MALAKI 2 - Bibilia Kui Mdedie fo Kimochi

¹ “Wulalu nyo wakohanyi, iwawaso lyanu nyi ili.

² Kokoya mulakundi iicho, na kokoya mulakundi iwika mrimenyi yanu, kundu mung'anyishe rina lyako Mndumii menyi Matoṟito ahamba, njechimudikia oseso, njechisesa mboṟa tsanu. Njilemaa isesa kipfa mulekunda iindia mawawaso woko pfo.

³ Ambuyenyi mochisambuopfo. Njechishia shamu shanu sari ya shidaso mochisanzo nayo naikumbo kuleshe.

⁴ Nanyo mochimanya ke njimudikie iwawaso li, kundu mkundana foko fukae ko Lewi, kitsitsi, Mndumii menyi Matoṟito ahamba.

⁵ “Mkundana foko nao fuwei fo moo na ofoṟo, na inyi njilemuinenga kundu nanjiowuo, nao kawuta ado na iindia rina lyako.

⁶ Wuwawaso wo lohi wuwei dumbunyi lyake, madedo ha wukika halewono dumbunyi lyakepfo; naleoshana na inyi kiidi kya ofoṟo na wuhoṟotsu, kawehalutsa wafoi wakada wuwicho.

⁷ Kiwaṟi dumbu lya mkohanyi liwade wuṟango, wandu washihe wuwawaso dumbunyi lyake kipfa o nyi mngochi o Ruwa.

⁸ “Ambuyenyi wulalu momehaluka mukada njia iwaṟi; mosuiṟa wafoi iwawasonyi, mukanyamaṟa mkundana fo Lewi, Mndumii menyi Matoṟito ahamba.

⁹ Kui kipfa kya ikyo inyi nyi njechimhaluo muwe kindo kimine na kifari oshangunyi lo wandu wose, chando nyo mulekeindia njia tsako, mukakundia wandu wuwawasonyi.”

Wandu wakeri wahendeli ko Ruwa-pfo

¹⁰ Alewo! So lose luwode Wande umu? Ruwa chu moluumba chi umu tupu? Kyawa se kida ili orio mndu awutia manomae mbonyi tsilawaṟi? Lochifanyisa ngafu mkundana fo ndeadu?

¹¹ Yuda kawuta shilawaṟi, na wuwicho wukawutika ko Israeli, na Yerusalemu; kipfa Yuda naleterefutsa wuele wo Mndumii awukundi, kaalika wana wa wandu wekeindia maruwa mahenu.

¹² Mndumii nechifuna mowuta isho, icho aicho, na ichu mohaluo, nechimfuna nawuke mbenyi ya Yakobo, na nechifuna na icho mowuta kidaso ko Mndumii menyi Matoṟito.

¹³ Ngoseṟa nyo muwuta isho, mukashikia kitaṟa kya Mndumii kui mchenyeṟe, na ifuha ling'anyi, nalaidime ma iwona kidaso kyo, nalakiambie mawokonyi hanu na ichihiyo kyayo.

¹⁴ Indi nyo mukahamba, “Kipfa kya iki atsileha?” Mndumii-Ruwa natsileha kipfa naichi na kamu ke nulefunja kyaasa kyapfo na mka o uwanake wopfo. Notuṟa wuhendeli koke ma chandu ulewika kyasa ko Ruwa ke nuwechiwa mhendeli koke.

¹⁵ Aka Mndumii alemutana nyo muwawi muwe mbihu fumu na mrima fumu? Nawekusaṟie ada ili alewuta ado? Kofia nawekundi lufee wana wemindia. Kuṟisenyi mnu na mrima fose, alakoyo mndu ma umu alawode wuhendeli ko mka oke o uwanakenyi woke.

¹⁶ “Inyi njisuo ilekana,” Mndumii-Ruwa o Israeli ahamba, “Orio mndu nawe mhendeli ko mka oke.” Mndumii menyi Matoṟito ahamba, “Nahong'u kuṟisenyi mrima yanu; mamulawute shindo shilawaṟi.”

Mkonu foanduya fukeri kufui

¹⁷ Molisa Mndumii wukiwa kui madedo hanu. Indi nyo muihamba, “Lokulisa wukiwa na madedo maki?” Kipfa muihamba, orio mowuta mawicho nyi ai mcha ko Mndumii, nao nyi amchihie kyawo, ang'u, “Ruwa moanduo kyawo nku ai?”