MAITALA 9 - Bibilia Kui Mdedie fo Kimochi

Pasaka ya kawi

¹ Kushikie meri fo kuwoka fo maka fo kawi Waisraeli wamewuka Misri, Mndumii-Ruwa nalededa na Mose kulya nuka ya Sinai. Kammbia,

² “Kiwaṟi Waisraeli wawike mkonu mnene fo Pasaka kiheri kikiachikie.

³ Fochiwa mfiri fo ikumi na kaana fo merifu; wechiwuta wado kiheri kya kyukanyi, chandu kiwaṟi mawawaso hakyo hose.”

⁴ Koikyo, Mose kawia wandu chandu kiwaṟi iindia Pasaka.

⁵ Nahong'u wakaachikia Pasaka kyukanyi, mfiri fo ikumi na kaana fo meri fo kuwoka, kulya nuka ya Sinai. Waisraeli walewuta shilya shose chandu Mndumii-Ruwa alewawasa Mose.

⁶ Kyaindi wandu maata waweiho waleidima ichihio lya mkonu mnene fo Pasakapfo kipfa wawemepaya mnying'a, wakakuterefutsa. Wo walehendia Mose na Aroni,

⁷ wakawawia, “So nyi luterefukie kipfa lopaya mnying'a, kyaindi nki kitewe luimo iinenga Mndumii-Ruwa mwano yake kui kiheri kikisae handu hamu na Waisraeli wengi?”

⁸ Mose kawahaluo kawawia, “Tirimenyi tane ngaambia mawawaso kyanu kuwuka ko Mndumii-Ruwa.”

⁹ Nao Mndumii-Ruwa kawia Mose

¹⁰ “Umu onu ang'u umu o kishari kyanu akuterefutsie kipfa alepaya mnying'a ang'u ai kyaṟo kuleshe, na kokoya nakundi ichihio kya mkonu mnene fo Pasaka.

¹¹ Mndu cha icho nawode momu fochihio kya Pasaka komeidaho meri fumu; kyukanyi kya mfiri fo ikumi na kaana fo meri foituma. Nechiichika kui ilya mkate ilantarang'ashe na mboha tsesakia.

¹² Walatsuhaṟe kelya kyose mṟasa ilyi lya ngama ngamenyi, walafunje manya fuo limu lya shumasho sha Pasaka. Wechiichika chandu shiteṟio shake shose shihambie.

¹³ Kyaindi mnducho oose amheṟemtsu ang'u alai kyaṟo, kada alaichika mfiri mnene fo Pasaka nechiletsano na wandu wake, kipfa kya ili ada alanjiinenga mwano kui mkonu fo fumbaṟi. Kimbaṟi nakapo kipfa kya wunyamaṟiwu woke.

¹⁴ “Kokoya kuwode mhenu ai handu hamu nanyo nao nakundi ichihio kya mkonu mnene fo Pasaka, mnducho kimbaṟi nawute ado chando kiwaṟi wuindi wo Pasaka wose. Orio mndu nechiosha wuindi wulya wulya, nawe mhenu ang'u nyi menyikanyi.”

Ipuchi lya modo

¹⁵ Mkonu ihema liele lilehoṟotso, ipuchi lilesoka likashikia ihema lya mdumbuye. Kiheri kya kio lilewono li cha modo mṟasa ngamenyi.

¹⁶ Nyi wudo liwei orio mkonu; ipuchi lileshikia ihema mfiri na kio likawono cha modo.

¹⁷ Orio kiheri ipuchi lyameirio huye ya ihema, Waisraeli walewunduo handu hesia moo na iwikase handu hesia moo handu ipuchilyo lyamehoṟoka.

¹⁸ Walehenda kyaṟo kui iwawaso lya Mndumii-Ruwa. Kiheri kyo kyose ipuchilyo lilekaa huye ya ihema, wandu nawo walekaa kulya handu hesia moo.

¹⁹ Manya kokoya ipuchilyo lilekaa huye ya ihema ko mfiri ifoi, Waisraeli waleindia Mndumii-Ruwa, walakikureho.

²⁰ Kiheri kingi ipuchilyo lilekaa huye ya ihema ko mfiri njiangu tupu; kyaindi orio kiheri Waisraeli walekaa kulya handu hesia moo; walesama chandu Mndumii-Ruwa alewatutuma.

²¹ Kiheri kingi ipuchi lilekaa huya ihema wokia kyukanyi tane ngamenyi tupu; na peṟeseng'u likameirio huye, wandu nawo wakaweira mta. Na kokoya lilekaa huya ihema puti taṟaraa, wo walekure tupu ipuchilyo liikameirio huye.

²² Kokoya nyi ko mfiri iwi, ang'u meri, ang'u maka; angu ngoseṟa, kiherikyo kyose ipuchilyo liwei huya ihema, Waisraeli walesamapfo; kyaindi mandi lyameirio huye, nawo walewesamadaa.

²³ Kui iwawaso lya Mndumii-Ruwa walewika handu hesia moo na kui iwawaso lya Mndumii-Ruwa waleira kyaṟo. Walewada iwawaso lya Mndumii-Ruwa chando alelyihamba kui ṟu lya Mose.