MAITALA 8 - Bibilia Kui Mdedie fo Kimochi

Iteseheṟo na iwiko lya taa

¹ Mndumii-Ruwa kawia Mose,

² “Wia Aroni ke kiheri echiwika taa tsilya mfungade kulya kimnaṟenyi, natsiwikeho tsiloṟe sa ora lo mbele lo kimnaṟakyo.”

³ Aroni kaindia iwawasolyo kawika taa tsilya tsikaloṟa sa ora lo kusonguo, chandu Mndumii-Ruwa alewawasa Mose.

⁴ Wokia huye tane tsindenyi kimnaṟakyo kya taa kiwei kisungusie ko wuaria wung'anyi ko sahapu intane kui mfano sa Mndumii-Ruwa awemeloṟa Mose.

Iheṟemtso na ishimbuyo lya Walewi

⁵ Mndumii-Ruwa kawiase Aroni,

⁶ “Letsana Walewi na Waisraeli, nowaheṟemtse.

⁷ Nyi wudi ochiwaheṟemtsa: waolie mṟinga foheṟemtsa numa nowawie wakuode njui mbihu fose, wasanje nguo tsawo na ikuheṟemtsa.

⁸ Numa wawute ipung'a limu likoho handu hamu na kidaso kyake kya mso, mmamiri fumlongelonge na mafuda; na iyo noire ipung'a lingi likoho liwe kidaso kewutaho wunyamaṟi.

⁹ Kiidima nosanye wandu wose wa Waisraeli noende Walewi osehu lo ihema lyesanzia.

¹⁰ Ili ochiende Walewi na oshangunyi loko, Waisraeli wechiwahekia mawoko,

¹¹ numa Aroni nawawike oshangunyi loko cha kidaso kekuchakucha kuwuka ko Waisraeli wanjiṟundie.

¹² Numa Walewi wahekie mawoko hawo huya mdo ya pung'atso; ipung'a limuho noliwike liwe kidaso kewuta wunyamaṟi, na ilyo lingi liwe kidaso kemaya modonyi, kundu liwiie Walewi kisanza.

¹³ “Numa nohoṟotse Walewi oshangunyi lo Aroni na wana wake na iwaende na oshangunyi loko cha mwano fokuchakucha.

¹⁴ Nyi wudo ochiwaletsana Walewi kiidi kya Waisraeli waata kundu wawe wako.

¹⁵ Komemaa iheṟemtsa Walewi na iwawika mwano fokuchakucha wechiida na ihemenyi lesanzia kundu wanjiṟundie.

¹⁶ Iwo wawawike wawe wako nakamu, handu ha wawee wa Waisraeli.

¹⁷ Chakipfa wana wose wawee kiidi kya Waisraeli nyi wako; wa wandu na shuma; kipfa mfiri fulya njilewaaha wana wawee wa Wamisri njilewashimbuo wawe wako.

¹⁸ Wulalu ngaduo Walewi handu ha wana wawee wa Waisraeli,

¹⁹ na ngainengia Walewi Aron na wana wake, cha kindo kya nnga kuwuka ko Waisraeli, waṟunde ipfo ihemenyi lyesanzia kipfa kya Waisraeli na iwawikia kisanza kundu kulashikeicha ngapo ko Waisraeli ili wechitikiria handu haele.”

²⁰ Koikyo Mose, Aroni, na wandu wose wa Waisraeli wakashimbuo Walewi, chandu Mndumii-Ruwa alewawasa Mose.

²¹ Walewi wakakuheṟemtsa njonyamaṟo tsawo wakawesanja nguo tsawo, nao Aroni kawawika cha kidaso kekuchakucha oshangunyi lo Mndumii-Ruwa. Aroni kawewikase kisanza kipfa kyawo iwaheṟemtsa.

²² Numa ya isho Walewi wakaida na ihemenyi lyesanzia na iṟundiapfo, wechihoṟokio nyi Aroni na wana wake, chandu Mndumii-Ruwa alewawasia Mose.

²³ Mndumii-Ruwa nalewia Mose,

²⁴ “Orio Mlewi awode maka makumi hawi na itanu na ngoseṟa, nechiṟunda ipfo ihemenyi lyako lyesanzia;

²⁵ na nechida iṟunda kameshitsa maka makumi hatanu.

²⁶ Numa ya oo neidima itarama Walewi wodoe wechiṟunda ipfo ihemenyi, kyaindi awode momu foṟunda mrumo fose amonyipfo. Nyi wudo ochiwawawasia Walewi maṟunda.”