MAITALA 32 - Bibilia Kui Mdedie fo Kimochi

Mkambo ya wa oralo ngamenyi lo Yordani

¹ Shishari sha Reubeni na Gadi wawewode shuma shifoi mnu nakamu. Kyasia wekiwona ora lo Yazeri na Gadi lulucha ko shuma,

² wakahendia Mose, mkohanyi Elieseri na wasongoru wa mamiingi, wakawawia,

³ “Mṟi ya Atarothi, Diboni, Yazeri, Nimra, Heshboni, Eleale, Sibma, Nebo na Beoni,

⁴ oruka lulya Mndumii-Ruwa aleluwada kipfa kya mamiingi fo Waisraeli, luilucha ko shuma, naso luwode shuma shifoi mnu.

⁵ Kokoya mochiidikia lomuterewa muluinenge orukalo luwe lodu; mulaluambatsie mataya ya meda fo Yordani.”

⁶ Mose kawawia, “Mukundi ikaa iya na kunu wana wa maanu Waisraeli waihenda shidenyi?”

⁷ Nki ili motewa Waisraeli wakahutsa macha hehenda kulya orukenyi waleinengo nyi Mndumii-Ruwa?

⁸ Nyi wudo waku wanu walewuta mandi njilewaduma kuwuka Kadeshibarnea wahende iitiichia orukalo.

⁹ Wo walehenda tane pichinyi lya Eshkoli, wakawona orukalo, kyaindi wekiwuya, wakaowesha Waisraeli kundu walaide na orukenyi lulya waleinengo nyi Mndumii-Ruwa.

¹⁰ Mndumii-Ruwa kawado nyi nyashi mkonufo, kalya nyamu kahamba,

¹¹ “Kya lohi kuwode mndu ma umu kiidi kya wandu walewuka Misri awode maka makumi hawi na ngoseṟa echiida na kulya orukenyi njilelya nyamu ke njechiinenga Abrahamu, Isaki na Yakobopfo, kipfa walenjiindia kisumhanyipfo?

¹² Wose wechiida napfopfo sile Kalebi mana o Yefune Mkenizi, na Yosua mana o Nuni, cha kipfa wo walenjiindia chandu kisumhanyi.

¹³ Mndumii-Ruwa kawado nyi nyashi kipfa kya Waisraeli, kawainenga iṟahaṟaha kulya nuka maka makumi haana; rika lilya lyose lilenyamaṟia Mndumii-Ruwa lyikapfa.

¹⁴ Na wulalu, lanye kishari kiichuo wunyamaṟi, mowuya alya ko waku wanu, iengeṟiase Mndumii-Ruwa nyashi ing'anyi kipfa kya Waisraeli.

¹⁵ Ko koya mmoleha imwosha, nechimudase kunu nuka, nanyo mochitewa wanduwa wose waarisike.”

¹⁶ Kyasia wakahendia Mose, wakambia, “Luinenge momu kuwoka luwike mfiṟiha ya mochondi hadu, na mṟi ya wana wadu.

¹⁷ Kyaindi so luwenyi lochiira shisha shadu lukuṟeheṟe ihenda shidenyi handu hamu na wana wa maadu Waisraeli, na lochikaa kusonguo kulya shidenyi tane lowashitsa handu wechikaa. Kiherikyo wana wadu wechikaa mṟinyi injiwike na iṟingichio na omombo, kundu wakuringe na wenyi wa orukalu.

¹⁸ Lochiwuya na numapfo mṟasa ili Waisraeli wengi wose wechiikolonyia orukalo lose chandu welehawio.

¹⁹ Lochiikolonyia masaa ha ipfo mataya ya Yordanipfo, kipfa so lomeinengo handu hekaa kya kunu mataya ora lo ngamenyi lo meda fo Yordani.”

²⁰ Mose kawawia, “Kokoya na lohi mochiwuta chandu mohamba, nahong'u iya iya oshangunyi lo Mndumii-Ruwa irenyi shisha shanu muhende shidenyi.

