MAITALA 30 - Bibilia Kui Mdedie fo Kimochi

Wuhendelyi wo mbonyi tsa kyasa

¹ Naho Mose kadeda na wasongoru wa mkambo fo Waisraeli, kawawia, “Ili nyilyo idedo Mndumii-Ruwa awawasie:

² ‘Mndu kawika kyasa ko Mndumii-Ruwa ang'u kateṟia kindo keinenga Mndumii-Ruwa kui ilya nyamu na ikuotoya mrimenyi foke kya kiteṟio, kimbaṟi naawutsie kyasakyo kyake;’

³ “Mana o waka sa ai kanyi ko ndee kawika kyasa kyake ko Mndumii-Ruwa na ikuotoya o amonyi kya kiteṟiokyo,

⁴ na ndee kaicho kiteṟiokyo, nao manya nalamiime, nahong'u kiasakyo kyake kimbaṟi o amonyi na orio kindo ateṟia kimbaṟi.

⁵ Kyaindi kokoya ndee aicho kiteṟiokyo, kamiima, naho kyasakyo kyake shechimhoyapfo. Mndumii-Ruwa nechimhoṟia kyamba nyi ndee amkaṟuo kya kiteṟiokyo.

⁶ “Kokoya mana o waka aaliko amemaa iwika kiasa, ang'u iteṟia alawoka ikusaṟa necha, kakuotoya o amonyi, numa kaaliko,

⁷ mii oke kamanya mbonyitso nalamwime, kyasiang'u kiasa kyake na kiteṟio kyo shimbaṟi naawutsie.

⁸ Kyaindi kokoya mii oke kamanya mbonyitso kamwima, miicho nechiilacha kiasa kya mkacho oke na kiteriokyo kyake alekiwika alakusaṟa necha; nao Mndumii-Ruwa nechimhooṟia.

⁹ “Kyaindi mka mkusu ang'u mndu mka amsame na paruo kawika kiasa ang'u kiteṟio kiwaṟi naawutsie kindokyo alewika kiasa ang'u aleteṟia.

¹⁰ “Mndu mka mwalike kawika kiasa ang'u kiteṟio kui ilya nyamu ai kulya kanyi ko mii oke,

¹¹ numa mii oke kaicho mbonyitso nao nalamwime, manya nalammbie kindo kyose, kiasakyo na kiteriokyo kyake kiwaṟi nakiawutsie.

¹² Kyaindi kokoya ili mii echimanya mbonyitso tsake kamwima na iangatsa kiteṟiokyo, manya kokoya mka nawekundi iinutsia kiteṟiokyo ang'u kiasakyo, echishiinutsiapfo, kipfa mii oke nashiangatsa na Mndumii-Ruwa nechimhooṟia.

¹³ Mii oke nawode momu foinutsia ang'u iangatsa kiterio ang'u kiasakyo kyose kiwaṟi mka oke.

¹⁴ Kyaindi kokoya mii alahamba kindo kyose wokia mkonu aleicho mbonyi tsa kiteṟio ang'u kiasa kya mka oke, kyasia kechiwa ke natsiṟingishia mkonufo aleicho mbonyitso kipfa kya ili alalededa kindo kyose

¹⁵ Kyaindi katsiilacha na katsiangatsa komeidaho mfiri yeitala wokia mkonu aleicho mbonyi tso tsa mka oke, nechiwonyio mti fo ideko lya mka oke.”

¹⁶ Iwu nyiwo wuhendeli wo Mndumii-Ruwa aletutuma Mose kya mii na mka oke; ndee o mndu na mana oke o kika, kokoya manacho nyi mrika ai kanyi ko ndee.