MAITALA 4 - Bibilia Kui Mdedie fo Kimochi

Kiṟundio Wakohathi waledambikio

¹ Mndumii-Ruwa kawia Mose na Aroni,

² “Itala wandu wa mba ya Kohathi, umu o shishari sha Lewi, chandu mba tsawo tsii na shishari shawo;

³ nochiṟehia wasoṟo wose wawode maka makumi haṟaṟu (30) mṟasa makumi hatanu (50) sa weidima iṟunda lya ipfo ihemenyi lyekusanzia.

⁴ Ili nlyo iṟunda lya wana wa Kohathi, lyeachikia shindo shiele mnu.

⁵ “Mndumii kawia Mose kudi. Kiheri kewunduo kambi, Aroni na wana wake wechiida na ipfo ihemenyi, wasotsie wanda isulia lii mbele ya Isanduku lya mkundana, numa walishikie na isulialyo.

⁶ Huyalyo wahekiepfo kipfinko kya njonyi njimamiri ya mburu, numa waaleho kitambaa kya fana ya buluu iya njicha. Numa waṟoṟowishepfo mshamo yeliduo.

⁷ “Huya mesa yewika mkate yeṟihichia oshangunyi lo Mndumii-Ruwa waaleho kitambaa kya fana ya buluu huyakyo wechiwikaho sahanyi, mboṟiko tsa ubani, mboṟiko na bilauṟi kipfa kya mwano ya mpfinyo. Mkate fochiwiko o mesenyi kiheri kyose.

⁸ Numa washikie shihiashi shose na kitambaa kya kimaande, na huyake wawikepfo kipfinko kya njonyi ya mburu njimamiri. Numa waṟoṟowishepfo mshamo yeliduo.

⁹ “Wechiira kitambaa kya fana ya buluu washikie nakyo kimnaṟa kya taa, na taatso, makasi hakyo, mapongo hakyo na shihia shose wekewika nasho mafuda.

¹⁰ Wechikiwika njonyinyi njimamiri ya mburu handu hamu na shihia shose wahekie huya mshamo yeliduo.

¹¹ “Numa waale kitambaa kya buluu huya rasionyi ya sahapu washikie huye na njonyi njimamiri ya mburu. Numa waṟoṟowishe mshamo yeliduo.

¹² Wechiira shihia shose shekeṟunda Handu Haele washipfunge na kitambaa kya buluu na ishishikia na njonyi njimamiri ya mburu, numa washihekie huya mshamo yeshiduo.

¹³ “Wechiira mafu rasionyi na huya yake waaleho kitambaa kya king'aring'ari.

¹⁴ Huye yake wawikeho shihia shose shekeṟunda rasionyi kiheri kya mwindie: mhado, menya, njoliko na mamboṟiko. Washikie na njonyi njimamiri ya mburu na ioṟoṟowishapfo mshamo yelikudika.

¹⁵ Aroni na wana wake wakameshikia Handu Haele na shihia na nzohoṟa tsasho tsose, wakuṟeheṟie iwooka kyaṟo, nlyondi wandu wa kishari kya Kohathi wechicha washikudike. Kyaindi wo wawode momu manyanta fopaaya shihiasho shielepfo, walashike ipfa. Ilyo nlyo iṟunda lya kishari kya Kohathi orio mandi ihema lyekusanzia lyamesamiṟo.

¹⁶ “Kiwaṟi Eleasari mana o mkohanyi Aroni naringe mafuda ha taa, ubani wopfaama, mwano ya mso ya orio mkonu, mafuda heshia kiheri keshimbuo na orio kindo kikishimbuo kya ipfo ihemenyi.”

¹⁷ Nahong'u Mndumii-Ruwa kawia Mose na Aroni.

¹⁸ “Mlalekie kishari kya mba tsa Kohathi kiidi kya Walewi kirumatso.

¹⁹ Kyasia kundu walacheipfa kipfa kya itikiria kufui na shihia shiele mnu; nyi wudi ochiwika: Aroni na wana wake wechiida na mba, na ihawia orio umu kindo echiṟunda.

²⁰ Kyaindi wa kishari kya Kohathi wechiida na mba iambuya shindo shii shiele mnu mantapfo; wakawuta wado wechipfa.”

