MARIKO 10 - Bibilia Kui Mdedie fo Kimochi

¹ Nahong'u Yesu kakure-ho kacha na kulya shihongonyi sha Yudaya na kulya mataya ya meda fo Yordani. Kituṟu kya wandu kikamchease kawalosha, chando aweichiwie.

² Wafarisayo wakacha na koke wakambesa, wechimhesha, “Na kisumhanyi mndu nalekane na mka oke?”

³ Yesu kawahalwo kawawia, “Kilya Mose amuwawasye nyi kiki?”

⁴ Nawo wakahamba, “Mose aleinenga momu mndu msoṟo nalekane na mka oke na imṟehia paruo yemsama.”

⁵ Yesu kawawia, “Mose alemuinenga iwawaso lyo kipfa kya wuumu wo mrima yanu.

⁶ Kya indi wokia mawokyonyi, Ruwa nalewumba mndu msoṟo na mndu mka.

⁷ Ko ikyo msoṟo nechilekana na ndee na mae, nalungane na mka oke,

⁸ nawo wawawi wechiwa mbihu fumu. Wechiwa-se wawi-pfo indi nyi mbihu fumu.

⁹ Kyasia-ng'u ikyo Ruwa amekisanza, mndu o wandu nalakiletsane.”

¹⁰ Wameidase na ipfo mba walya wa kiloshyonyi wakambesa kya kindo kyo.

¹¹ Nao kawawia, “Ichu alekana na mkoke kaalika ungi, nyi aṟuhuya kamdekyo.

¹² Na mka kalekana na mii oke kahenda yaliko nyi uingi nyi aṟuhuyo.”

Yesu awikia wana ona

¹³ Kyasia wandu wakaende shiwana na ko Yesu, kundu nashipaye. Walya wa kiloshyonyi wakatukya walya washirie.

¹⁴ Yesu kekiwona ado, kasungulula kawawia, “Kelekenyi shiwana shikucheye na koko, ma mlashiime; cha kipfa wandu wado chasho nyiwo Wumangi wo Ruwa woewa wowo.

¹⁵ Nyi kya lohi ngambia. Mndu ada alaambya wumangi wo Ruwa ai cha kimana, echiida naho-pfo.”

¹⁶ Kawachunguṟya kawahekia mawoko kawawikya ona.

Mndu awei msuṟi

¹⁷ Kyasia Yesu ambuka-pfo ashikie njienyi, mndu kakambia na koke kampfirya ndi kambesa, “Ui mlosha mcha, kindo njechiwuta, kundu njioṟe moo fo mlungana nyi kiki?”

¹⁸ Na Yesu kambia, “Nyikili onjilaha njii mcha? Kuwode mchapfo shila umu, nyi Ruwa amonyi.

¹⁹ Mawawaso na uhaichi, Kulaṟuhuye, Kulawahe, Kulaiwe, Kulairie mndu sha wongo, Kulasoke mndu kya pfinya, India ndeo na mayo.”

²⁰ Nao kambia, “Mlosha, kyaho hose njihainutsie wokia wututu woko.”

²¹ Yesu kamambuya kamkunda kambia, “Utsuheṟe kindo kimu, kehenda nokumbe isho uwode noenengye wakiwa, naho ochiwada kisa kya shindo shifoi ipfo ruwehu. Komidima, uche oshana na inyi.”

²² Nao ameicho ado kakuinadia kakuhendya awodo nyi fowa kipfa awewode masaa hafoi.

²³ Yesu kaṟengutsya meso kaambuya njora tsose kewia wa kiloshyonyi kyake, “Ambuyenyi, chando kilemye, wasuṟi waide na ipfo wumanginyi wo Ruwa!”

²⁴ Walya wa kiloshyonyi wakaṟihyo kya madedo halya hake. Na Yesu kawawia-se, “Wana wako nkikiumu mnu iida na ipfo Wumanginyi wo Ruwa.

²⁵ Kyangu-ho nyi ngamia ide na ṟochenyi lya sindano, kota mndu msuṟi naide na ipfo Wumanginyi wo Ruwa.”

²⁶ Wakiloshionyi kyake wakaṟihio mnu wakawesana wo wenyi na wenyi, “A mndu echiidima ikiṟo nyi u?”

²⁷ Yesu kawahaluya meso kawawia, “Kunu ko wandu nyi kindo kilechiidimika kyaindi ko Ruwa chi wudopfo, kipfa ko Ruwa shose shechiidimika.”

²⁸ Petro kambia, “A so nyi wuda? Ludeye shose lukaoshana na iyo.”

²⁹ Yesu kahamba, “Na kya lohi ngambia, orio mndu adeye ma mba ma wana wa mae ma washiki, ma mae, ma ndeye, ma mdemi kipfa kyako na kipfa kya Mbonyi tso Njicha.

