MAITALA 29 - Bibilia Kui Mdedie fo Kimochi

Mwano fo mfiri mnene fo maka mhya

¹ “Mfiri fo kuwoka fo meri fo mfungade, mochiwika kisanzio kiele. Manya mulaṟunde kindo. Ifo nyi mkonu fokapa iranda.

² Mochilekia mwano fokoṟa modonyi, mpfaamo mcha fochihiṟa Mndumii-Ruwa: mapung'a hawi ha ndawanana; masuwa hawi, na shisuwa shitutu mfungade sha maka fumu, isho shose shilawode tewe yose.

³ Mochilekiase mwano fokyo fo mso mcha fumlongelonge na mafuda: shilo shiṟaṟu ko orio ipung'a, shilo shiwi ko orio isuwa,

⁴ na kilo kimu ko orio kisuwa kitutu

⁵ Mochilekiase kioṟo kimu kiwe mwano fowuto wunyamari kundu muwikio kisanza.

⁶ Mochilekia shindoshi na shilya shekekoṟo orio meri mhya na mwano fulya fokyo fo mso, na mwano fo orio mkonu fokoṟa modonyi handu hamu na mwano fokyo fo mso na mwano yakyo ya mvinyo chandu kiwaṟi fuwe mpfaamo mcha fuchihiṟie, nyi mwano fo Mndumii-Ruwa fumkoṟe na modo.”

Mwano fo mkonu fowonyio mhoṟie

⁷ “Mfiri fo ikumi fo meri fo mfungade mochiwika kisanzio kiele. Mkonufo kiwari mukuotoye mulechiṟunda kindo.

⁸ Mochiinenga Mndumii-Ruwa kidaso kemaya modonyi, mpfaamo fochihiṟa Mndumii-Ruwa: ipung'a limu likoho, isuwa kimu, na shisuwa shitutu mfungade sha maka fumu. Shose shilawode tewe.

⁹ Handu hamu na isho mochilekia mwano fo mso mcha fumlongelonge na mafuda shilo shiṟaṟu handu hamu na ipung'alyo, shilo shiwi handu hamu na isuwalyo,

¹⁰ na kilo kimu ko orio kisuwa.

¹¹ Mochilekiase kioṟo kimu kiwe mwano fowuto wunyamaṟi handu hamu na mwano fowikio kisanza, na mwano iichiwie yekora na modo na mwano fokyo fo mso na mwano fokyo fo mvinyo.”

Mwano fo mfiri mnene fo matengo

¹² “Mfiri fo meri fo ikumi na katanu fo mfungade, mochiwika kisanzio kiele. Mochiṟunda kindo mkonufopfo. Mochiwada mkonu mnene ko mfiri mfungade kipfa kya Mndumii-Ruwa.

¹³ Mochilekia mwano fomaya modonyi, fui nyi mpfaamo mcha, fuchihiṟie Mndumii-Ruwa: mapung'a makoho ikumi na haṟaṟu, masuwa hawi, shisuwa ikumi na shiina sha maka fumu. Shose shiwe shilawode tewe.

¹⁴ Mwano fochiitumana nafo nyi mso mcha fumlongelonge na mafuda: shilo shiṟaṟu ko orio ipung'a, shilo shiwi ko orio isuwa,

¹⁵ na kilo kimu ko orio kisuwa, na mwano fo mvinyo fumteṟie.

¹⁶ Mochilekia na kioṟo kimu kya mwano fowuto wunyamaṟi, handu hamu da na mwano fulya fo orio kiheri fokoṟa na modo, na mwano fofo fo mso na fo mvinyo.

¹⁷ “Mfiri fo kawi: mochilekia mapung'a makoho ikumi na hawi, masuwa hawi, shisuwa ikumi na shiina sha maka fumu shilawode tewe.

¹⁸ Mochilekia na mwano fo mso na mwano ya mvinyo na mapung'a halya, masuwa na shisuwa, kui mwitalie fosho.

¹⁹ Muwelekia na kioṟo kimu kiwe nyi mwano fowuto wunyamaṟi, na mwano fokoṟa na fo orio kiheri, na fo mso na fo mvinyo.

