MARIKO 13 - Bibilia Kui Mdedie fo Kimochi

¹ Yesu kechiwuka ipfo hekalunyi, umu o wa kiloshyonyi kyake kambia, “Mlosha, ambuya maho ho ha mba tso chando hai ha kiṟiha!”

² Nao Yesu kambia, “Kuwonyi mba tso tsing'anyi? Manya kokaa kudeo-ho iho likuhekye huya iho lingi lide lilawundwohopfo.”

Mawookyonyi ha wukiwa na maturo

³ Yesu adamie ipfo fumvu-hu lya shidi sha Mtsinepfu ai sumhana na Hekalu, Petro, Yakobo, Yohane na Andrea wakambesa kyanya,

⁴ “Keluwie-wo, mbonyi tso nyi tsekaa tsiwe indii? Na kiṟingishyo, ki kii kechiloṟo ili isho shose shichikaa shiwe?”

⁵ Nao Yesu kawoka iwawia, “Kyekuṟisenyi, mlawone mndu kyemlemba.

⁶ Koekaa kuche sa wafoi, wache kui rina lyako, wahambe, kye, ‘Inyi nyio!’ Wadetse wandu wafoi.

⁷ Mkaicho shida na mbonyi tsa shida, mlakangaṟike. Mbonyi-tso kiwaṟi tsiche, kyaindi masiyonyi hamecha-pfo.

⁸ Kipfa mkambo fumu fochikapana na mkambo fungi, umangi wukapane na umangi wungi. Orio handu kochicha shiding'ashi na njaa. Mbonyi-tso nyi cha okooṟa lo mana aifeo.”

⁹ “Na mkuṟise muwenyi. Wandu wechimdambika mengenyi ya Synedrion na mochikapo ipfo ma sinagogenyi. Mochidao oshangunyi lo wachili na wamangi, kipfa kyako, kundu munjiṟingishie kowo.

¹⁰ Indi kiwaṟi kuwoka Mbonyi tsa Sia tsiongoyo mbaṟinyi tsa wandu tsose.

¹¹ Nawo ili wechimduo wemdambike, mlawado makusaṟo chando mochideda, kyaindi nyi mochinengo kededa kiheri kyo kikamshika nyikyo mochihamba-ho, cha kipfa wededa-ho chi nyopfo nyi Mumuyo Mwele.

¹² Manomae o mndu nechitwaṟa mana o mae, na wana wa wandu waamkye wafee wawo na iwawaha.

¹³ Nanyo muwenyi mochisuika ko wandu wose kipfa kya rina lyako. Kyaindi ichu mokarishya-ho tane masiyonyi, nyio echikiṟo.”

Kiwi kya orumaro

¹⁴ “Mochiwona ‘Kiwi kya Orumatso’ kii alyando kilakundikie iwono.” (Ichu Mosoma namanye mdambuye!) “Nalyo iwo wai kunu Yudaya wahende dichya kulya mafumvuhu.

¹⁵ Na ichu echikoya ai ipfo mbehu, nalasoke-pfo, ma nalaide na mba koke ke ikuondoya-ho kindo.

¹⁶ Na ichu ekoya ai demenyi nalawuye na numa, ihenda kuondoya nguwo tsake tsa huye.

¹⁷ Ochia lo iwo wekoya nyi wakupfungye na iwo wekoya weonza mafiri ho!

¹⁸ Keterewenyi, kundu mbonyi tso tsilawutike kiheri kya mbeo.

¹⁹ Nyi kipfa mfiri yo kochikaapfo wukiwa wung'anyi sa wulalemewoneke kiwokia mawokenyi ha shindo sho shi shiwumbe nyi Ruwa shika mandi ha wulalu. Ma ili numa wochikiwoneka-se wudopfo.

²⁰ Na mafiri ho nokoe Mndumii alawechihaanguṟa, kuwechikiṟo mndu ma umu-pfo. Kyaindi nyi kipfa kya walya wa wasambuṟe, nyi kyondo Mndumii aleanguṟa mfiri-yo.”

²¹ “Nalyo mkakoya ma mndu kembia, ‘Kristo aichu kunu,’ ang'u, ‘a ulya alya.’ Nanyo ma mlaidikye.

²² Kipfa kochikure-pfo Wakristo wa wongo na waikimbi wa wongo na iwuta mawuto ha kiṟingishyo na ha kiṟiha, kundu watewe na walya Ruwa awasamburie, nokoe nyi kiwechiwa.

²³ Kyaindi nyo mkuṟise! Ngamsonguo imbia shose, ili shilamehoya.”

Icha lya Mana o Mndu

²⁴ “Nahong'u mafiri ho, kombona wukiwa wo womeida na mnengeṟi fochihaluka meema na meeri fochiloṟa ngela yafopfo.

²⁵ Na nyenyeri tsechiwa molokya tsiwuke ipfo ruwehu, na pfinya tsa ipfo ruwehu tsechisingitsosingitso.

²⁶ Mandi nalyo wawone Manomndu kechicha ipfo mapuchinyi ai na pfinya ing'anyi na wuitoṟi.

²⁷ Na numa echiduma wamalaika wake; na isanya walya wasambuṟe wewuka njora tsiina tsa oruka, kuwokia kishingonyi kya oruka tane kishingo kya ruwehu.”

Kiloshio kifananyi na mkuyu

²⁸ “Kuloshienyi mkuyunyi muwute-ho mfanano fu, Mkamkoya oṟuwe lofo luuwiriwiri lukadosa mambale, mkawuta-ho imanya nyi ipaṟika-ng'u kui.

²⁹ Nanyo na wudo, mkamewona isho shechiwutika, mumanye, ke Mana o Mndu nyi amshika kufui.

³⁰ Na kya lohi ngambia, ke mbaṟi i ya wandu ikeri-ho, yechisia manyale-pfo, na kutane isho shose shawutika.

³¹ Kulya ruwehu kukakye kunyamaṟike na kunu orukenyi, kyaindi madedo hako hechinyamaṟika manyale-pfo.”

Kuipfo msa aichi mfiri manya saa yopfo

³² “Kyaindi mfiri fo na saa iyo kuipfo mndu aichi mbonyi tsashopfo, ma wasu wa ipfo ruwehu manya o Mana, shile na Wande.

³³ Ambuyenyi muwekuṟisa na ilaa dembo kipfa mulaichi, indi kiheri kyo kyecha.

³⁴ Nyi cha ili mndu ahenda kyaṟo kuleshe kada mba yake kadambikya shisinga shake ipfo kanyi orio mndu na iṟunda lyake, kawawasa ulya moikalya mongo ke nalae dembo.

³⁵ Nahong'u mlae dembo kipfa mlaichi kiheri menyi mba echicha, kokoya nyi kyukany ang'u kio makidi hawi, ang'u kiheri kya aheṟa, ang'u ngamenyi otuko.

³⁶ Laenyi dembo ili echicha peṟeseng'u nalakoye mui madonyi.

³⁷ Kyaindi kindo ngambia nyo, ngawia wose, laenyi dembo!”