MARIKO 14 - Bibilia Kui Mdedie fo Kimochi

¹ Kuwetsuheṟe mfiri iwi kushike mfiri fo Pasaka na fo Mkate Ilantarang'ashe. Wakohanyi wanene wasanganyi na walosha wa wuwawaso wakapfula, chando wechimbada na mtambo, wambahe.

² Indi walehamba, “Lulambade mfiri fu mnenepfo kuwone kochiduka kituṟu kya wandu.”

Yesu ashio mafuda Betanyia

³ Kyasia Yesu nawekeri kulya Betanyia mba ko Simon ulya awewodo nyi iwawe. Adamye-ho kechilya shelya, kukacha mndu mka, umu arie chupa ya alabastron iwode mafuda hapfama ha nardo mecha ha wuhuru wung'anyi, kampusuya o mdonyi ko Yesu.

⁴ Na kukakaa-ho wandu mata, walesuo wechikuwesa, “A mafuda ho hadetsyo hado wanda nyi ha ki?

⁵ Hakawekumbo haweende dinari mahana haṟaṟu tseenenga wakiwa.” Wakafuluko wakapomya mka ulya.

⁶ Kyaindi Yesu kawawia, “Kemlekenyi, nki ili muiwinyishawinyisha mka chu? Nyi kindo kicha anjiwutya.

⁷ Kipfa wandu wakiwa mui nawo mfiri yose, mkakunda na moidima iwawutya necha, kyaindi kyako inyi mokaa na inyi mfiri yosepfo.

⁸ Nyi awuta, chando akuidimya; nyi asonguo ishimbwo mbihu foko ifuṟeheṟa fuhende iṟiko.

⁹ Na kya lohi ngambia, Orio kundu kose komeongoyo Mbonyi tso Njiicha wuyaneny kose, na kyake anjiwutye napfondo kyehambo, kundu nakumbuo-pfo.”

Yuda aidikia itwaṟa Yesu

¹⁰ Nao Yuda Iskariote ai umu o, walya ikumi na wawi kahenda ko wakohanyi wanene, kundo nadambike Yesu ipfo kowo.

¹¹ Wakohanyi wanene wekiicho wado wakachihio, wakamteṟya kyemenenga fesa. Yuda kawoka ipfula mfiri mcha fomdambika.

Yesu alya pasaka hamu na wa kiloshionyi kyake

¹² Mfiri fo kuwoka fo mfiri iya yelya Mkate Ilantarang'ashe, kiheri kyeshinja huṟuwi lya Pasaka, wa kiloshyo kyake wakambesa, “Nyi ku ukundi luhende isungusia-ho, lukulie-ho Pasaka?”

¹³ Yesu kaduma wa kiloshyonyi kyake wawi kawawia, “Kehendenyi ipfo mṟinyi na mokumbuhanana na mndu umu akudikye kinungu kya mṟinga muitumane nao.

¹⁴ Na mba mochiwona aida-napfo muwie menyi mba, ke Mlosha akuwia wai, ‘Nyi kiṟiha kihya lochikulia-pfo Pasaka so na wa kiloshyonyi kyako?’

¹⁵ Nao echimloṟa kiṟiha king'anyi kya ipfo kai ki kyale nguwo ki kisungusie nyihondo mochilusungusia.”

¹⁶ Wa kiloshyonyi wakakure wakahenda kulya mṟinyi, wakawona chando Yesu alewawia, wakasungusia mfuho fo Pasaka.

¹⁷ Ili kyukanyi, Yesu kacha na wa kiloshyonyi kyake walya ikumi na wawi.

¹⁸ Wai kiliiyonyi Yesu kahamba, “Na kya lohi ngambia, umu onu-ho, ailya na inyi, echinjidambika.”

¹⁹ Wa kiloshionyi kyake wakawoka isokyo nyi fowa na imbesa umu kui umu, “Ngesa nyi inyi?”

²⁰ Yesu kawawia, “Nyi umu onu nyo ikumi na wawi sa luikapa nao mkate kunu kitelenyi.

²¹ Nyi lohi Manomndu ihenda nyi ahenda, chando Madedo Maele hamaṟehie kyake, kyaindi ochia lo mndu ulya, echidambika Manachu o Mndu! Kiwei kicha, okoe mnduchu alalefeo.”

Kilayo kya Mndumii

²² Na ili wawelya shelya, Yesu kaira-ho mkate kaidapfuma Ruwa kafufunja, kawainengya wa kiloshionyi kyake kahamba, “Ngenyi ifu nyi mbihu foko.”