²¹ Orio onu oose mokapana nechiambada meda fo Yordani mochisongoyo nyi Mndumii-Ruwa, mochikapana na wakituwa wanu mṟasa Mndumii-Ruwa nawawinge

²² na iwada orukalo. Mkamemarisa isho, mochiwuya, kipfa momemaa iawutsia kilya kimuwaṟi oshangunyi lo Mndumii-Ruwa na wana wa maanu Waisraeli. Nahong'u Mndumii-Ruwa nechiidikia orukalu lo ora lo ngamenyi lo meda fo Yordani luwe lonu.

²³ Kyaindi ngamuikimba ke mulameawutsie kiasaki kyanu, kechiwa mowutia Mndumii-Ruwa wunyamaṟi; manyenyi kya lohi ke mochiwona ngapo.

²⁴ Wikienyi wana wanu mṟi na machondi hanu mfiṟiha; kyaindi awutsienyi chandu moteṟia.”

²⁵ Kiidima wandu wa Gadi na wa Reubeni wakawia Mose, “So waṟundi wapfo lochiwuta chandu oluwawasa.

²⁶ Waka wadu, wana wadu, machondi na mmbe, wechideeyo iya mṟinyi ya Gileadi.

²⁷ Kyaindi so waṟundi wapfo lukuṟeheṟie ihenda shidenyi lochisongoyo nyi Mndumii-Ruwa. Lochiambada meda fo Yordani na ikapana, chandu ohamba.”

²⁸ Kyasia Mose kadikia mkohanyi Elieseri, na Yosua mana o Nuni, na ko wasongoru wa shishari sha Waisraeli mawawasoha:

²⁹ “Ko koya wandu wa Gadi na wa Reubeni waambada meda fo Yordani handu hamu nanyo warie shisha shawo wechisongoyo nyi Mndumii-Ruwa, mukawinga na iduo orukalo, mochiwainenga oruka lo Gileadi luwe lowo.

³⁰ Kyaindi kokoya walaambada meda fo Yordani handu hamu nanyo warie shisha shawo, wechiikolonyia ora lo oruka lo Kanaani handu hamu nanyo.”

³¹ Wandu wa Gadi na wa Reubeni wakamhaluo, “Mndumii, so lochiwuta chandu Mndumii-Ruwa aleluwia so waṟundi wapfo.

³² Lochisongoyo nyi Mndumii-Ruwa, lochiambada lurie shisha shadu mṟasa orukenyi lo Kanaani kyaindi oruka loinengo so nyi iya ora lo ngamenyi lo Yordani luwe lodu.”

³³ Kyasia, Mose kainenga wandu wa shishari sha Gadi na Reubeni na kienga kya kishari kya Manase mana o Yosefu, oruka lose lo mangi Sihoni o Waamori na oruka lo mangi Ogu o Bashani handu hamu na mṟi na njora tsikinganyi na mṟiyo.

³⁴ Kishari kya Reubeni kikawika mṟi ya Diboni, Atarothi, Aroeri,

³⁵ Atro-shofanyi, Yazeri, Yogbeha

³⁶ Beth-nimra na Beth-harani, mṟi iwode omombo na mfiṟiha ya machondi.

³⁷ Kishari kya Gadi kikawika mṟi ya Heshboni, Eleale, Kiriathaimu,

³⁸ Nebo na Baal-meoni (marina ha mṟiyo haleilacho) na Sibma. Mṟi waleiwika waleiinenga marina hengi.

³⁹ Luwa lya Makiri mana o Manase walekapa oruka lo Gileadi wakaluwada na ifunapfo Waamori wawekekaapfo.

⁴⁰ Ko ikyo Mose kainenga wandu wa mba ya Makiri mana o Manase, oruka lo Gileadi wakakaapfo.

⁴¹ Yairi o kishari Manase kakapa mṟi njiangu ya Gileadi, kaiwada, na iinenga rina Hawoth-yairi.

⁴² Noba nao kakapa mri na iiwada Kenathi na shimṟi shafo, kafudumbuya rina nyi Noba kui rina lyake.