MAITALA 7 - Bibilia Kui Mdedie fo Kimochi

Mwano ya wasongoru

¹ Mkonu fulya Mose alemarisa ihoṟotsa ihema liele, ililetsia mafuda na ilishimbuo handu hamu na shihia shalyo shose, na iletsia mafuda rasionyi na iishimbuo na shihia shayo shose,

² wasongoru wa Waisraeli na wanene wa shishari na wasongoru wa mkambo sa walehoṟokia wandu walya waleitalo,

³ waleendie Mndumii-Ruwa shiinengo shawo: magari haṟandaṟu hamashikie na mapung'a ikumi na hawi, orio wasongoru wawi igari limu, na orio msongoru ipung'a limu. Wamemaa ishilekia osehu lo ihema liele,

⁴ Mndumii-Ruwa nalewia Mose,

⁵ Ambia shiinengoshi kundu shiṟunde iṟunda lyechiwutika kunu ihemenyi lyekusanzia, noinenge Walewi orio umu chandu iṟunda lyake likeri.

⁶ Kyasia, Mose kaira magari halya na pung'a tsilya kainengia Walewi.

⁷ Wagershoni wakainengo magari hawi na pung'a tsiina, kihianyi na iṟunda lyawo,

⁸ Wamerari wakainengo magari haana na mapung'a nyanya, iwatarama iṟundenyi lyawo wesongoyo nyi Ithamari mana o Aroni.

⁹ Kyaindi Mose nalainenge Wakohathi kindo kyose kyamba wo wawei waringi wa shindo shiele sa shiwewaṟi shikudiko makosohu hawo.

¹⁰ Wasongoru wo wakalekia mwano kipfa kya ishimbuo rasio mkonu fulya lileshio mafuda; waleende mwano yawo osehu lo rasio.

¹¹ Mndumii-Ruwa kawia Mose, “Orio mkonu msongoru umu nechilekia mwano foke, foshimbuo rasio.”

¹² Mkonu fo kuwoka nyi Nashoni mana o Aminadabu o kishari kya Yuda.

¹³ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

¹⁴ kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

¹⁵ ipung'a limu likoho; isuwa limu, na kisuwa kimu kya maka fumu ko kidaso kemaya modonyi

¹⁶ kioṟo kimu kya mwano fowuto wunyamaṟi;

¹⁷ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Nashoni mana o Aminadabu. Waleende mwano yawo kudi:

¹⁸ Mkonu fo kawi, Nethaneli mana o Suari msongoru o kishari kya Isakari. Shindo shileendo na cha sha ulya o kuwoka.

¹⁹ Nalewuta mwano yake kudi:sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso.

²⁰ Kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

²¹ ipung'a limu likoho; isuwa limu, na kisuwa kimu kya maka fumu ko kidaso kemaya modonyi

²² kioṟo kimu kya mwano fowuto wunyamaṟi;

²³ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Nathanaeli mana o Sohari.

²⁴ Mkonu fo kaṟaṟu; Eliabu mana o Heloni msongoru o kishari kya Sebloni.

²⁵ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

²⁶ kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

²⁷ ipung'a limu likoho; isuwa limu, na kisuwa kimu kya maka fumu ko kidaso kemaya modonyi

²⁸ kioṟo kimu kya mwano fowuto wunyamaṟi;

²⁹ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Eliabu mana o Eloni.

³⁰ Mkonu fo kaana, Elisuri mana o Shedeuri msongoru o kishari kya Reubeni.

³¹ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

³² kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

³³ ipung'a limu likoho; isuwa limu, na kisuwa kimu kya maka fumu ko kidaso kemaya modonyi.

³⁴ Kioṟo kimu kya mwano fowuto wunyamaṟi;

³⁵ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Elisuri mana o Shedeuri.

³⁶ Mkonu fo katanu nyiwe mkonu fo Shelumieli mana o Surishadai msongoru o kishari kya Simeoni.

³⁷ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

³⁸ kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

³⁹ ipung'a limu likoho; isuwa limu, na kisuwa kimu kya maka fumu ko kidaso kemaya modonyi;

⁴⁰ kioṟo kimu kya mwano fowuto wunyamaṟi;

⁴¹ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Shelumieli mana o Surishadai.

⁴² Mkonu fo kaṟandaṟu fukawa nyi kamba lya Eliasafu mana o Deuli msongoru o kishari kya Gadi.

⁴³ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

⁴⁴ kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

⁴⁵ ipung'a limu likoho; isuwa limu, na kisuwa kimu kya maka fumu ko kidaso kemaya modonyi;

⁴⁶ kioṟo kimu kya mwano fowuto wunyamaṟi;

⁴⁷ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Eliasafu mana o Deuli.

⁴⁸ Mkonu fo mfungade fukawa nyi kamba lya Elishamu mana o Amihudi, msongoru o kishari kya Efraimu.

⁴⁹ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

⁵⁰ kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

⁵¹ ipung'a limu likoho; isuwa limu, na kisuwa kimu kya maka fumu ko kidaso kemaya modonyi.

⁵² Kioṟo kimu kya mwano fowuto wunyamaṟi;

⁵³ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Elishama mana o Amihudi.

