MAITALA 34 - Bibilia Kui Mdedie fo Kimochi

Mṟasa ya oruka

¹ Mndumii-Ruwa kawia Mose,

² “Tutuma Waisraeli kochihamba; Ili mochiida na orukenyi lo Kanaani sa njimuinenga luwe lonu, mṟasa ya orukalo nyi ii.

³ Ora lo nuka mṟasa fochiwa kuwuka nuka ya Sini kuidia ora lo Edomu. Nochiwokia ora lo ngamenyi kulya nuka mtsitsionyi fo Ipalyipalyi lya Monyo.

⁴ Numa noide nuka wohenda njia ya Akrabimu noide Sini tane Kadeshi-barnea, ora lo nuka. Kowukaho mṟasa fochilemeka wohenda mtsudu kya ora lo kyukanyi tane Hasar-adari noide tane Azmoni.

⁵ Kowuka Azmoni woambuya kimeda kya Misri mṟasenyi fo Misri noshike ipalyipalyi lya Mediterania.

⁶ “Mṟasa fonu fo ora lo kyukanyi nyifochiwa ipalyipalyi lya Mediterania.

⁷ “Mṟasa fonu fo ora lo mtsudu fochiwa fudi: ‘Kuwuka ipalyipalyi lya Mediterania mochishika fumvu lya Hori.

⁸ Kuwuka fumvu lya Hori mochiwika kiacho tane njia ya Hamati, muhende tane Sedadi,

⁹ noide tane Zifroni na imarisia Hazar-erani ifo nyi mṟasa fonu fo ora lo mtsudu.’

¹⁰ “Mṟasa fo ora lo ngamenyi mochifuwika kuwokia Haazar-enani tane Shefamu.

¹¹ Kuwuka Shefamu fuhende ora lo nuka tane Ribila, ora lo ngamenyi lo Aini; numa mochiwika mṟasafo fusoke na seri tane msaṟihu fo ora lo ngamenyi lo nduwa ya Kinereti,

¹² numa fusoke wambaṟa ya meda fo Yordani tane ipalyipalyi lya Moonyo; ilu nlochiwa oruka lowo chandu mṟasafu fui.”

¹³ Kyasia, Mose kawia Waisraeli, “Ilu nyilo oruka mochioṟa kui iwika kuṟu kuhya, oruka sa Mndumii-Ruwa alewawasia luinengo shishari kenda na kienga.

¹⁴ Shishari sha Reubeni na Gadi na kienga kya Manase waleinengo kioṟa kyawo kihianyi na shisharisho.

¹⁵ Shisharisho shiwi na kienga shileinengo kioṟa kyawo mataya ya meda fo Yordani ora lo ngamenyi, iambuyana na Yeriko, madoenyi ha mnengeṟi.

Wasongoru wechihoṟokia ihawa oruka

¹⁶ Mndumii-Ruwa kawia Mose,

¹⁷ “Mkohanyi Elieseri na Yosua mana o Nuni nyiwo sa wechihawia wandu oruka luwe masaa hawo.

¹⁸ Nochiirase msongoru umu kuwuka orio kishari watarame ihawa orukalu.

¹⁹ Iha nyiho marina hawo.

Kishari kya Yuda, nyi Kalebi mana o Yefune

²⁰ Kishari kya Simon, nyi Shemueli mana o Amihudi.

²¹ Kishari kya Benyameni nyi Elidadi mana o Kisloni.

²² Kishari kya Dani nyi Buki mana o Yogli.

²³ Kishari kya Manase nyi Hanieli mana o Efodi.

²⁴ Kishari kya Efraimu, nyi Kemueli mana o Shiftani.

²⁵ Kishari kya Sebloni, nyi Elisafani mana o Parnaki.

²⁶ Kishari kya Isakari, nyi Paltieli mana o Azani.

²⁷ Kishari kya Aseri, nyi Ahihudi mana o Shelomi.

²⁸ Kishari kya Naftali, nyi Pedaheli mana o Amihudi.”

²⁹ Iwo nyiwo wandu sa Mndumii-Ruwa alewawawasa wahawie Waisraeli oruka lo Kanaani luwe masaa hawo.”