MAITALA 31 - Bibilia Kui Mdedie fo Kimochi

Shida njiele yekapana na Wamedi

¹ Mndumii-Ruwa kadeda na Mose, kambia,

² “Taa kiṟache ko Wamidiani kya chando walewutia Waisraeli; komewuta kudo na iyo nochipfa.”

³ Kyasia Mose kadeda na wandu kawawia, “Reheṟenyi wandu kya ihendashidenyi ikapana na Wamedi itaa kiṟache handu ha Mndumii-Ruwa.

⁴ Kuwuka orio mbaṟinyi ya Waisraeli, mochiwutapfo wandu kiku kimu wehenda shidenyi.”

⁵ Kyasia, wandu kiku kimu walesambuṟo kuwuka ko orio mbaṟi ya Waisraeli, waweshikie wasoṟo shiku ikumi na shiwi wawode shisha.

⁶ Mose kawadika shidenyi wechisongoyo nyi Finehasi mana o mkohanyi Elieseri, arie shihia sha handu haele na maranda heloṟa kichano.

⁷ Waletengetia oruka lo Wamedi, chandu Mndumii-Ruwa alewawasa Mose, wakawaaha wasoṟo wose.

⁸ Kiidi kya wanduwo walewaaho, kuweipfo wamangi watanu wa Wamedi: Evi, Rekemu, Suri, Huri na Reba. Wakawewaaha Balaamu mana o Beori.

⁹ Waisraeli walewada masaa: mmbe machondi na nzohoṟa tsawo tsose.

¹⁰ Mṟi yawo yose, wakakoṟa na modo mfiṟiha yawo na orio handu wekekaa.

¹¹ Waleduo masaa hawo hose na wapfungo wa shidenyi wose, ha wandu na shuma,

¹² wakadaya Mose na Elieseri, na mamwingi fose fo Waisraeli fuwei mfiṟihenyi rendewelenyi ya oruka lo Moabu, mataya ya Yordani kufui na Yeriko.

Iwuya wawuka shidenyi

¹³ Mose, mkohanyi Elieseri, na wasongoru wose wa mamwingi fo Waisraeli, wakawuka kulya mfiṟihenyi wakacheambia waskari walya wa shidenyi.

¹⁴ Mose kasukiṟo ni wasongoru wa itorito na wasongoru wa shida walehoṟokia mapo ha wandu shiku na mapo ha wandu mahana walewuya wawuka shidenyi.

¹⁵ Mose kawawesa, “Nki ili moda wakawa wose wai na moo?”

¹⁶ Kumbuonyi ke waka nyiwo waleidikiana na mbonyi tsa Balaamu, wakatewa Waisraeli wakalekana na Mndumii-Ruwa kulya Peori itane wahoyo nyi ndaṟe njiwicho.

¹⁷ Ko ikyong'u waahenyi wana wose wa kisoṟo na orio mndumka sa alemelaa na mndumsoṟo.

¹⁸ Kyaindi mulawaahe wana wose wa kika wakeha sa walalemelae na mndumsoṟo; lekenyi wakae na moo kipfa kyanu.

¹⁹ Walya wose wai kiidi kyanu sa walemewaaha mndu ang'u wakapaaya mnying'a kiwaṟi wakae kulya nja ya mfiṟiha ko mfiri mfungade; kuheṟemtsenyi handu hamu na wapfungo wanu wa shidenyi ko mkonu fo kaṟaṟu na fo mfungade.

²⁰ Nkimuwaṟi muheṟemtse na orio ṟao, orio kindo kikisungusie na njonyi, na ko mafuru ha machondi ang'u ko kidi.

²¹ Mkohanyi Elieseri kawia wasoṟo walya walewuya shidenyi, “Ili nlyo iwawaso Mndumii-Ruwa aleinengia Mose.

²² Sahabu, pesa, menya ya aṟeṟa menya, ipati na maho ha ilama,

²³ ke shindo shose sa sheketirisia modo, shechiheṟemtso kui iitso modonyi. Ma kudo, kiwaṟi shiheṟemtso kui mṟinga foheṟemtsa. Shindo shingi shose shileidima itirisia modo shechiheṟemtso kui mṟinga foheṟemtsa.

²⁴ Mfiri fo mfungade kiwaṟi musanje maṟao hanu; nlyondi mochiheṟemka muinengo momu foida na mfiṟihenyi.”

Ihawa masaa na wapfungo wa shidenyi

²⁵ Mndumii-Ruwa kadeda na Mose, kambia,

²⁶ “Iyo na mkohanyi Elieseri, handu hamu na wasongoru wa shishari sha mamwiingi fo Waisraeli, wikenyi iitala lya nzohoṟa tsa shindo, wandu na shuma.

