MARIKO 3 - Bibilia Kui Mdedie fo Kimochi

¹ Yesu kaida-se na sinagogenyi, na kuwekeripfo mndu akachukye owoko.

² Wandu waweiho Wakambikya meso, waambuye koka nyi echimchiṟa mfiri fo sabato, kundu wawonye Yesu owingo.

³ Nao Yesu kawia mndu ulya akachukye owoko, “Kure nokucheie na a makidi hawi.”

⁴ Kawawesa, “Ngesa kindo kisumuhanyi iwuta mkonu fo Sabato nyi iwuta kicha ang'u nyi iwuta kiwicho, nyi ikiṟa moo ang'u nyi iwaha?” Nawo wakatsia.

⁵ Kekiwaṟengutsya meso kawaichyo nyashi, akuinadie kya wuumu wo ngoo tsawo. Kawia mndu ulya, “Hoṟuo owoko-lopfo.” Kahoṟwo, owoko loke lukachia-se.

⁶ Kyasia Wafarisayo wamewuka-pfo wakakambia ideda kyama kyake hamu na walya wa ko Herode, kundu wechirumatsa Yesu.

Kituṟu kya wandu mbai ya nduwa

⁷ Kyasia Yesu kakusheṟwo na wa kiloshyonyi kyake wakahenda mawambayonyi ha nduwa, mamingi fung'anyi fo wandu fukaoshana nawo, Wacheye wauka Galilaya na Yudaya.

⁸ Na Yerusalemu na Idumaya na mataya ya meda fo Yordani na oruka lo kulya Tiro na Sidon. Nyi mamingi fung'anyi; wekiicho shilya Yesu alewuta, wakacha na koke.

⁹ Nao Yesu kawia wa kiloshyonyi kyake, wamteseheṟie kingalawa kipfa kya kituṟu kya wandu kyembeda, kundu walampeṟehetse.

¹⁰ Kipfa walya alewachiṟa wawefoi; wandu waluo wakatana wamwolokya, kundu wampaye.

¹¹ Wandu wawodo waṟufu wa ngafu wekimbona, wakamwolokya ndenyi wakafihiṟa wechihamba, “Iyo nyi ukeri Mana o Ruwa.”

¹² Indi Yesu kawadedya kya pfinya, kundu walaongoye wandu.

Yesu asambuṟa wasu ikumi na wawi

¹³ Kyasia Yesu kado ifumvuhu kakulahya sa alekunda amonyi, wakahenda koke.

¹⁴ Kasambuṟa wandu ikumi na wawi, kawadumbuya rina nyi “Wasu” kundu wakukaye nao na kundu nawadume wahende yongwo mbonyi,

¹⁵ na ihenda wawode pfinya yefuna waṟufu wawicho.

¹⁶ Walya ikumi na wawi alewasambuṟa nyiwo, Simon (rina lyingi nyi Petro.)

¹⁷ Yakobo na Yohane wana wa Sebedayo (Yesu kawadumbuya rina nyi Boanerge, nakyo kyahamba, wana wa ikuṟuṟuma.)

¹⁸ Andrea na Filipo na Bartolomayo, na Matayo, Toma Yakobo, mana o Alifayo, na Tadayo na Simon Mkananayo.

¹⁹ Na Yuda iskariote, nyi ulya aleṟingya Yesu.

Yesu na Belsebuli

²⁰ Kyasia Yesu kaida na mba Kukasanzia-seho na kituṟu king'anyi kya wandu walawone mwanya folya kyela.

²¹ Walya wa kanyi koke wekiicho wado, wakahenda imwonduo; cha kipfa walehamba nyi awodo nyi oṟuuṟe.

²² Nahong'u walosha wa wuwawaso wawewukye Yerusalemu wakasoka napfo wakahamba, “Nawodo Belsebuli na kui pfinya ya mnene chu o waṟufu wawicho nakeri ifuna waṟufu wawicho.”

²³ Kyasia Yesu kawalaha kawawia ku mafanano, “Nyi wuda Satana aidima ifuna Satana ngesa?

²⁴ Na kokoya wumangi wupaṟakanyi wenyi na wenyi, oruka ludo loidima iwangapfo.

²⁵ Na kokoya Wandu wa mba imu wapaṟakanyi wo wenyi kowenyi wechirumara.

²⁶ Na kokoya Satana akuamkya amonyi apaṟakanyi, manya aidima iwangapfo, indi nyi echiarisika nakamu.

²⁷ “Ma kuwode mndu echiidima iida na ipfo mba ya mwapfinya na iduo-ho nzohoṟa tsake alawoka ipfunga mwapfinya ulyai-pfo, kamma, nyi echitsiduo.

²⁸ “Nyi kya lohi ngambia, ‘Wandu wechihoṟio njonyamaṟo na shirumo shawo shose wairuma nasho Ruwa.

²⁹ Kya indi mndu karuma Mumuyo Mwele, echiwona ihooṟyo manya indipfo, kya indi na wunyamaṟi woke wochimbonyia owingo lo mlungana.’” (

³⁰ Yesu nalehamba ado kipfa welehamba, “Ai na mṟufu o ngafu.”)

Mae na wana wa mae wa Yesu

³¹ Mae o Yesu wakacha naho na wanawamae wakahoṟoka ipfo nja wakaduma mndu koke wechimlaha.

³² Kuwedamye-pfo kituṟu kya wandu wakamṟingichia kiidi wakambia, “Ambuya mayo wakeri ipfo nja na wana wa mayo na washiki wapfo, wechikupfula.”

³³ Nao Yesu kahaluo kawawia, “Wama oko na wana wa wama wako nyi wu?”

³⁴ Kawaṟengutsya meso walya wawedamyeho wawembikye kiidi kahamba, “Aiwa wama oko na wana wa wama wako.

³⁵ Msa awuta shilya Ruwa akundi, nyio ai manowama oko na mshiki na wama.”