²³ Kawewada na kirahu kaana Ruwa kawainengya, wakanyoya-ho kirau kilya wose.

²⁴ Kawawia, “Iki nyi samu yako iṟingishia mkundano fo Ruwa; samu ikeri ipusuo kipfa kya wandu wafoi.

²⁵ Nyi kya lohi ngambia, ‘Njechikinyo-se kya ndunda tsa msabibusepfo, na njitane ngashika mfiri fulya, ilindi njechinyoyaho wuhya ipfo Wumanginyi wo Ruwa.’”

²⁶ Wameimba, wakahenda kulya Fumvunyi lya shidi sha Mtsinepfu.

Yesu ahamba chandu Petro echimkana

²⁷ Yesu kawia wa kiloshionyi kyake, “Mochiendyo wusutsu nyi inyi mose, kipfa ki kiṟehye kirehio kiele, ‘Njechikapa mlisi na machondi hawerahanyika.’

²⁸ Kyaindi ngamidima iṟuka, njechimsongoya, kulya Galilaya.”

²⁹ Petro kambia, “Ma kokoya wose waendyo wusutsu na ilekana na iyo, inyi njechilekana na iyo ma ntapfo.”

³⁰ Yesu kambia, “Nyi kya lohi ngakuwia, inu kio ki, olong'onyi lulamekapa kawi ochinjikana kaṟaṟu.”

³¹ Petro kaengeṟa ihamba, “Kiti njikukane na njipfe njisanzeo na iyo njechikuda-pfo.” Na wa kiloshionyi wakahamba wado wose.

Yesu aiterewa kulya Getisemane

³² Wakashika kyungunyi kii kiiṟihye kilaho Getisemane, Yesu kawia wa kiloshyonyi kyake, “Kedamyenyi iya, ili njikeri iterewa.”

³³ Nao kahenda arianyi na Petro na Yakobo na Yohane, kawoka iwuko mnu nyi madima na ieṟewe.

³⁴ Kawawia, “Mrima foko fuwodo mnu nyi fowa, ngakiṟa ipfa. Kyekaenyi ya muwelaa dembo.”

³⁵ Katikira mbele kitutu kaho wanda katerewa, kokoya na kyechikuwiia saa yo ya maturo imwidye.

³⁶ Kahamba, “Wande oko, ipfo kopfo shindo shose shechiidimika. Njiwutawo kirahu ki kya maturo Indi kilawe chando njikundi inyi kiwe chando iyo ukundi.”

³⁷ Kacha kakoya wa kiloshionyi walya waṟaṟu walee mado. Kawia Petro, “Simon, nyi ulee mado? Oidima ilaa dembo ma saa imu?”

³⁸ Kawawawia, “Kelaenyi dembo mbeterewa, mlashike iida kiheshonyi. Ngoo yo yako nyi injiṟamtsu, kyaindi nyama tsikalehela.”

³⁹ Kawuya ihendase katerewa kechihamba madedo halya halya.

⁴⁰ Kawuya kakoya walee-se mado; kipfa meso hawo hai malemie mado. Walamanye kindo wemhaluo.

⁴¹ Ili alewachea lya kaṟaṟu alewawia, “Nyi molaa mado na isia moo? Nahongu kyakushikya-ng'u, saa yamshika! Ambuya, Manomndu, aidambiko mawokonyi ha wanyamaṟi.

⁴² Kurenyi luhende, Ambuyenyi monjidambika a ichu aicha.”

Yesu ashio mawokonyi

⁴³ Yesu kekideda-se ado, nalyo liyenyi Yuda Iskariote nyio umu o walya ikumi na wawi, kacha arianyi na kituṟu kya wandu, warie njoshu na shiṟeta, wai wadume nyi wakohanyi wanene na walosha wa wuwawaso na wasongoru.

⁴⁴ Na Yuda mṟiingi ulya momdambika awewateṟye kichano, kehamba, “Ichu, njechimhekya momu nyio-ng'u; mumbade na imduo kiringonyi.”

⁴⁵ Adi Yuda kacha katikirya kufui na Yesu kambia, “Mlosha!” Kamhekia momu.

⁴⁶ Wandu walya wakamleshya mawoko wakawada Yesu.

⁴⁷ Umu o walya wahoṟoki-ho na Yesu, kasomuo oshu loke kakapa isinga lya mkohanyi mnene kamdumbuo kudu.

