MARIKO 12 - Bibilia Kui Mdedie fo Kimochi

¹ Yesu kawoka ideda nawo kui mfanano, “Mndu aledonga dema lya msabibu kaliiṟihya na oṟiho kasumya-ho ipo lyekamya-ho mpfinyo, kawika-pfo kitaanga kyeringya kidoe huye. Kalinengya wademi, kahenda kyaṟonyi kya kuleshe.

² Na kiheri kya kilimu kadumya wademi walya isinga lyake kya mashido ha dema lilya.

³ Wademi walya wakambada wakamkapa wakamsama alarie kindo.

⁴ Kawuya iwadumya isinga lingi, ichu nao wakamkapa oo mdo na iminyala.

⁵ Menyi Dema kaduma ungi; nao wakambaha. Na wengi wafoi wengise waledumo, walya maata wakawakapa, walya mata wakawawaha.

⁶ Awewode-se manoke kimumu amkundi. Kafurumya mduma o kowo kechihamba, nyio manako wechimwowuo.

⁷ Kyaindi wademi walya wakawiana, Ichu nyio mwoṟi mooṟa-ho; lanye lumbahe, na kyoṟa kyo kyechiwa kyadu!”

⁸ Wakambada wakambaha wakamkumbalya kulya nja ya dema lya msabibu.

⁹ A menyi ulya o dema lya msabibu kindo echiwuta nyi kiki? Echicha narumatse wademi walya, na dema lilya lya msabibu nalinengye wandu wengi.

¹⁰ Ngesa mlawemesome shiṟehyo shi? “Iho lilya wewika mba waliminye nyi lyambuya iwa iho linene lya ndumbenyi?

¹¹ Mndumii nyio alewuta mbonyitsi, nyi tsa kiṟiha kunu mesonyi hadu.”

¹² Wakohanyi wanene, walosha wa mawawaso na wameku wakamanya ke mfanano-fu fowahoya. Wakaruwa kyama kyembada, indi wakaowuo kituṟu kilya kya wandu wakamda wakakuhendya kowo.

Iinengia Kaisari okamba

¹³ Wakaduma koke Wafarisayo na wa ko Herode maata ko Yesu kundu wamdehe na idedo lyake.

¹⁴ Wakacha wakambia, “Mlosha na luichi, ke iyo nyi ui mhendeli, mohamba sha lohi tupu, ma okesaṟa mndupfo. Nyi kipfa kulekeambuya fana ya mndu, ke nyi ida, kyaindi kowalosha njia ya Ruwa na ii ya lohi, Ngesa kisumhanyi iwikya Kaisari okamba ang'u ote? A ngesa lukawika ang'u lukada lulawika?”

¹⁵ Nao Yesu kekimanya ukulembetseṟi wowo kawawia, “Nyi kiili mocha njiseenga? Njiendie-nyi dinari, kundu njiiwone.”

¹⁶ Wakaende. Nao kawawia, “A mfano fu fukeri-pfo nyi fo u na kiṟehio ki?” Wakambia, “Nyi sha Kaisari.”

¹⁷ Yesu kawawia, “Keinengienyi Kaisari ishi shii sha Kaisari muweinengia Ruwa ishi shii sha Ruwa.” Wakiṟihio mnu kyake.

Mbonyi tsa iṟuka

¹⁸ Kyasia Wasadukayo wakacha na ko Yesu, wai wandu wehamba, ke nyi kulaipfo iṟuka, wakambesa wehamba,

¹⁹ “Mlosha, Mose nyi aluṟehye kye, ‘Mndu kapfa kada mka, alade mana, manomae kimbaṟi naduo mka chu mkusu, nawonye manomae ulya apfie luwa.

²⁰ Kyasia kuwekeri wana wa mka mfungade; ulya o kuwoka kaduo mka, kapfa, nalade mana.’

²¹ Na ulya o kawi kamduo mka ulya mkusu kawepfa, alafee mana. Na ulya kaṟaṟu na wudo.

²² Nawo wose mfungade wakapfa walafee wana. Lyefurumia mka ulya mkusu kapfa.

²³ Ili kochishika iya maṟukyenyi mka-chu, nyi echiwa o u ipfo kiidi kyawo? Kifa wose mfungade wawemwalikie?”

²⁴ Yesu kawawia, “Modeko, mnu cha kipfa mlaichi Madedo ho Maele ma pfinya ya Ruwa.

²⁵ Kipfa ili wapfu weṟuka wapfunyi, wechialikapfo manya yalikopfo, kyaindi wechiwa cha wamalaika wa ipfo ruwehu.