²⁷ Hawenyi nzohoṟatso njohawi tsiwi ohawi lumu nlo wandu walya walehenda shidenyi na ohawi lo kawi nyilo mamiingi fose.

²⁸ Ohawi lulya lo wandu walehenda shidenyi, hawaho mwano foinenga Mndumii-Ruwa: kindo kimu kuwuka orio shindo mahana hatanu, kiwe nyi wandu, mmbe, nzoi, machondi ang'u mburu,

²⁹ Shiinengie mkohanyi Elieseri shiwe mwano fo Mndumii-Ruwa.

³⁰ Kuwuka ohawi lulya lo mamiingi fose, ira kienga kimu kya orio shindo makumi hatanu, kiwenyi wandu, mmbe, nzoi, machondi, ang'u mburu. Ishi nochiinengya Walewi walya wekeṟunda kulya ihemenyi lya Mndumii-Ruwa.”

³¹ Mose na mkohanyi Elieseri walewuta chandu Mndumii-Ruwa alewawasia Mose.

³² Nzohoṟa waskari walya wa shidenyi waleende nyi: machondi shiku mahana haṟandaṟu na makumi mfungade na shitanu (675,000),

³³ mmbe shiku makumi mfungade na shiwi (72,000),

³⁴ nzoi shiku makumi haṟandaṟu na kimu (61,000),

³⁵ wana wa kika wakeha shiku makumi haṟaṟu na shiwi (32,000).

³⁶ Kienga kyakyo ohawi luleinengo waskari wawehendie shidenyi nyi machondi shiku mahana haṟaṟu na makumi haṟaṟu na mfungade na mahana hatanu (337,500),

³⁷ kiidi kya iho mahana haṟandaṟu na makumi mfungade na hatanu (675,000) haleinengo Mndumii-Ruwa.

³⁸ Mmbe tsa waskari wa shidenyi nyiwe shiku makumi haṟaṟu na shiṟandaṟu (36,000) na kiidi kya itso mmbe makumi mfungade na tsiwi (72) tsileinengo Mndumii-Ruwa.

³⁹ Nzoi tsawo nyi shiku makumi haṟaṟu na mahana hatanu (30,500), kiidi kya itso nzoi makumi haṟandaṟu na imu (61) nyi tsa Mndumii-Ruwa.

⁴⁰ Wandu nyiwe shiku ikumi na shiṟandaṟu (16,000), kiidi kyawo wandu makumi haṟaṟu na wawi (32) wakadambikio Mndumii-Ruwa.

⁴¹ Kyasia Mose kadambikia mkohanyi Elieseri mwanoyo ileinengo Mndumii-Ruwa, chandu Mndumii-Ruwa awewawasie Mose.

⁴² Mhawie fo nzohoṟa tsose tsileendo shidenyi fuwehianyi, ohawi luleinengo Waisraeli na ohawi luleinengo waskari wawehendie shidenyi.

⁴³ Machondi shiku mahana haṟaṟu na makumi haṟaṟu na mfungade na mahana hatanu (337,500).

⁴⁴ Mmbe shiku makumi haṟaṟu na shiṟandaṟu (36,000),

⁴⁵ nzoi shiku makumi haṟaṟu na mahana hatanu (30,500),

⁴⁶ wandu shiku ikumi na shiṟandaṟu (16,000)

⁴⁷ Kiidi kya kienga kilya kileinengo Waisraeli, Mose naleira mndu umu kiidi kya orio wapfungo wa shidenyi makumi hatanu (50) na shuma, chandu aleikimbo nyi Mndumii-Ruwa, kainengia Walewi walya wekeṟundia kulya ihemenyi lya Mndumii-Ruwa.

⁴⁸ Kiidima wasongoru wa shidenyi, wanene wa shida na wehoṟokia shida na waskari wakahendia Mose,

⁴⁹ wakambia “Waṟundi wapfo loitala waskari wose wai wanda yadu na lowona ke kuwode ma umu owo alai iyapfo.

⁵⁰ Ko ikyo loende shihia sha sahabu, shikuku, pangili, rachi tsa mhuri, shipuli na mshe sa orio mndu alewona. Loshiendie Mndumii-Ruwa kundu mrima yadu iwikio kisanza oshangunyi lo Mndumii-Ruwa.”

⁵¹ Mose na mkohanyi Elieseri wakaambia shindo shose shishisungusie na sahabu.

⁵² Sahabu yose waleinenga Mndumii-Ruwa iweshikie kufui shilo mahana hawi (200).

⁵³ (Orio msikari nalewekudayaho masaa hake).

⁵⁴ Kyasia, Mose na mkohanyi Elieseri wakaambia sahabuya kuwuka ko wehoṟokea shida wakaiduo ihemenyi lyesanzia, iwe ngumbuo ko Waisraeli oshangunyi lo Mndumii-Ruwa.