chi ampfapfo, nyi alee tupu.”

⁴⁰ Kyaindi wo wakamseka. Nao kafunya wose nja kahenda warianyi na ndee o mana na mae na walya wa kiloshionyi wakaida napfo, alyando mana ulya akeri.

⁴¹ Kyasia kawada mana ulya owoko kambia, “Talita kumi,” ikyo nyi kihaluo, “Manoko o waka ngakuwia kure.”

⁴² Nalyo liyenyi mana ulya o waka kakure kachumya; (kipfa nyi aweshitsye maka ikumi na iwi.) Wadi wandu wakauma mkahai dang'a.

⁴³ Yesu kawawawasa mnu, waladung'antse mbonyitso ko mndu, ma mndu nalakimanye, Kahamba mana-cho o waka nainengo kyela.