MARIKO 11 - Bibilia Kui Mdedie fo Kimochi

¹ Kyasia wekiafukya kufui na kulya Yerusalemu waleshika Betifage na Betanyia, kukeri alya Fumvunyi lya mashindi ha Mtsinepfu. Kaduma wa kiloshyonyi kyake wawi-ho.

² Kawawia, “Hendenyi kulya mṟinyi fukeri mambatsana na iya handu mui. Mochiida napfo mdi mochiwona ihache lya nzoi li-pfunge handu lilalemewawe mndu manya limu. Lyipfunguo-ho mliende.

³ Na koka mndu kechimuwesa, ‘Nkili mowika mdo?’ Mumbie, ‘Mndumii alikundi, na oweṟe nechiliwihiṟa na iya.’”

⁴ Wakahenda wakawona ihache lilya lya nzoi lipfunge oo mongonyi kya nja kulya njienyi. Wakalipfunguo-ho.

⁵ Na walya wahoṟoki-ho maata-ho wakawawia, “Nkili muipfunguo ihache lyi lya nzoi?”

⁶ Wa kiloshionyi wakawawia, chando Yesu awehambye. Nawo wakawalekya.

⁷ Wakaende ihache lyo lya nzoi na ko Yesu wakalihekya nguwo tsawo tsa huye, nao Yesu kadamya-ho.

⁸ Wandu Wafoi wakaala nguwo tsawo tsa huye ipfo njienyi, wengi wakaala-ho masahawa, walehamanya ipfo mademenyi.

⁹ Na walya wamsongoe na walya waituma numa wakafunja ngahai wechihamba, “Ruwa naichiko!” “Nawone ona ichu mocha ku rina lya Mndumii!

¹⁰ Kuwewona ona na wumangi wo ndee yadu Dawidi, ili wuicha! Ruwa naṟumisho kulya huye ruwehu!”

¹¹ Nao Yesu kaida na mṟinyi fo Yerusalemu kahenda ipfo hekalunyi kaambuya-pfo Woṟisa orio kindo. Kyaindi kipfa kuwemeila kahenda Betanyia arianyi na walya ikumi na wawi.

Yesu asesa mkuyu

¹² Kyasia ili lya ngama wekiwuka ipfo Betanyia, Yesu kaicho njaa.

¹³ Kawona mkuyu ai aleshe, fuwode mambale hafoi. Kacha, ke kulako kyechiwona-pfo ndunda; Amcha afui alawone-pfo manya ndunda shila mambale tupu. Kipfa kulawei kiheri kya ndunda tsa mkuyu.

¹⁴ Kahalwo kafuwia, “Kuipfo mndu echilya-se ndunda tsapfo manya indiipfo.” Wa kiloshyonyi kyake wakaicho madedoho ha Yesu.

Yesu aida na Hekalunyi

¹⁵ Naho wakacha na Yerusalemu. Yesu amida na ipfo hekalunyi, kawoka ifunyia nja walya wekumba na wehuṟa wai ipfo hekalunyi kapfuluo na shitaṟa sha weilacha pesa na shidi shedamya sha wekumba mbeta.

¹⁶ Nalade ma mndu, naduo kindo awuka ipfo hekalunyi.

¹⁷ Kalosha kawawia, “Ki kiṟehye, ke mba yako nyi yeterewia kipfa kya wandu wa mbaṟi tose. Nanyo mkawuya iihaluo opanga lo wandu wasoki.”

¹⁸ Wakohanyi wanene wakaiicho iki na walosha wa wuwawaso wakakusaṟa, chando wechimdetsa. Indi walemwowuo, kipfa kituṟu kya wandu kyose kileṟihio kya mloshye foke.

¹⁹ Nahong'u komeila, Yesu na wa kiloshionyi wakawuka kulya mṟinyi.

Kiloshio kya mkuyu fuleuma

²⁰ Kyasia wekiida-ho ngamenyi, otuko, wakawona mkuyu fulya fomeuma fose tane mṟinyi.

²¹ Petro kakumbuo kawia Yesu, “Mlosha, ambuya! Mkuyu fulya kulefusesa fomeuma.”

²² Yesu kahalwo kawawia, “Idikienyi Ruwa.

²³ Nyi kya lohi ngambia, ke mndu kawia ifumvu li, kyekuṟuka, ukukumbe kulya ipalyipalyinyi, alawado nyi mkeukeu ipfo ngoonyi yake, kyaindi kaidikya kilya ahamba na kyewutika, na echiwona kyechiwa.

²⁴ Nahong'u ngambia, orio shindo shose mochiterewa na yomba, keidikyenyi, ke momambya, na mochishiinengo.

²⁵ Na ili mohoṟoka iterewa, kehoṟyenyi orio mndu, koka muwode kindo na mndu, kundu na Nde yanu o ipfo ruwehu namhoṟye madeko hanu. [

²⁶ Indi nyo mkada mulahoṟya wengi na Ndeyanu o ipfo ruwehu echimhoṟya ma madeko hanupfo.]”

Mbonyi tsa pfinya ya Yesu

²⁷ Wakacha-se na Yerusalemu. Yesu Kechichumya ipfo hekalunyi, wakohanyi wanene na walosha wa wuwawaso na wasongoru wa wandu wakamchea.

²⁸ Wakammbesa, “A pfinya owuta nayo shindo sho nyi ida? Na ichu akuinengye pfinya yo, kundu nowute isho nyi u?”

²⁹ Nao Yesu kawawia, “Njimuwesa kidedo kimu; mkanjihaluo na njechimbia, pfinya ii ngawuta nayo shindo shi nyiida.

³⁰ Pfinya ya Yohane Mpatisi yepatisa iwewukye ruwehu ngesa ang'u nyi ko wandu? Kenjihaluonyi.”

³¹ Wakawesana wo wenyi na wenyi wehamba, “Lukaahamba, nyi ruwehu, nyi echihamba, nyi kilewa-ng'u kida, ili mlalemwidikia?

³² Lukaahamba, nyi ko wandu?” (Nyi waweowoe kituṟu kilya kya wandu; kipfa wose waleidikia ke Yohane awei mwikimbi o lohi.)

³³ Wakahaluo Yesu wehamba, “Luichipfo.” Nao Yesu kawawia, “Ma inyi njembia pfinya ngawuta nayo shindo sho ke nyi ya wupfo.”