MAITALA 3 - Bibilia Kui Mdedie fo Kimochi

Wana wa Aroni

¹ Iwa nyiwo wana wa Aroni na Mose kiheri Ruwa Mwitoṟi alededa na Mose kulya fumvunyi lya Sinai.

² Iha nyiho marina ha wana wa Aroni: Nadabu, mana mmbee, Abihu, Eliezeri na Ithamari.

³ Iwa waleshimbuo wakashio mafuda wawe wakohanyi.

⁴ Kyaindi Nadabu na Abihu walepfa oshangunyi lo Ruwa-Mwitoṟi, kiheri waleendie Mndumii-Ruwa modo fulai mwele kulya nuka ya Sinai. Wo wawewode wanapfo; ko ikyo Eliezeri na Ithamari wakawa wahidi cha wakohanyi kiheri ndeawo Aroni awei na moo.

Walewi wasambuṟo ihidia wakohanyi

⁵ Ruwa-Mwitoṟi kawia Mose,

⁶ “Ende wandu wa kishari kya Lewi na iya kufui, nowawike oshangunyi lo mkohanyi Aroni kundu nowainenge wuṟundi womṟundia.

⁷ Wechiṟunda handu hake na handu ha mamwingi fose ipfo ihemenyi lya kisanzio ili wechiṟunda handu haele,

⁸ wechitiichia na iringa shihia shose sha ipfo ihemenyi lyesanzia na itarama Waisraeli kiheri waiwuta mṟumo yawo ipfo kiidi kya handu haele.

⁹ Walewi nochiinengia Aroni na wana wake wakohani; iwo walewuto kiidi kya Waisraeli wawaṟundie nakamu.

¹⁰ Nochisambuṟa Aroni na wana wake kundu waweawutsia mṟumo yawo ya ukohani: kyaindi kokoya mndu ungi oose atikiria hafui; nechiwooho.”

¹¹ Ruwa Mwitoṟi kaengeṟa iwia Mose,

¹² “Ambuya, wulalu ngasambuṟa Walewi kiidi kya Waisraeli wose; handu ha orio mana mmbee o womi o ipfo kanyi ko orio Mwisraeli. Walewi nyi wo wako,

¹³ cha kipfa orio mana mmbee o ipfo ko Waisraeli nyi oko. Kiheri njilewaaha wana wawee wose wa Wamisri njilekushimbuya orio mana mmbee o ko Waisraeli; orio mana mmbee o mndu o wandu na kiwee kya shuma; shechiwa shako. Inyi nyio Ruwa-Mwitoṟi.”

Kiṟehio kya iitala lya Walewi

¹⁴ Numa Mndumii-Ruwa nalewia Mose kulya nuka ya Sinai,

¹⁵ “Itala wana wa Lewi wose chandu shishari shawo shii na mba tsawo, orio mndumsoṟo wokia mana o meri fumu na ngoseṟa.”

¹⁶ Kyasia Mose kawaitala chandu Ruwa Mwitoṟi alembawasa.

¹⁷ Iwa nyiwo wawei wana wa Lewi: Gershoni, Kohathi na Merari.

¹⁸ Na iha nyiho marina ha wana wa Gershoni kui mba tsawo: Libni na Shimei.

¹⁹ Wana wa Kohathi kui mba tsawo: Amramu, Ishari, Hebroni na Uzieli.

²⁰ Wana wa Merari kui mba tsawo: Mahli na Mushi. Itsi nyitso mba tsa Walewi chandu shishari shawo shii.

²¹ Wandu wa mba tsa Walibni na Washimei wawewukie ko Gershoni,

²² iitala lyawo wa kisoṟo wose wokia mana o meri fumu na ngoseṟa waweshikie shiku mfungada na mahana hatanu (7,500).

²³ Kishari kya Wagershoni wawewaṟi wawike kambi lyawo kya ora lo kyukanyi lo mba ya ihema liele,

²⁴ Na Eliasafu mana o Laeli ai msongoru o kisharikyo kya Wagershoni.

²⁵ Iṟunda lyawo liwei lyeringa ihema lyiele, handu hamu na kikoyo kyalyo na lisulia lya mongo fo ihemalyo,

²⁶ masulia hai makidi hawi ha ihema liele na rasionyi, na isulia lya mongo fo numa, na shihowo shalyo. Mṟumo yose ya shindoshi nyi yawo.