²⁰ “Mfiri fo kaṟaṟu mochilekia mapung'a ikumi na limu, masuwa hawi, shisuwa ikumi na shiina sha maka fumu, shilawode tewe.

²¹ Mochishilekia handu hamu na mwano fo mso na fo mvinyo chandu kikundikie shihianyi na maitalie fosho.

²² Mochilekiase na kioṟo kimu kya mwano fowuto wunyamaṟi, handu hamu na fulya fo orio kiheri fo maya mondonyi na fulya fokyo fo mso na fo mvinyo.

²³ “Mfiri fo kaana: mochilekia: mapung'a ikumi, masuwa hawi, shisuwa ikumi na shiina shilawode tewe.

²⁴ Mochilekia na mwano fo mso, na fo mvinyo handu hamu na mapung'aho na masuwaho na shisuwasho chandu iitala lyasho lii na chandu kikundikie.

²⁵ Mochilekia na kioṟo kimu kiwe mwano fowuto wunyamaṟi handu hamu na iya ya orio kiheri yekoṟa modonyi, hamu na iya yake ya mso na iya ingi ya mvinyo.

²⁶ “Mfiri fo katanu, mochilekia mapung'a kenda, masuwa hawi, shisuwa ikumi na shiina sha maka fumu shilawode tewe.

²⁷ Mochilekia na mwano fo mso, na fo mvinyo handu hamu na mapung'aho na masuwaho na shisuwasho shihianyi na iitala lyasho chandu kikundikie.

²⁸ Mochilekia na kioṟo kimu kiwe mwano fowuto wunyamaṟi, handu hamu na mwano fo orio kiheri fokoṟa modonyi, handu hamu na mwano fofo fo mso na fo mvinyo.

²⁹ “Mfiri fo kaṟandaṟu mochilekia mapung'a nyanya, masuwa hawi, na shisuwa ikumi na shiina sha maka fumu shilawode tewe.

³⁰ Mochilekiase na mwano fo mso, mwano fo mvinyo handu hamu na mapung'aho, masuwaho na shisuwasho hahianyi na iitala lyasho, chandu kikundikie.

³¹ Mochilekia na kioṟo kimu mwano fowuto wunyamaṟi, na mwano fokyo fo mso na fokyo fo mvinyo.

³² “Mfiri fo mfungade mochilekia mapung'a mfungade, masuwa hawi shisuwa ikumi na shiina sha maka fumu, shilawode tewe.

³³ Mochilekiase na mwano mso na fo mvinyo, handu hamu na mapungaho, masuwaho, na shisuwasho, kihianyi na iitala lyasho, chandu kikundikie.

³⁴ Mochilekia na kioṟo kimu kiwe mwano fowuto wunyamaṟi, handu hamu da na mwano fulya fo orio kiheri fokoṟa na modo, na mwano fo fo mso na fo mvinyo.

³⁵ “Mfiri fo nyanya mochiwika kisanzio kiele. Mkonufo mlaṟunde kindo.

³⁶ Mochilekia mwano fokoṟa na modo fui mpfaamo mcha fuchihiṟie Mndumii-Ruwa: ipung'a limu, isuwa limu, shisuwa mfungade sha maka fumu shilawode tewe.

³⁷ Mochilekiase na mwano fo mso na fo mvinyo handu hamu na ipungalyo, isuwalyo na shisuwa shilya kihianyi na iitala lyasho chandu kiwaṟi.

³⁸ Mochilekiase na kioṟo kimu kiwe mwano fowuto wunyamaṟi, handu hamu na mwano fulya fo orio kiheri fokoṟa msangane na mwano fofo fo mso na fo mvinyo.

³⁹ “Iha nyiho mawawaso kya iwika mwano fokoṟa modonyi, mwano fo mso na mwano fo ofoṟo sa mochiinenga Mndumii-Ruwa kiheri kya mkonu yanu mnene injiteṟie. Handu hamu na ii yose, iipfose mwano ingi yemaya modonyi; ya mso, na ya mvinyo, sa mochiinenga Mndumii-Ruwa iawutsia shiasa shanu na mwano yanu ya nanga.”

⁴⁰ Kyasia Mose kawia wandu wose wa Israeli madedoho hose Mndumii-Ruwa alembawasa.