³⁰ Kiheri ki kya wulalu elekaa nawihiṟyo ka ihana ngoseṟa mba na wana wa mae, na washiki, na mae, na mdemi, na wana, handu hamu na matuuro, na mfiri yechicha nawewona moo fo mlungana.

³¹ Kyaindi wafoi wasonguo nyi wechiwa wafurumi na iwo wafurumi wawewa wasongoru.”

Yesu ahamba lya kaṟaṟu kya ipfa na iṟuka lyake

³² Naho wakeri njienyi wechido na Yerusalemu, nao Yesu nawewasongoye Wa kiloshionyi kyake wawewaowu, wandu wakamituma wechiowuo. Yesu kaduose kyanya walya ikumi na wawi, kawoka iwawia shilya shekaa shimhoye,

³³ “Adanyienyi, lukeri ido na Yerusalemu, na Manomndu echidambikyo wakohanyi wanene na walosha wa wuwawaso, nawo wambutye owingo lo opfu wawehenda mdambikya ko wandu wa mbaṟi njiehenu.

³⁴ Nawo wamtaluo na imselya mnyeri wawemkapa na ngowa tsi ntochye msha, na iwaha, wechimbaha. Na ili mfiri fo kaṟaṟu nyi echiṟuka.”

Kiterewo kya Yakobo na Yohane

³⁵ Yakobo na Yohane wana wa Sebedayo wakamsembelya kufui wakambia, “Mlosha, lukundi uluwutye, chando lochikuterewa.”

³⁶ Nao Yesu kawawia, “Kindo mokunda njimbutye nyi kiki?”

³⁷ Wakambia, “Uluenenge, momu ludamie umu ora lopfo lo kulyo na ungi ora lopfo lo kumoso ipfo wusuṟinyi wopfo.”

³⁸ Nao Yesu kawawia, “Muichi kindo muiterewapfo. Ngesa lohi na moidima inyo kirahu kya matuuro njechikunyoya inyi ang'u ipatiso chandu inyi; njechipatiso?”

³⁹ Wakambia, “Na loidima.” Yesu kawawia, “Kirahu ikyo njechinyo inyi, nanyo mochinyo, na mochipatiso chandu inyi njilepatiso.

⁴⁰ Kyaindi idamya ora loko lo kulyo na lo kumoso kyalyo chi iṟunda lyako inyi lyeinenga mndupfo, kyaindi weinengo walya wai wateseheṟye.”

⁴¹ Naho walya ikumi wekiicho isho wakawoka ipfuluko kya Yakobo na Yohane.

⁴² Yesu kawalaha kawawia, “Muichi, ke walya watano mangi tsa wandu wa masanga nyi wawaitoṟye kui wuapfinya na iwo wanene wakawaapfinyia.

⁴³ Kyaindi kunu konu kilawe kido. Indi sa akundi iwa mnene kidi kyanu, kimbaṟi nawe mṟundi onu.

⁴⁴ Na msa akundi iwa mosongoru kiidi kyanu, nyi kimbaṟi nawe isinga lya wose.

⁴⁵ Kipfa na Manomndu acheye ipfuṟukanyopfo, kyaindi kundu napfuṟukane nawelekia moo foke fuwe ndalai yetalaa wandu wafoi.”

Yesu achiṟa kipfupfuṟe elaho Bartimayo

⁴⁶ Wakashika Yeriko. Na ili wewuka kulya Yeriko Yesu na wa kiloshionyi kyake na kituṟu kya wandu king'anyi; kipfupfuṟe Bartimayo mana o Timayo adamye oo mbai ya njia, echyeṟeṟya wandu.

⁴⁷ Kyekiicho nyi Yesu o Nasareti aiida-ho kawoka ikoṟoṟoma na ihamba, “Yesu u Mana o Dawidi, Kenjisaṟia-wo!”

⁴⁸ Wandu wafoi wakamdedya kundu nakutsie; kyaindi o kaengeṟa mnu ikoṟoṟoma, “Mana o Dawidi, kenjisaṟiawo!”

⁴⁹ Yesu katirima-ho kahamba, “Kemlahenyi.” Wakalaha kipfupfuṟe ulya wechimbia, “Kyewuuyo nyi moo! Kure, nyi akulaha.”

⁵⁰ Nao kakumba nguwo tsake tsa huye katsung'tsuwuka kachea Yesu.

⁵¹ Yesu kambesa, “Kindo ukundi njikwutye nyi iki?” Kipfupfuṟe ulya kambia, “Mlosha ngaterewa njiidime-se iambuo.”

⁵² Nao Yesu kambia, “Kuhendye, idikya lyapfo lyamekukiṟa.” Nalyo liyenyi kaambwo kaitumana na Yesu orio handu.