MARIKO 1 - Bibilia Kui Mdedie fo Kimochi

Mwongoye fo Yohane Mpatisi

¹ Mawokionyi ha Ndumi ya Sia ya Yesu Kristo Mana o Ruwa.

² Chando ki kiṟehie ko mwikimbi Yesaya, “Ambuya njekaa njidume msu oko mosonguo oshangunyi lopfo, nao nakuekye sungusia njia yapfo.”

³ Ṟu lya mndu moedia kundo ko nuka, “Keachikienyi njia ya Mndumii mbedamiṟa na njomongo tsake.”

⁴ Kulewoneka Yohane Mpatisi kechipatisa kundo ko nuka na ionguo wupatiso wodumbuya, kundu Ruwa nawahoṟie njonyamaṟo tsawo.

⁵ Wakamhendia wandu wose wa isangenyi lyose lya Yudaya na Wa Yerusalemu wose wakapatiso nyio alya medenyi fo Yordani, wechitocha njonyamaṟo tsawo.

⁶ Nao Yohane aweṟee nguwo ya mafafuta ha ngamia na ngometa ya njonyi oo kitsinyi kyake, echilya nzihe na wuki wo mbakonyi.

⁷ Kaonguo kahamba, “Kuicha mndu numa yako sa anjing'anye, sa njilasumuhanye njiarame ipfunguo ngowa tsa shadu shake.

⁸ Inyi njilemupatisa na mṟinga, kya indi o nyi echimupatisa na Mumuyo Mwele.”

Ipatiso na ihesho lya Yesu

⁹ Kyasia na mfiri iya Yesu kacha awuka kulya Nasareti ya kulya Galilaya kapatiso nyi Yohane medenyi fo Yordani.

¹⁰ Nalyo liyenyi kechido alya mṟingenyi, kawona ruwehu kochiṟuhuka, nao Mumuyo kechimsokya cha mbeta.

¹¹ Ṟu likacha ruwehu likahamba, “Iyo nyi ui manoko mkunde, sa ngachihyo kyake.”

¹² Naho kudi Mumuyo kamduo kundo ko nuka.

¹³ Kakaa kulya nuka mkonu makumi haana, kechihesho nyi Satana, akeri-pfo na mando ha nuka, wamalaika wakawa mompfuṟukanya.

Yesu alaha wadehi waana

¹⁴ Kyasia Yohane amhenda ikumbo kipfungonyi, Yesu kacha na Galilaya, kechionguo Mbonyi Njicha ya Ruwa.

¹⁵ Kahamba, “Ke kiheri kyamcha, na wumangi wo Ruwa womeafukya kufui. Kedumbuyenyi mbeidikya Mbonyi tso Njicha.”

¹⁶ Kyasia kechiida mawambao ha nduwa iya ya Galilaya kawona wadehi wawi, Simon na Andrea manomae wechiolotsa mdeho wadehe makunga.

¹⁷ Yesu kawawia, “Kenjonyi, mche ioshana na inyi na inyi mbemhaluo muwe wadehi wedeha wandu.”

¹⁸ Wadi wakadaho mdeho iya yawo wakaoshana nao.

¹⁹ Naho kahendahenda kitutu kawewona Yakobo na Yohane; wana wa Sebedayo, wakeri alya ngalawenyi yawo, wechisungusia mdeho iya yawo.

²⁰ Nalyo kudi Yesu kawalaha; wakada ndeeyawo Sebedayo, ai ipfo ngalawenyi handu hamu na waekelei wakawuka-pfo wakaoshana nao.

Mndu awodo nyi mṟufu fo ngafu

²¹ Wakashika mṟinyi fo Kapernaumu; nalyo liyenyi kawoka ilosha mfiri fo Sabato ipfo sinagogenyi.

²² Wandu wose waimwadanyia wakawa mkahai kya mloshye fulya foke; kipfa, chando ailosha, kikawa cha kya mndu awode chila, kilawe cha kya walosha wa wuwawaso.