⁴⁸ Yesu kawawia, “Mowuka kanyi murie njoshu na shiṟeta mkacha injiwada, cha ili njii msoki?

⁴⁹ Orio mkonu njiwekeri konu ipfo hekalunyi njichilosha-ho, mlanjiwade. Wulalu kiwaṟi Shiṟehiyo Shiele shiinukye.”

⁵⁰ Nahong'u wa kiloshionyi wakamda wakadicha wose.

⁵¹ Kuwekeri-ho manake amwituma Yesu aṟee nguwo ya owiṟo alaṟee nguwo ya kya mba. Wakaheṟia imbada.

⁵² Nao kasheṟuka kada-ho nguwo yo ya owiṟo kadicha ai kitaṟe.

Yesu ai osehu lo mengenyi ya wameku

⁵³ Kyasia wakaduo Yesu kulya ko Mkohanyi Mnene, handu wakohanyi wanene na wasongoru na walosha wa wuwawaso wose wawesanzie.

⁵⁴ Petro kaitumana na Yesu, ai kuleshe, katana ashika alya osehu ko Mkohanyi ulya mnene kadamia-ho handu hamu na waringi kechioda modo.

⁵⁵ Nawo wakohanyi wanene na menge ya Sinedrio wose wakashihia Yesu owingo lo mbaha, walawone.

⁵⁶ Wandu wafoi wawekeri ihamba-ho njowingo tsa Yesu tsa wongo njowingo tsilya tsilasumhanane.

⁵⁷ Kukakure-pfo wandu wehamba owingo loke lo wongo wechihamba,

⁵⁸ “Luleicho kechihamba, ‘Njechisanja hekalu lyo li liwike na mawoko ha wandu njiwike lingi ko mfiri iṟaṟu lilaliwike na mawoko.’”

⁵⁹ Ma ili walehamba-ho wado ma shilasumhane shose.

⁶⁰ Naho Mkohanyi Mnene kahoṟoka o makidi hawi kawesa Yesu, “A nyi kiili kulahamba ma shehaluo ishi sha wandu wa wahamba-ho shekuwinga?”

⁶¹ Nao kakutsia sau, nalahaluo ma kindo. Mkohanyi Mnene kawuya imbesa-se kambia, “Iyo na ukeri Kristo, Mana o Ruwa ichu aidapfumo?”

⁶² Yesu kahamba, “Ee da inyi nyio. Nanyo mochiwona Manomndu adamye ipfo ora lo kulyo lo Menyi Pfinya, kechicha ipfo mapuchinyi ha ruwehu.”

⁶³ Mkohanyi Mnene karanduo kanzi yake kahamba, “Nyi kiki-se luipfula wehamba-ho shewinga?

⁶⁴ Na momicho kirumo kyake kyeruma Ruwa. Mokusaṟa muda?” Wakamkumbya owingo wose, kindo kimsumhanyi na opfu.

⁶⁵ Kyasia maata ho wakawoka imiselya mnyeri wakamshikia kyamu wakamkapa ngofi wachimbia, “Kehamba malasha nyiu akukapa!” Na walya wapfuṟukanyi-ho wakamwambya, wechimkapa ngofi.

Petro akana yesu

⁶⁶ Nahong'u Petro akeri-ho o seri osehu, kukacha mana o waka, akeri umu o shisinga sha Mkohanyi Mnene.

⁶⁷ Kawona Petro, kechioda modo, kamwambuya kambia, “Na iyo na kuwekeri na mndu cho Yesu o kulya Nasareti.”

⁶⁸ Nao Petro kakana, kechihamba, “Ma ngamemanya-pfo, ma njiichi kindo ohambapfo.” Petro kawuka-pfo, kahenda nja ya mbele. Olong'onyi lukakapa.

⁶⁹ Mana ulya o waka kisinga kawona-se Petro; kawoka-se lingi iwia walya wahoṟoki-ho, “Mndu-chu nyi umu o walya.”

⁷⁰ Petro kawuya ikana-se. Oweṟe kitutu walya wahoṟoki-ho wakawia Petro, “Nyi kya lohi ukeri umu o walya, kipfa ui Mgalilaya.”

⁷¹ Nao Petro kawoka ikusesa na ilya nyamu ke, “Njiichi mndu chu mumhambapfo.”

⁷² Nalyo lienyi olong'onyi lukakapa lya kawi. Petro kakumbuo idedo lilya, chando Yesu ambie, ke olongonyi lulamekapa kawi, ochinjikana kaṟaṟu. Petro katamuo-ho kalia mchenyeṟe.