MAITALA 27 - Bibilia Kui Mdedie fo Kimochi

Wusumuhanyi wo ioṟa lo wana wakika

¹ Mala, Noa, Holga, Milka na Tirsa wawei wana wa kika wa Zelofehadi. Nao Zelofehadi nawei mana o Heferi, mana o Gileadi, mana o Makiri, mana o Manase ai o Yosefu.

² Kyasia, wanawo wose wakahendia Mose, wakahoṟoka oshangunyi loke na mkohanyi Elieseri na wasongoru wose wa mamiingi fo Waisraeli, osehu lo mongo fo ihema lyesanzia, wakahamba,

³ “Ndeadu nalepfiia kulya nuka ilawode mṟinga alawode mana o kisoṟo ma umu.”

⁴ O awei kiidi kya walya waleoshana na Korapfo, walekusanza wechipiṟa Mndumii-Ruwa, indi nalepfa kipfa kya wunyamaṟi woke amonyi. Kimaduma nking'u rina la ndeadu lilesendo kunu kisharinyi kyake kipfa kya ili alawewode mana o kisoṟo? “Luinengenyi kioṟa handu hamu na wana wa mae wa ndeadu.”

⁵ Mose kawika kiterewo kyawo oshangunyi lo Mndumii-Ruwa.

⁶ Mndumii-Ruwa kawia Mose,

⁷ “Kindokyo wana wa kika wa Selofehadi waihamba nkya lohi, wainenge kioṟa handu hamu na wana wa mae wa ndeawo, waduo kioṟa kyake.

⁸ Numa nowie Waisraeli ke mndu oose kapfa alawode mana o kisoṟo, kioṟa kyake kechiinengio mana oke o kika.

⁹ Ko koya alawode mana o kika kioṟakyo kechiinengio wana wa mae wa kisoṟo.

¹⁰ Na kokoya alawode wana wa mae wa kisoṟo, kioṟa kyake kechidao nyi ndee ang'anyi na mtutu.

¹¹ Kokoya ndee alawode mana o mae o kisoṟo, kioṟa kyake kechidao nyi mndu o mbari yake o kufui, na nakiwade cha masaa hake. Iwu nyi wuhendeli na mawawaso ko Waisraeli, nyi Inyi Mndumii-Ruwa ngakuwawasa njido.”

Yoshua asambuṟo isongoya Waisraeli

¹² Mndumii-Ruwa kawia Mose “Do na fumvuhulyi lya Abarimu noambuye oruka sa njileinenga Waisraeli.

¹³ Komemaa iluwona, na iyo nochipfa cha manomayo Aroni,

¹⁴ kipfa mulaleindia iwawaso lyako kulya nuka ya Sinai. Kiheri mamiingi fose fulenunuwa kipfa kyako kulya Meriba, muleleka wawone kiṟumi kyakopfo.” (Meriba nyi soka ya mṟinga ya Kadeshi kulya nuka ya Sinai)?

¹⁵ Nao Mose katerewa Mndumii-Ruwa,

¹⁶ “Hoi Mndumii-Ruwa, Ruwa ui menyi moo ya wandu wose, ngakuterewa nosambuṟe mndu mohoṟokia mamiingifu fose,

¹⁷ sa echiwasongoya na iwaloṟa mbonyitso tsawo tsose, walashike iwa cha machondi halawode mlisi.”

¹⁸ Mndumii-Ruwa kawia Mose, “Ira Yosua mana o Nuni, mndu awode mrima mcha, numa nomhekie mawoko,

¹⁹ na imhoṟotsa oshangunyi lo mkohanyi Elieseri na mamiingi fose nomdambikie iṟundalyo.

²⁰ Mnengie kienga kya wuchili wopfo kundu mamiingifo fose fo Waisraeli wamwindie.

²¹ O necheadanyia mkohanyi Elieseri msa njechimmanyisha shindo shako njikundi kui iho lya oloho. Iho lya oloho: ‘Urimu, iho lyemanyisha mkohanyi kindo Ruwa akundi?’ Nyi wudo Elieseri echiloṟa Yosua na mamiingi fo Waisraeli fose handu wawuka na handu waihenda.”

²² Mose kawuta chandu alewio nyi Mndumii-Ruwa. Naleira Yosua kamhoṟotsa oshangunyi lo mkohanyi Elieseri na mamiingi fose fo Waisraeli.

²³ Numa kamhekia mawoko mdonyi kamdambikia ohawi lo wuchili chandu Mndumii-Ruwa alembawasa.