MARIKO 16 - Bibilia Kui Mdedie fo Kimochi

¹ Kyasia mfiri fo sabato fomeida, Maria o Magidala; Salome, na Maria mae o Yakobo wakahuṟa mdi yepfama kundu wache ishia mbihu fo Yesu.

² Nalyo ngamenyi otuko mfiri fo Ruwa wakacha na kulya opangenyi, kiheri mnengeṟi fomedo.

³ Wakawiana wo wenyi na wenyi, “Nyiu echilueka ipiṟing'itsa-ho iho lyo oo momu fo ṟungu lilya?”

⁴ Wakairia meso wakawona, ke iho lyo lyampiṟing'itso-ho, (Nalyo nyi liweng'anyi mnu.)

⁵ Wakaida na opangenyi wakawona manake adamye-ho ora lo kulyo, aṟee ikonya lya mkuruo, Wakaṟihio mnu.

⁶ Nao manake ulya kawawia, “Mulaṟihio mnu. Nyi muipfula Yesu Mnasareti, ulya ambambye msalabehu; Amṟuka, nakeri iyapfo. Ambuyenyi handu wawemṟikie.

⁷ Kyaindi henda wienyi wa kiloshyonyi kyake na Petro, ke nyi echimusongoya echihenda kulya Galilaya. Mpfondu mochimbona, chando alembia.”

⁸ Wakawuka alya opangenyi wechidicha, kipfa wawodo nyidedema na makangao. Walawie na mndu ma kindo, kifa wawekeri yowuo mnu. [

Yesu awonekia Maria Magidala

⁹ Kyasia Yesu ameṟuka mfiri fo Ruwa ngamenyi otuko, kawoka ikuloṟa na Maria o Magidala, nyi ulya Yesu awembutie waṟufu wawicho mfungade wawembode.

¹⁰ Maria Magidala kahenda yongoya walya wake wawekeri na Yesu wakuinadie na ilia.

¹¹ Nawo wekiicho, ke Yesu nyi ai na moo kawono nyi Maria Magidala walaidikye.

Yesu awonekia wa kiloshionyi wawi

¹² Ili numa Yesu kakuloṟa na wawi wa kiloshionyi, wechichumya, kakuloṟa nawo ai na fana ingi, wechihenda ipfo patehu.

¹³ Nawo daa wakahenda wakaongoya walya walawei-ho, manya walawaidikye.

Wa kiloshionyi wadumo

¹⁴ Numa wadamie ilya shelya, Yesu kakuloṟa nawo walya ikumi na umu Kawadedya mnu, ili walaidikye na ngoo tsawo ili tsi ntumhari walaidikye walya wawemembona ameṟuka.

¹⁵ Kawawia, “Kehendenyi wuyana kose, muongoye-pfo Mbonyi tso tsa Sia ko orio mndu.

¹⁶ Msa aidikye kapatiso, nechikiṟo, msa alaidikye, echiwonyo owingo.

¹⁷ Na shiṟingishyo sheimya iwo waidikye nyi shikeri shii-le, nyi kui rina lyako wefuna nalyo waṟufu wawicho, na ideda kui mdedie mhya.

¹⁸ Na mawoko hawo wechiira naho njoka, wakanyo kindo kyewaha kyechiwawutia ma kindopfo; walya wai mtengeṟi, wechiwahekya mawoko, nawo nyi wechisambuka.”

Yesu ado ruwehu

¹⁹ Na Mndumii Yesu amededa ado nawo, kairio huye ruwehu, kahenda idamya ora lo kulyo lo Ruwa.

²⁰ Na walya wa kiloshionyi wakahenda wakaongoya-pfo kose, Mndumii kechiwatarama na idedo lilya wahamba kaliwanza na shiṟingishyo shilya awainengye shewaimya.]