⁵⁴ Mkonu fo nyanya fukawa nyi kamba lya Gamalieli mana o Pedasuri, msongoru o kishari kya Manase.

⁵⁵ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

⁵⁶ kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

⁵⁷ ipung'a limu likoho; isuwa limu, na kisuwa kimu kya maka fumu ko kidaso kemaya modonyi;

⁵⁸ kioṟo kimu kya mwano fowuto wunyamaṟi;

⁵⁹ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Gamalieli mana o Padasuri.

⁶⁰ Mkonu fo kenda fukawa nyi kamba lya Abidani mana o Gideoni, msongoru o kishari kya Benyamini.

⁶¹ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

⁶² kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

⁶³ ipung'a limu likoho; isuwa limu, na kisuwa kimu kya maka fumu ko kidaso kemaya modonyi;

⁶⁴ kioṟo kimu kya mwano fowuto wunyamaṟi;

⁶⁵ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Abidani mana o Gideoni.

⁶⁶ Mkonu fo ikumi fukawa nyi kamba lya Ahiezeri mana o Amishadai msongoru o kishari kya Dani.

⁶⁷ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

⁶⁸ kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

⁶⁹ ipung'a limu likoho; isuwa limu, na kisuwa kimu kya maka fumu ko kidaso kemaya modonyi;

⁷⁰ kioṟo kimu kya mwano fowuto wunyamaṟi;

⁷¹ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Ahiezeri mana o Amishadai.

⁷² Mkonu fo ikumi na fumu fukawa nyi kamba lya Pagiel mana o Okrani, msongoru o kishari kya Aseri.

⁷³ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

⁷⁴ kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

⁷⁵ ipung'a limu likoho; isuwa limu, na kisuwa kimu kya maka fumu ko kidaso kemaya modonyi;

⁷⁶ kioṟo kimu kya mwano fowuto wunyamaṟi;

⁷⁷ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Pagieli mana o Okrani.

⁷⁸ Na mkonu fo ikumi na kawi fukawa nyi kamba lya Ahira mana o Enani, msongoru o kishari kya Naftali.

⁷⁹ Mwano foke fuwei; sahanyi imu ya pesa iwode wulemeri wo kilo kimu na kienga na ipongo limu lya pesa wulemeri wolyo nyi gramu mahana nyanya, shihianyi na shihesho sha ihema liele; sahanyiyo na ipongolyo shiweichuo mso mmamiri fumlongelonge na mafuda fuwe mwano fo mso;

⁸⁰ kisahanyi kimu kya sahapu kiwode wulemeri wo gramu ihana na ikumi (110) kiichwo ubani,

⁸¹ ipung'a limu likoho; isuwa limu, na kisuwa kimu kya maka fumu ko kidaso kemaya modonyi;

⁸² kioṟo kimu kya mwano fowuto wunyamaṟi;

⁸³ na pung'a tsiwi; masuwa hatanu, shioṟo shitanu na shisuwa shitutu shitanu sha maka fumu fumu sha kidaso kya mwano ya ofoṟo. Ifo nyifo fuwei mwano fo Ahira mana o Enani.

⁸⁴ Shiinengo shose sha mwano ya wasongoru ikumi na wawi wa Waisraeli walelekia kipfa kya rasion mkonu lileshimbuo nyi sahani tsa pesa ikumi na tsiwi, mapoongo ha pesa ikumi na hawi, shisahanyi sha sahapu ikumi na shiwi.

⁸⁵ Orio sahani ya pesa iwewode wulemeri wo kilo kimu na kienga na orio kisahani kiwewode gramu mahana nyanya. Koikyo shihiasho shose shiwewode shilo makumi hawi na mfungade na gramu mahana haṟandaṟu kui kiheo kya ihema liele.

⁸⁶ Shisahani shilya sha sahapu ikumi na shiwi shiweichuo ubani, orio kimu kiwewode ulemeri wo gramu ihana kimu na ikumi kui kiheo kya ihemenyi liele isho shose shiwewode ulemeri wo kilo kimu na gramu mahana haṟaṟu na makumi hawi.

⁸⁷ Shuma shose sha kidaso kemaya modonyi nyi mapung'a ikumi na hawi, masuwa ikumi na hawi na shisuwa sha maka fumu ikumi na shiwi, handu hamu na kidaso kya mso na shioṟo ikumi na shiwi kidaso kewuta wunyamaṟi,

⁸⁸ na mwano fo kidaso kya ofoṟo fose nyi mapung'a makumi hawi na haana, masuwa makumi haṟandaṟu, shioṟo makumi haṟandaṟu, na shisuwa shitutu sha maka fumu makumi haṟandaṟu. Ifo nyifo mwano fulelekio kipfa kya rasio, lyamemaa ishio mafuda.

⁸⁹ Kiheri Mose aleida na ihemenyi lyesanzia kundu nadede na Mndumii-Ruwa, naleicho ṟu lyiuka ora lo huye lo loṟika lo osaṟio, luwei huya isanduku lya mkundana, lyiwuka kiidi kya shiwumbe shilya shiwi shiwode makungo.