MARIKO 4 - Bibilia Kui Mdedie fo Kimochi

¹ Yesu kawoka-se ilosha-se ai ohambehu lya nduwa. Kituṟu king'anyi kya wandu wakakuwumbia ipfo koke, katana aida na ngalawenyi kadamya alya nduwenyi, na kituṟu kilya kyose kikakaa kufui na nduwa hambehu.

² Kawalosha shifoi kui mafanano, na ipfo kiloshyonyi kyake kawawia,

³ “Adanyienyi! Mndu mokumba mbeu alehenda kumba mbeu.

⁴ Na ili awekumba maata tsikaoloka mbai ya njia shilehe shikacha shikatsitola-ho.

⁵ Tsingi tsikaoloka hando hawode maho, naho tsilawoneho teri imoṟi. Natso kudi tsikakambiṟa ido owinyi, kipfa llyandi tsilawode teri ipfo wanda.

⁶ Mnengeṟi fomedo, tsikahya mu, kyamba tsilasotsye mri, tsikauma.

⁷ Tsingi-se tsikaoloka kiidi kya msha. Na msha iya ikado ikatsishingya tsilakikumbye kilimu.

⁸ Tsingi-se tsikaoloka ipfo terinyi njicha tsikado wanda tsikang'ana tsikakumbya imu ikakumbya makumi haṟaṟu na ingi makumi haṟandaṟu na ingi ihana.”

⁹ Kiidima kahamba, “Ichu awode madu headanya naweadanya!”

Kitewe kya mfanano

¹⁰ Kiheri Yesu awekeri amonyi, walya walemwadanyia warianyi na walya ikumi na wawi wakambesa kya mfanano iya.

¹¹ Nao kawawia, “Nyo mu wainenge imanya mbonyi tsa Wumangi wo Ruwa tsi njiṟike, kyaindi walya wa nja wawio shose ku mfanano.

¹² Kundu yambuya waambuye ma walawone, na yadanya waadanye ma walamanye, chila wudo wechihalukya Ruwa nao nawahoṟie.”

Yesu adambuo mfanano fo mkumbi o mbeu

¹³ Yesu kawawesa, “Momanya ma ifananolipfo, Nyi wuda mochimanya mfanano yo yose?

¹⁴ Ulya mowaya awaya idedo lya Ruwa.

¹⁵ Walya wa mbai ya njia hando idedo lyawayo nyi walya wamicho, satana kacha owinyi kawuta idedo lyo li liwaye kiidi kyawo.

¹⁶ Wandu wengi nyi cha mbeu tsilya tsinjiwaye mahonyi. Nyi walya wekeicho idedo, wakakambiṟa iliambya na sia.

¹⁷ Kyaindi idedolyo lyilawade mri ipfo kiidi kyawo, kyaindi wakakaa-ho oweṟe. Nahong'u kiheri kocha wukiwa na iterengyo kipfa kya idedo lyo, wakahutsa macha.

¹⁸ Na wengi nyi cha mbeu tsilya tsileoloka ipfo kiidi kya msha. Nyi wo weadanya idedo lyo.

¹⁹ Kukaida-ho mawina ha kunu orukenyi na wulembi wolembo nyi masaa na lango tsa shindo shingi shikapfumba idedo lyo lilakumbye ndunda.

²⁰ Kyaindi wengi nyi cha tsilya tsinjiwaye terinyi njicha. Nyi iwo wekeadanyia idedo lyo na iidikya wakakumbya ndunda; wengi makumi haṟaṟu, na wengi makumi haṟandaṟu na wengi ihana.”

Taa injishikie

²¹ Yesu kawawia, “Ngesa wandu wekeatsa mchumaa kundu fupfinyikyo kisoṟonyi ang'u fuwiko shia kitaṟa? Chi kundu fuhekyo handu ha huye?

²² Kipfa orio kindo ki kiṟike, kyechimanyika na kindo kya moowyonyi, kechiwono na pata.

²³ Adanyienying'u kokoya na muwode madu!”

²⁴ Kawawia, “Adanyienyi na mrima fose kindo mukicho! Kiheṟo ikyo chando mokeheṟia wandu wengi nkyo Ruwa echimuheṟya nakyo, nakyo mochiheṟyo nyo na yengeṟyo-se.

²⁵ Kipfa ichu awode kindo nyi echienengo ngoseṟa; na ichu alawode, na kilya awode nyi echisoko.”

Mfanano fo mbeu iido

²⁶ Yesu kaengeṟa kahamba, “Wumangi wo Ruwa nyi wukeri, cha ili mndu ahenda kumba mbeu terinyi.

²⁷ Kio kahenda ilaa na yamka mfiri, kiherikyo mbeu ikatoluo na ing'ana alaichi, chando kii.

²⁸ Kipfa teri yekeng'anyisha kilimu i njenyi, ikasongoṟa iṟa, ikaling'anyisha mbuwa, ikaiichuṟa mbeke ipfo mbuwenyi.

²⁹ Kyilimu kikambiṟa mnducho echikambiṟa ilesha kimndo, kipfa kiheri kyeweha kyamshika.”

Mfanano fo mbeu ya karadali

³⁰ Yesu Kahambase, “Lochifananyisha wumangi wo Ruwa na kikii ang'u mfanano fo iki lochiwuwika?

³¹ Nyi wukeri cha mbeu ya karadali, mndu kaiwaya terinyi, nayo i ntutu kota mbeu tsingi tsose tsa kunu orukenyi.

³² Ikamewayo, ikado ikang'ana ikaida huye ya mashidi hose ikakapa mbaha tsing'anyi, shilehe sha ruwehu shikatana shacha iwikapfo sungu na ilaa pfo mṟishenyi foyo.”

³³ Kyasia Yesu na kui mfanano ifoi ido alewalosha nayo idedo lyake chando weleidima yadanya.

³⁴ Alededa nawo kindo kyosepfo chila kui mfanano tupu, kya indi walya wa kiloshyonyi kyake o kawa mowatambahaluya shose kyanya.

Yesu atoloma owira lutsie

³⁵ Mfiri fulya fulya komeila Yesu kawia wa kiloshionyi, “Luhende yambadya kya kulya.”

³⁶ Wakada kituṟu kilya kya wandu, wakaduo Yesu, na ngalawa iya awekeri, kuwekeriho na ngalawa tsingi-da.

³⁷ Kukaamka owira lo otanu lung'anyi, masinanu hakaolokya kulya ngalawenyi, ngalawa iya ikahenda yechiichuo mṟinga.

³⁸ Nao Yesu nawekeri ngalawenyi alya numa nawelee mado kehekya mdo gondoṟonyi. Wa kiloshionyi wakamwamtsa wakambia, “Mlosha, nyi ulasaṟa-wo, ili luiiarisika?”

³⁹ Kapang'uka katukya otanu lulya kawia masinanu ha nduwa, “Tsia, ukae kui ndiṟi!” Otanu lukahutsa kukaho olele wyaa.

⁴⁰ Nao Yesu kawawia, “Nkili mui mdi waowu? Nyiki ili mlawode idikya?”

⁴¹ Wakaowuo wuowu wung'anyi wakawiana mndu na odoye “Nyi u ichung'u-wo ili na otanu na masinanu shamidikya?”