MAITALA 35 - Bibilia Kui Mdedie fo Kimochi

Mṟi ya Walewi

¹ Mndumii-Ruwa kadeda na Mose kulya rendewelenyi tsa Moabu, mataya ya meda fo Yordani kufui na Yeriko, kambia,

² “Wawasa Waisraeli ke kikiwaṟi wainenge Walewi mṟi sa wechikaa ipfo orukenyi wechioṟa na handu ha mapata helisa shuma ikinganyi na mṟiyo yawo.

³ Mṟiyo yechiwa ya Walewi, wechikaapfo na maṟa hapfo hechiwa ha mmbe na shuma shawo shingi shose.

⁴ Mapata helisa sa mochiinenga Walewi hatengetie mṟi yawo hechiwada madende mahana haana na makumi hatanu (450) wuleshe na wulandari, wokia otende lo mṟiyo.

⁵ Koikyo patalyo lyelisa shuma lyechiwada madende mahana kenda (900) litengetie mṟifo na mṟifo fukae o makidi hawi.

⁶ Mochiinenga Walewi mṟi iṟandaṟu handu hedichia kokoya mndu awaaha odoe alakusirie nawode momu fodichiaho. Handu hamu na ikyo, mochiwainenga mṟi ingi makumi haana na iwi (42).

⁷ Mṟi yose mochiinenga Walewi nyi makumi haana na nyanya (48) mochiwainenga mṟiyo handu hamu na mapata helisa shuma shawo.

⁸ Mṟiyo mochiinenga Walewi kiidi kya kioṟa kya Waisraeli yechiwa chandu kisharikyo king'anyi kechilekia mṟi ifoi na kishari kitutu kiwelekia mṟi njiangu. Orio kishari kechilekia mṟi yakyo kiinenge Walewi kiṟinganyi na kioṟa kilya waleinengo.”

Mṟi yedichia

⁹ Mndumii-Ruwa kadeda na Mose, kambia,

¹⁰ “Wia Waisraeli ke ili wechiambada meda fo Yordani na iida na orukenyi lo Kanaani,

¹¹ mochisambuṟa mṟi yechiwa yedichia sa kokoya mndu awaaha odoe alakusirie nechiidima idichiapfo.

¹² Mṟiyo yechiwa nyi handu hedichia ha kipuo kundu mbahicho nalawooho nyi motaa kiṟache kiheri alameanduyo nyi mamiingi.

¹³ Mochikusambuṟia mṟi iṟandaṟu iwe handu hedichia.

¹⁴ Mṟiyo iṟandaṟu mochiisambuṟa, iṟaṟu iwe ora lo ngamenyi ya Yordani, na iṟaṟu iwe kulya orukenyi lo Kanaani.

¹⁵ Mṟiyo yechiwa yedichia ya Waisraeli na wahenu wekekaa hamu nawo. Mndu oose kawaaha ungi alakusirie nechiidima idichiapfo.”

¹⁶ “Kyaindi mndu kakapa odoe na kindo cha menya, ang'u iho ang'u iṟiipo, kapfa, mnducho nyi mbaahi nao na nawoho.

¹⁷ Mndu oose kakapa odoe na iho, kapfa, mnducho nyi mbaahi na kikaki na nawoho.

¹⁸ Kokoya mndu akapa odoe na kihia kya kidi sa keidima imwendie opfu, kapfa, mnducho nyi mbaahi, nao na nawoho.

¹⁹ Manomae ai o kufui o icho awooho nechitaa kiṟache. Ichu ili echikoyana na mbaahicho na nainutsie mdumbuye fo opfu.

²⁰ “Na wudo daa, kokoya mndu asuo odoe, kamkumbalia, ang'u kamkumbia kindo kui imterengia,

²¹ ang'u kamkapa nzina, kapfa, nahong'u mnducho akapa odoe nyi mbaahi, na kimbaṟi nawoho. Manomae o kufui o ulya awooho nechitaa kiṟache ili echikumbuhana nao.

²² “Kyaindi kokoya mndu akumbalia odoe kilai kya nyashi ang'u kamkumbia kilai namterengia,

²³ ang'u mndu kakumba iho lyikaende ndenga ya opfu, kawaaha mndu ko ndenga alakusirie, manya kokoya kulawewode sile kiidi kyawo, na icho awaaha kokoya alawekusirie immbika maṟishi,

²⁴ nlyondi mamiingi fochidumbuo kya icho mowaaha na wana wa mae o icho alewaaho akundi itaa kiṟache, chandu iwawasolyi lii.

²⁵ Mamiingi fochiashuo icho mowaaha mawokonyi ha mano mae o icho mowaaho, na imbihiṟa na kulya mṟinyi fodichia kundu awedichia napfo. Nechikaapfo tane opfu lo mkohanyi mnene o kiherikyo sa awemsambuṟe kashimbuo kui ishio mafuda maele.

²⁶ Kyaindi icho alewaaha kakurepfo kahenda nja ya mṟifo aledichia kiherikyo kyose,

²⁷ numa manomae o ulya alewooho kamkoya nja mṟasa fo mṟifo fodichia kambaha echiwada mti fowaahapfo.

²⁸ Chakipfa mbaahi ulya kimbaṟi nakae ipfo mṟinyi fodichia tane ili mkohanyi mnene echipfa; kyaindi mkohanyi mnene kamepfa mbaahicho neidima ikuwuuya na kanyi koke.”

²⁹ Mawawasoha hechiṟunda kiidi kya shishari shanu shose, handu hose mochikukaia.

³⁰ “Mndu oose echiwaaha ungi, nechianduyo kya opfu kiukana na uṟingishi wo waṟingishi wawi ang'u ngoseṟa; mndu oose echiidima ianduyo lya opfu kui uṟingishi wo mndu umupfo.

³¹ Mbaahi na ate nawoho. Echiidima ikuashuo mndumbuyefu kui itaa pesapfo.

³² Manya mulaambie manya iidikia itao kindo kyose nyi mndu awedichie mṟinyi fodichia, kundu mumnenge momu nawuye na kanyi koke shile mkohanyi ang'anyi apfa.

³³ Mukawuta mudo nyi moterefutsa oruka mokekaapfo. Ipusuo samu lyekeinenga oruka lukaterefuka, na kuipfo mwano foheremtsa oruka lopusuo samupfo shile na iwaaha mbaahicho.

³⁴ Mulaterefutse oruka mokekaapfo, oruka sa njikeripfo; cha kipfa inyi Mndumii-Ruwa njikeri kiidi kyanunyo Waisraeli.”