²⁷ Shishari sha Waamrami, Waitsahari, Wahebroni, na Wauzieli shiwukie ko Kohathi.

²⁸ Iitala lya wasoṟo wose wokia mana o meri fumu na ngoseṟa waweshikie shiku nyanya na mahana haṟandaṟu (8,600) wawekeṟundia handu haele.

²⁹ Shishari sha Kohathi wawewaṟi wawike kambi lya ora lo nuka lo handu halya haele,

³⁰ na Elisafani ai msongoru o shisharisho sha Wakohathi.

³¹ Iṟunda lyawo liwei lyeringa Isanduku lya mma; mesa, kimnaṟa kya taa, rasionyi; shihia sha Wakohanyi, Handu Haele, na masulia ha mongo. Wawewadambikie iṟundia shindoshi shose.

³² Elieseri mana o Aroni mkohanyi ang'anyi nawemmbike msongoru o Walewi. Mohoṟokia wandu wose werundia handu haele.

³³ Shishari sha Wamahli na Wamushi shiwukie ko Merari.

³⁴ Iitala lya wasoṟo wose wokia mana o meri fumu na ngoseṟa waweshikie shiku shiṟandaṟu na mahana hawi (6,200).

³⁵ Msongoru o shishari sha mba i ya Merari nawei Surieli mana o Abihaili; iwa wawewaṟi wawike kambi lyawo ora lo mtsudu lo ihema liele.

³⁶ Wo waleinengo iṟunda lyeringa mba tsa ihema liele, mataṟuma, ngo, mrihiyo na shihia shose sheṟihika ihema; mṟumo yose iwewaṟi ya shindoshi nyi yawo.

³⁷ Walewekundikase iringa ngo tsa oṟiho lutengetie, na mrihiyo, na mambo na shihowo shalyo.

³⁸ Mose na Aroni na wana wawo welekundika iwika kambi lyawo mbele ya ihema liele ora lo ngamenyi iambuya kundu mnengeṟi fokedo. Iṟunda lyawo nyi iwuta mṟumo ipfo handu haele fo ikyo kyose kipfa kya Waisraeli. Orio mndu ungi oose echiwuta isho, kimbari nawoho.

³⁹ Iitala lyose lya wasoṟo wa Walewi wokia mana o meri fumu na ngoseṟa walya Mose na Aroni walewaitala kui shishari chandu Mndumii-Ruwa alewawawasa waweshikie shiku makumi hawi na shiwi (22,000).

Walewi wakaa handu ha wana wawee

⁴⁰ Mndumii-Ruwa kawia Mose, “Itala kui marina wana wose wawee wa kisoṟo wa Waisraeli wokia wana wawode meri fumu na ngoseṟa

⁴¹ Nochisambuṟa Walewi kipfa kyako Inyi Ruwa-Menyipfinya; nowenjisambuṟia na shuma shiwee shose sha Walewi handu ha shuma shiwee sha Waisraeli.”

⁴² Kyasia Mose kaitala wandu wawee wose wa Waisraeli chandu Ruwa-Menyipfinya alembawasa.

⁴³ Wawee wose wa kisoṟo kui iitala lya marina, wawode meri fumu na ngoseṟa chandu waleitalo waweshikie shiku makumi hawi na shiwi mahana hawi na makumi mfungade na waṟaṟu (22,273).

⁴⁴ Mndumii-Ruwa kawia Mose,

⁴⁵ “Wulalu njisambuṟiang'u Walewi wose wawe wako handu ha wawee wa Waisraeli. Na wudo nonjisambuṟie mashao ha kuwoka hose ha mmbe tsa Walewi handu ha mashao ha kuwoka ha mmbe tsa Waisraeli, Inyi nyi Ruwa-Menyipfinya.

⁴⁶ Kipfa kya ili wana wawee wa Waisraeli wafoi kota wana wawee wa Walewi wakawaida ko wandu 273,

⁴⁷ nochiambia pesa shekeli tsitanu ko orio mndu ko wanduwo 273; nkiheo kya sungusihu ya handu haele; tsishike shekeli 1,365.

⁴⁸ Noinengie Aroni na wana wake pesatso handu ha wanduwo waengeṟekie.”

⁴⁹ Mose kaindia, kaira pesatso shekeli 1,365 tsetaa

⁵⁰ handu ha wandu walya waengeṟekie,

⁵¹ Kainengia Aroni na wana wake chandu Ruwa-Menyipfinya alewawasa.