MAITALA 5 - Bibilia Kui Mdedie fo Kimochi

Wandu waterefukie

¹ Mndumii-Ruwa kawia Mose,

² “Wawasa wana wa Waisraeli wawute na nja ya kambi orio mndu awodo nyi saka, orio mndu ekeuka ofia, na orio mndu alekuterefutsa kui ikupaaya na mnying'a.

³ Mochiwawuta na nja ya handu hesia moo wandu wa mbaṟii womi na waka kundu walashike iterefutsa handu hesia moo lyako inyi njekekaapfo kiidi kya wandu wako.”

⁴ Waisraeli wakawewuta wado, wakawafunyia nja ya handu hesia moo, Chandu Mndumii-Ruwa alewia Mose.

Mdumbuye fo manyamaṟo

⁵ Kyasia Mndumii-Ruwa kawia Mose,

⁶ “Wia Waisraeli ke: Kokoya mndu oose o womi ang'u o waka awuta wunyamaṟi wo mbari yose womtewa nalaindiese Mndumii-Ruwa, kanyamaṟia mndu ungi,

⁷ kimbaṟi naeweṟo kya wunyamaṟi woke na ilekia njoko isumhanyi na kienga kya makumi hawi kya njokoyo, icho alemdekio.

⁸ Kyaindi, kokoya mnducho alemepfa nao kokoya alawode manomae asumhanyi iambia njokoyo, nahong'u njoko yechiinengio Mndumii-Ruwa kipfa kya Wakohanyi. Ishi nyi handu hamu na ichondi lya isuwa lyewika kisanza kipfa kya wunyamari woke.

⁹ Orio mwano fo kindo kyose kiele kya Waisraeli, wechiinenga Mndumii-Ruwa. Wechiendie mkohanyi, fochiwa foke.

¹⁰ Orio kindo kya mndu kikiele, na ikyo kyose mndu echiinenga mkohanyi kechiwa nkyake.”

Mondu fo waka walai wahendelyi ko wamii wawo

¹¹ Mndumii-Ruwa kawia Mose,

¹² “Wia Waisraeli kokoya mka o mndu oose arendemka alahendelie mii,

¹³ kaṟuhuya na mndu ungi mii ang'u mndu ungi alamanya; nakuterefutsa kyaindi kulawode mndu aṟingishia wuṟuhuiwo kipfa kya ili alatumkio.

¹⁴ Kyasia kokoya mii oke awodo nyi mkeukeu kya mkaoke na ke mkacho nakuterefutsa amonyi kui iṟuhuya na msoṟo ungi. Mii kawado nyi wunyenyi na mka oke manya ili alalekuterefutsa,

¹⁵ kyasia wo wawawi wechihenda ko mkohanyi na iduo mwano fukundikie, kienga kya ikumi kya mso fo Ngano; indi fulawiko mafuda ma ubani, kyamba nyi mwano fo mso fo mii aihidia mka oke, mwano fokelekio fo deko lyapata.

¹⁶ “Mkohanyi nechiduo mkacho namhoṟotse oshangunyi lo Mndumii-Ruwa.

¹⁷ Numa naletsie mṟinga kihienyi kya teri naire kiluli ipfo mba ihemenyi liele nawike ipfo mṟingenyi kundu futarang'ae.

¹⁸ Mkohani nechimmbika oshangunyi lo Mndumii-Ruwa na imshukuo njui tsa mdonyi na immbikia mawokonyi hake mwano fulya fo mso fokelekio kipfa kya mkeukeu fo mii. Mkohanyi nyio amonyi echiwada kihia kilya kiwode mṟinga fotarang'aa fokeende oseso.

¹⁹ Numa mkohanyi nalisiṟe mkacho nyamu nahambe: ‘Kokoya kulaleṟuhuya na msoṟo ungi, kokuterefutsa ui mchilie nyi mii opfo, nahong'u ochikoyo nyi oseso luiendo nyi mṟingafu fotarangaapfo.

²⁰ Kyaindi kokoya norendemka ui mchilie nyi mii opfo, kokuterefutsa kui iṟuhuya na msoṟo alakeri mii opfo,’

²¹ Mndumii-Ruwa na nakukape nowe oseso na ngapo kiidi kya wandu wapfo, nowe mhumba na ndeu yapfo ishimbe.

²² Mṟingafu fuendie oseso fukeida na ndeunyi yapfo na ikuhaluo mhumba na ndeu yapfo ishimbe.” Nao mndu mkacho naidikie kechihamba, “Amenyi, Amenyi.”

²³ Numa mkohanyi naṟehie njosesotsi kitapunyi natsisanjie kulya mṟingenyi futarang'ae;

²⁴ nao narutse mkacho mṟingafo futarang'ae foende oseso nafo fukameida na ndeunyi fochimwendie mawawio hang'anyi;

²⁵ numa mkohanyi nechiambia mwano fulya fo mso fo mkeukeu kuwuka mawokonyi ha mkacho nafukuchekuche oshangunyi lo Mndumii-Ruwa naleṟie rasionyi.

²⁶ Numa, naire ohi lumu lo mwanofo fo mso iwe ngumbuo naikoṟe na modo alya rasionyi. Lyefurumia narutse mkacho mṟingafo.

²⁷ Kamemaa inyo, kokoya nawekuterefutsie kui iṟuhuya, mṟingafo fokeende oseso fochimwendie mawawio hang'anyi mnu; mbihunyi foke, fochishimba na wusu woke wochinyamaṟika. Mndu mkacho nechiwa oseso ipfo ko wandu wake.

²⁸ Kyaindi, kokoya mkacho alalemekuterefutse na alawode mti, echiwada kifaṟe handupfo; nechiidima ifee wana.

²⁹ Kyasia, ilyi nlyo iwawaso lya mondu ya wunyenyi kokoya mndu mka ma ili ai na mii, karendemka kakuterefutsa,

³⁰ ang'u kiheri msoṟo awado nyi wunyenyi na ihidia mka oke. Nechihoṟotsa mkacho oshangunyi lo Mndumii-Ruwa, na mkohanyi naawutsie mawawaso ho hose hamateṟie.

³¹ Mii oke echiwada mti fosepfo, kyaindi mka nyio echikudika wuwicho woke.