²⁶ Kyaindi kya maṟukyenyi ha iwo wapfiiye a nyi mulasomie kyawo ipfo kitapunyi kya Mose ipfo ko osha lulya luweiaka modo? Ruwa kawia Mose, ‘Inyi nyio Ruwa o Abrahamu na Ruwa o Isaki na Ruwa o Yakobo?’

²⁷ Ruwa chi akeri o wapfupfo, chila na o iwo wai na moo. Nyo modeko mnu.”

Iwawaso lying'anyi

²⁸ Naho umu o walosha wa wuwawaso kasembelia kufui nawo kaadanya, chando waiwesana. Kekiwona Yesu awahalwo necha, kambesa, “A iwawaso inene liidye hose nyi lihya?”

²⁹ Yesu kahalwo kye, “Lilya inene nyi ili, Israeli keadanya, Mndumii-Ruwa chu odu nyi akeri Mndumii umu amonyi.

³⁰ Kunda Mndumii-Ruwa opfo na ngoo yapfo yose, na mrima fopfo fose, na mahio hapfo hose, na pfinya yapfo yose.”

³¹ Lilya lya kawi nyi ili, “Kunda mndu o mṟasa opfo, chando okukundi kumony. Kuwode iwawaso lingi liidye ihapfo.”

³² Mlosha ulya o wuwawaso kambia, “Na necha, mlosha, nodeda kya sungusihu, ke Ruwa nyi umu, kulakeri ungi shila nyio.

³³ Na kiwaṟi imkunda Ruwa na ngoo yose, na wuṟango wose, na pfinya yose, na ikunda mndu o mṟasa, opfo chando ukukundi kumonyi. Ikyo ki kicha na kamu kiidye shidaso shilya shekoṟo na shilya shingi shose shemaya modonyi.”

³⁴ Nao Yesu kekiwona ke mndu ulya nahaluo kui wuṟango, kambia, “Ukeri kuleshe na wumangi wo Ruwapfo.” Nahong'u kulakae ma mndu alekarya-se imbesa kindo.

Mbonyi tsa Mesia

³⁵ Yesu kechilosha ipfo Hekalunyi kawesa, “A nyi wuda, ili walosha wa Wuwawaso wahamba, ke Kristo nyi akeri mana o Dawidi?

³⁶ O Dawidi amonyi kahamba awodo nyi Mumuyo Mwele, ‘Mndumii alewia Mndumii oko, Kedamya kunu ora loko lo kulyo, na inyi njitane ngawika wakituwa wapfo wawe shi ya madende hapfo.’

³⁷ Dawidi amonyi nyi amlahye, ‘Kristo nyi Mndumii,’ nyi wuda Kristo ai mana oke?” Na kituṟu kilya kya wandu kinganyi kikamadanya na sia.

Yesu aikimba wandu kya mbonyi tsa walosha wa mawawaso

³⁸ Naho ipfo kiloshyonyi kyake Yesu kahamba, “Kekuṟisenyi na walosha wa wuwawaso, sa wakundi ichumia waṟee ikonya lya mkuruo na iiṟikiṟo ipfo tumo, wakundi iidaida na idamya shidembo sha kusonguo ipfo masinagogenyi.

³⁹ Na handu hedamya ha kusonguo, ili wa walahye shelya.

⁴⁰ Nyiwo wekelya mba ko waka wakusu na imaa, wechiterewa kui madedo hafoi kui ikulembetseṟa. Iwo nyiwo wechikaa wawonyo owingo lung'anyi kya ngoseṟa mkonu fulya fo mwanduye.”

Mwano fo mka mkusu

⁴¹ Yesu Kadamya sumhana na kisoṟo kesanya mapesa. Kaambuya chando wandu wafoi waiwika mapesa ipfo kisoṟonyi. Kya Hekalunyi Wasuṟi wafoi wakawika-pfo pesa tsifoi.

⁴² Kukacha mka umu mkusu, ai mkiwa, kawikapfo senti tsiwi tsashika heleri tsitanu.

⁴³ Yesu kalaha wa kiloshyonyi kyake kawawia, “Nyi kya lohi ngambia, ke mka chu mkiwa na mkusu ambika shifoi kota wose wawika ipfo kisoṟonyi.

⁴⁴ Kyamba wose wawikye kya shilya shiwatsuhae, kyaindi mka-chu kaende sha wukiwa woke kalekia shilya awode shose, nyi shake shose shetolia moo.”