MAITALA 28 - Bibilia Kui Mdedie fo Kimochi

Mwano ya mkonu yose

¹ Mndumii-Ruwa kawia Mose,

² “Wawasa Waisraeli kudi: Nyo mochinjiinenga shidaso shikundikie orio kiheri kyakyo: Shelya shemaya modonyi shiwode opfaamo lucha luchihiṟie.

³ Wawie ke mwano wechinjiinenga yemaya modonyi yechiwa: Orio mkonu machondi hawi matutu ha maka fumu maheṟemtsu halawode tewe.

⁴ Ichondi kimu liwuto ngamenyi na lya kawi liwuto kyukanyi;

⁵ Orio kimu lyechilekio na mwano fo mso fo kilo kimu fumruwe na mafuda mecha hamapoche poche.

⁶ Ifu nyi mwano fo orio mkonu fochimayo modonyi nakamu, sa fochiwuto kamba lya kuwoka kulya fumvuhu lya Sinai cha mwano fo kelya, opfaamo lucha sa luchihiṟie Mndumii-Ruwa.

⁷ Mwano fo mvinyo fochiwuto handu hamu na orio ichondi na lita imu ya mvinyo. Nochiletsia mwanofu fo kindo kenyo kenanza handu haele.

⁸ Kiheri kya kyukanyi nochiende ichondi lilya lyingi cha lilya lya ngamenyi lyemaya modonyi; mwano fo mso na cha mwano fo mvinyo; fuwode opfaamo lucha luchihiṟie Mndumii-Ruwa.”

Shidaso sha mfiri fo Ruwa

⁹ “Mfiri fo Ruwa, mochilekia mwano fo machondi matutu hawi masuwa ha maka fumu halawode tewe, mwano fo mso shilo shiwi sha mso mmamiri fumruwe na mafuda, na mwano fo mvinyo.

¹⁰ Mwanofu fokoṟa fochiwuto orio mfiri fo Ruwa da na mwano fulya fo orio mkonu handu hamu na mwano fo mvinyo.”

Mwano fo orio meri

¹¹ “Mawookyonyi ha orio meri, mochiinenga Mndumii-Ruwa mwano fokoṟa modonyi: shipung'a shitutu shiwi, isuwa limu; masuwa matutu mfungade ha maka fumu, halawode tewe.

¹² Mochilekia mwano fo mso mmamiri shilo shiṟaru, fumlongelonge na mafuda ko orio ipung'a limu mochilekia mso shilo shiwi ko orio isuwa,

¹³ na kilo kimu kya mso ko orio isuwa litutu. Mwanoi yekoṟa na mwano ya shelya iwode mpfaamo fuchihiṟie Mndumii-Ruwa.

¹⁴ Kiheo kya mwano fo kindo kenyo kikundikie nyi lita tsiwi tsa mvinyo ko orio ipung'a; lita imu na kienga ya mvinyo ko orio isuwa, na lita imu ko orio kisuwa kitutu. Ifu nyifo mwano fokoṟa modonyi fo orio meri ko maka fose.

¹⁵ Mochiinengase Mndumii-Ruwa mwano fowuto wunyamaṟi, kioṟo kimu, da mwano fulya fokoṟa modonyi fo orio mkonu na mwano fokyo fo mvinyo.”

Mwano ya Pasaka

¹⁶ “Mfiri fo ikumi na kaana fo meri fo kuwoka nyi Pasaka ya Mndumii-Ruwa.

¹⁷ Mfiri fo ikumi na katanu fo meri na ifo ifo nyi mkonu mnene. Mfiri mfungade mochilya mkate ilantarang'ashe.

¹⁸ Mfiri fo kuwoka kochiwada kisanzio kiele. Mochiṟunda iṟundapfo.

¹⁹ Mochilekia mwano fokoṟa modonyi, mwano fo kelya kya Mndumii-Ruwa: pung'a tsiwi njikoho, isuwa limu, shisuwa mfungade sha maka fumu, halawode tewe hose.

²⁰ Mwano fo mso fochiduana natso fuwe mso mcha fumlongelonge na mafuda; shilo shiṟaṟu ko orio ipung'a, shilo shiwi ko orio isuwa

²¹ na kilo kimu ko orio kisuwa kitutu kya halya mfungade.

²² Mochilekiase kioṟo kimu kiwe mwano fowuto wunyamaṟi, kundu muwikio kisanza.

²³ Mochilekia shindoshi da mwano fulya fokoṟa modonyi fo orio kiheri fokelekio orio mkonu ngamenyi.

²⁴ Na wudo, mfiri mfungade, mochilekia mwano fokoṟa chando muichiwie fo kelya kekoṟa, kii nyi mpfaamo mcha fuchihiṟie Mndumii-Ruwa. Mochilekia mwanofu da na fulya fokoṟa fo orio mkonu na mwano fo mvinyo.

²⁵ Na mfiri fo mfungade mochiwika kisanzio kiele; mlaṟunde iṟunda.”

Mwano fo mkonu mnene foana Ruwa shilimu

²⁶ “Kiidi kya mfiri fo kuwoka fo mfiri mnene fo shilimu ili mochiendie Mndumii-Ruwa kilimu kyanu kihya, mochiwika kisanzio kiele; mulawute kiṟundio.

²⁷ Mochilekia mwano fokoṟa modonyi, mpfaamo mcha fuchihiṟie Mndumii-Ruwa: mapung'a matutu hawi, isuwa limu, na shisuwa mfungade sha maka fumu, shose shiwe shiheṟemtsu shilawode tewe.

²⁸ Mwano fo mso fochiduana nayo nyi mso mcha fumlongelonge na mafuda shilo shiṟaṟu ko orio ipung'a, shilo shiwi ko orio isuwa,

²⁹ na kilo kimu ko orio kisuwa.

³⁰ Mochilekia-daa kioṟo kimu kiwe mwano fowuto wunyamaṟi kundu muwikio kisanza.

³¹ Mochilekia shindoshi na mwano fosho na mvinyo; na mwano fulya fokoṟa modonyi chando mwichiwie.”