²³ Nalyo liyenyi kukacha naho mndu awodo nyi mṟufu o ngafu acha na sinagogenyi yawo kafihiṟa.

²⁴ Kahamba, “Uwode-ki naso iyo, Yesu Mnasareti? Nyi ucheye nolurumatse? Lukauichi iyo nyio u, nyi ui Mwele o Ruwa.”

²⁵ Yesu kamtoloma, “Tsia-ng'u, nombuke mundu-chu!”

²⁶ Mṟufu fulya fo ngafu fukamrakwo-rakwo kafihiṟa na ṟu ling'anyi fukambuka.

²⁷ Wandu wose wakaṟihyo wewesana wechihamba, “Ikyo nyi kiki? A ifu mloshye mhya? Mndu-chu nawode pfinya! Na waṟufu wa ngafu awawawasa, nawo wakamwidikya.”

²⁸ Nahong'u mbonyi tsa Yesu tsikadung'ana owinyi kulya orukenyi lo Galilaya kose.

Yesu achiṟa wandu wafoi

²⁹ Wamewuka ipfo sinagogenyi wadi wakahenda ipfo mba ko Simoni na Andrea warianyi na Yakobo na Yohane.

³⁰ Kyasia mamka o Simoni awelee kitaṟenyi awodo nyi modo, wadi wakambia kyake.

³¹ Yesu katikiria afui kamhoṟotsa kechimbada owoko, modo fukamlekya kawapfuṟukanya.

³² Kyasia ili kyukanyi mnengeṟi fochiolokya, wakamendye Yesu wandu wose wakeri iwawyo na sa wawodo nyi waṟufu wawicho.

³³ Wandu wose wa mṟi fulya wakakuumbia alya mongonyi.

³⁴ Yesu kachiṟa wafoi waweluo ndaṟe tsifoi kafuna waṟufu wawicho wafoi, nalawaleke wededa, nyi kipfa wawemwichi ke nyiu.

Yesu aionguo mbonyi Galilaya

³⁵ Kyasia ili lya ngama ngamenyi kilahala kilamedo kawuka-pfo kahenda handu ha kiseekenyi katerewia-pfo.

³⁶ Simoni hamu na wodoe walya wengi wakamwosha.

³⁷ Wekimbona wakambia, “Orio mndu naikupfula.”

³⁸ Yesu kawawia, “Ndenyi luhende mṟinyi ingi ya ipfo mṟasenyi kundu njiwe moonguo pfo mbonyi, cha kipfa kindo kienengye ngacha na ikyo.”

³⁹ Nahong'u kacha na Galilaya kechionguo ipfo masinagonyi hawo hose na ifuna waṟufu wawicho.

Yesu achiṟa mndu awodo nyi iwawe

⁴⁰ Mndu umu awodo nyi iwawe kachea Yesu kamterewa kechimolokya ndenyi kambia, “Kokukundya, nochiidima njiheṟemtsa.”

⁴¹ Yesu Kamichyo wukiwa kahoṟuo owoko loke kampaya kahamba, “Na njikundi, heṟemka-ng'u!”

⁴² Nalyo liyenyi iwawe lilya lyikambuka kaheṟemtso.

⁴³ Yesu kamkekedya adi kamfuna kambawasa,

⁴⁴ “Ambuya kalawie ma mndu ma kindo, kya indi henda kuloṟe kulya ko mkohanyi nowewika mwano kya iheṟemtso lyapfo chando Mose awawasie shiwe kiṟingishyo kowo ke omechia.”

⁴⁵ Kya indi mndu ulya kawuka-pfo kawoka yonguo kafoi na idung'anyitsa mbonyi tso, orio handu, Yesu alaidime-se iida na mṟinyi na pata, kya indi kakaa hando ha nuka. Ma kudo wandu wakacha na hando ai wakuwukye njora tsose.