MAITALA 6 - Bibilia Kui Mdedie fo Kimochi

Wuhendeli wo mndu awikie kyasa

¹ Mndumii-Ruwa kawia Mose,

² “Inenga Waisraeli wuikimbi ochiwawia: kokoya mndumsoṟo ang'u mndu mka awika kyasa king'anyi, kyasa ke nawe mshimbuo, nakuletsane na wandu nakae wutengo kipfa kya Mndumii-Ruwa,

³ nahong'u nalanyo mvinyo ma wunanzi, nalanyo siki ya mvinyo fo mbaṟi yose, nalanyo mṟinga fo msabibu ang'u nalye msabibu njiwiri ma njiumu.

⁴ Kiheri kyose ai mtengo nalalye kindo kyose kiwukie msabibunyi, ndunda tsa kiidi ang'u makanda hake.

⁵ “Mfiri yose ya kyasa kyake kekaa kuleshe na wandu, nalaode njui tsake; mṟasa kiheri kya kyasa kyake kya wutengo; ikuwika mshimbuo o Mndumii-Ruwa kechisia, nechiwa mwele, nechida njui tsake tsiwe njileshe.

⁶ Mfiriyo yose echiwa mshimbuo ko Mndumii-Ruwa mnducho nalatikirie mnying'a,

⁷ manya kokoya nyi ndee, mae, manomae ang'u mshiki oke, nalashike ikuterefutsa kyamba nyi amshimbuo ko Mndumii-Ruwa kui ilya nyamu.

⁸ Nechiwa mshimbuo ko Mndumii-Ruwa kiheri kyo kyose kya kyasakyo.

⁹ “Kokoya njui tsa mndu awikie kiasa tsaterefutso nyi mndu apfa kitusu ai kufui nao nechioda njui tsake mkonu fo iheṟemka lyake; mkonu fo mfungade.

¹⁰ Mkonu fo nyanya nechiduo mbuna tsiwi ang'u malea hawi ha mbeta ko mkohanyi alya mongo fo ihema lyesanzia.

¹¹ Mkohanyi nawute imu iwe kidaso kewuta wunyamaṟi, na ingi iwe kidaso kemaya modonyi, nao nammbutie kisanza, kipfa kya ili awuta wunyamaṟi wo mnying'a. Mfiri na ifo echishimbuo mdo foke,

¹² nao nawekuwika mshimbuo ko Mndumii-Ruwa kui mkonu yake yekuletsana na wengi. Mkonuyo ileida yechiitalopfo kipfa kya njui tsake tsiwei njishimbuo tsileterefutso. Nechiwuta kichondi kya kisuwa kya maka fumu kiwe kidaso kya mti.

¹³ “Ilyi nlyo iwawaso lya msa awikie kiasa kameawutsia kiheri kyake kekushimbuo: Nechiendo na mongo fo ihema lyesanzia,

¹⁴ nainenge Mndumii-Ruwa shindo shake sha nnga: kichoondi kimu kya kisuwa kya maka fumu kilawode tewe kiwe kidaso kemaya modonyi; kichoondi kimu kya kihuṟuwi kya maka fumu kilawode tewe kiwe kidaso kewuta wunyamaṟi; na isuwa limu lilawode tewe liwe kidaso kya ofoṟo.

¹⁵ Nechilekiase kikapu kiichuo mkate ilanjiwike mtarang'ao; mandasi ha mso mmamiri na mafuda, na mkate nsise tsinjishie mafuda handu hamu na mwano ya mso na shindo shenyo.

¹⁶ “Mkohanyi nechiinengia Mndumii-Ruwa shindoshi shose handu hamu na mwano foke fo wunyamaṟi na kidaso kyake kemaya modonyi.

¹⁷ Nechiinengia Mndumii-Ruwa ichondilyo lya mwano fo ofoṟo, handu hamu na kikapu kya mkate ilantarang'ashe, mwano fo mso na fo shindo shenyo.

¹⁸ Oo mongo fo ihema lyesanzia, mnducho awikie kiasa nechioda njui tsake natsiwike modonyi fui shiya kidaso kya ofoṟo.

¹⁹ “Numa, mkohanyi naire kudende ko mdonyi ko isuwalyo lilikoṟe handu hamu na indasi limu lilitarang'ashe kuwuka kikapunyi na mkate nsise ilantarang'ashe nainengie mnducho awikie kyasa mawokonyi hake kamemarisa ioda njui tsake awewode wokia mandi alewika kyasa.

²⁰ Mkohanyi nechikuchakucha shindoshi cha mwano fokuchakucha oshangunyi lo Mndumii-Ruwa; ishi shose nyi kienga kiele kya mkohanyi, handu hamu na kidari kikikuchekuche na owaa luluwute cha mwano. Numa ya isho shose, mnducho awikie kyasa neidima ikunyoya mvinyo.

²¹ “Iwu nyiwo wuhendeli wo mndu aliie nyamu ya kyasa. Mwano foke ko Mndumi-Ruwa fuhiane na kyasa kyake, ma kokoya awode kingi kyose awechiidima ilekia; nechiwuta kihianyi na kyasa alewika, chandu iwawaso lya ikuheṟemtsa koke lii.”

Mboṟa ya wakohanyi

²² Mndumii-Ruwa kawia Mose,

²³ “Wia Aroni na wana wake ke nyi wudi wechiwikia Waisraeli mboṟa: Mochiwawia.

²⁴ ‘Mndumii-Ruwa namuinenge mboṟa na imuringa,

²⁵ Mndumii-Ruwa namuwaṟie kyamu kyake namsaṟie,

²⁶ Mndumii-Ruwa namuirie kyamu kyake namuinenge ofoṟo.’

²⁷ Nyi wudo wechiwasendia rina lyako, na Inyi njechiwawikia ona.”