Maṟunda ha Walewi kishari kya Gershoni

²¹ Mndumii-Ruwa kawia Mose,

²² “Itala wandu wa kishari kya Gershoni kui mba tsawo;

²³ ṟehia wasoṟo wose wa maka makumi haṟaṟu (30) mṟasa maka makumi hatanu (50) sa weidima iṟunda ipfo ihemenyi lyesanzia.

²⁴ Iṟunda lyawo nyi:

²⁵ Wechikudika masulia ha ihemenyi liele na ha ihemenyi lyesanzia handu hamu na kipfinko kyalyo, kipfinko kya njonyi njimamiri ya mburu kikihekie huyalyo, isulia lya mongo,

²⁶ masulia na shihowo sha oṟiho lutengetie ihema na rasionyi, masulia ha mongo fo mfiṟiha, na nzohoṟa tsose tsekeṟunda handu hamu nasho Wechiambuya mnu shindo shose shekewuto na nzohoṟatsi.

²⁷ Aroni na wana wake wai Wakohanyi nyiwo wechiloṟa maṟunda hose ha Wagershoni.

²⁸ Na ikudika shindo shose wechisongoyo nyi Ithamari mana o mkohanyi Aroni.”

Maṟunda ha Walewi na kishari kya Merari

²⁹ “Na wudo, italase wana wa Merari kui mba tsawo na shishari shawo.

³⁰ Nochiitala wasoṟo wose wawode maka wokia makumi haṟaṟu (30) tane wa maka makumi hatanu (50), sa wechiidima iṟunda ipfo ihemenyi lyesanzia.

³¹ Wechiwada iṟunda lyekudika mbau na mataṟuma, ngo na otende lo ihema lyesanzia.

³² Na ngo tseṟingichia oṟiho njora tsose, mrihiyo, mambo na shihowo hamu na nzohoṟa tsasho tsose na shihia shake shingi shose. Nochiwahawia kui marina hawo shindo wechikudika.

³³ Ili nlyo iṟunda lya wanawo wa Merari, ipfo ihemenyi wechisongoyo nyi Ithamari mana o mkohanyi Aroni.”

Mtalie fo Walewi

³⁴ Kyasia Mose, Aroni na wasongoru wa madembo hose, wakaitala wandu wa kishari kya Kohathi, kui mba tsawo tsose.

³⁵ Wakaṟehia wandu wawode maka wokia makumi haṟaṟu (30) itane maka makumi hatanu (50), orio msa echiidima iṟunda kulya ihemenyi lyesanzia.

³⁶ Waweshikie wandu shiku shiwi mahana mfungade na makumi hatanu (2,750).

³⁷ Iwa nyiwo wandu wa mba ya Kohathi waleidima iṟunda kulya ihemenyi lyesanzia chandu Mndumii-Ruwa alewawasa Mose na Aroni.

³⁸ Iitala lya wandu wa kisharinyi kya Gershoni kui mba tsawo,

³⁹ wawode maka wokia makumi haṟaṟu (30) itane maka makumi hatanu (50) wawewaṟi iṟunda kiidi kya ihema lyekoyanyia,

⁴⁰ nawo wawei wandu shiku shiwi mahana haṟandaṟu na makumi haṟaṟu (2,630).

⁴¹ Iwa nyiwo wandu wa mba ya Gershoni.

⁴² Iitala lya wandu wa kishari kya Merari kui mba tsawo,

⁴³ weidima iṟunda kulya ihemenyi lyekusanza,

⁴⁴ wawei shiku shiṟaṟu na mahana hawi (3,200).

⁴⁵ Iwa nyi wa mba ya Merari chandu waleitalo nyi Mose na Aroni.

⁴⁶ Ko ikyo, Walewi wose waleṟehio nyi Mose na Aroni

⁴⁷ sa walewoneka ke wechiidima iṟunda lyekudika ihema lyesanzia,

⁴⁸ waweshikie wandu shiku nyanya mahana hatanu na makumi nyanya (8,580).

⁴⁹ Orio umu naileinengo ohawi loke lowada kiheri kekudika ihemalyo, chandu Mndumii-Ruwa alewawasia Mose