MAITALA 26 - Bibilia Kui Mdedie fo Kimochi

Mwitalie fo kawi

¹ Numa ya ndaṟe iya, Mndumii-Ruwa kawia Mose na Elieseri mana o mkohanyi Aroni,

² “Italenyi mamiingifo fose fo Waisraeli orio mndu na wa mba yake. Italenyi wandu wose wawode maka wokia makumi hawi na ngoseṟa sa weidima ihenda shidenyi.”

³ Mose na mkohanyi Eliezeri wakadeda na wandu kulya rendewelenyi lya Moabu, mataya ya meda fo Yordani, kufui na Yeriko, wakawawia.

⁴ “Italenyi wandu wawode maka wokia makumi hawi na ngoseṟa, chandu Mndumii-Ruwa alewawasia Mose.” Iitala lya Waisraeli walewuka Misri nyi ili:

⁵ Kuwoka nyi kishari kya Rubeni, mana mmbee o Yakobo. Hanoki, Palu,

⁶ Hezroni na Karmi.

⁷ Iwa nyiwo wa mba ya kishari kya Rubeni. Wasoṟo waleitalo waweshikie shiku makumi haana na shiṟaṟu, mahana mfungade na makumi haṟaṟu (43,730).

⁸ Luwa lya Palu nyi Eliabu,

⁹ na wana wake Nemueli, Datani na Abiramu. (Datani na Abiramu nyiwo wawei wasambuṟe kiidi kya mamiingifo, kyaindi wakakaṟuo Mose na Aroni, wakakulunga na Kora na walya walemina Mndumii-Ruwa.

¹⁰ Kiherikyo teri iledauka ikawameṟa, wakapfa hamu na Kora na walya wawekulungie nao kiheri modo fulekombetsa wandu mahana hawi na makumi hatanu (250) wakawa kiloshio ko wengi.

¹¹ Hamu na isho wana wa Kora walepfapfo.)

¹² Kishari kya Simeoni. Nemueli, Yamini, Yakini,

¹³ Zera na Shauli.

¹⁴ Iwa nyiwo wa mba ya kishari kya Simeoni, Wasoṟo waweshikie shiku makumi hawi na shiwi na mahana hawi (22,200).

¹⁵ Kishari kya Gadi nyi wa mba ya Sefoni, Hagi Shuni,

¹⁶ Ozni, Er,

¹⁷ Arodi na Areli.

¹⁸ Iwa nyiwo wa mba ya Gadi, wasoṟo washikie shiku makumi haana na mahana hatanu (40,500).

¹⁹ Kishari kya Yuda nyi Shela, Peresi, na Zera

²⁰ Wana wawi wa Yuda. Eri na Onani walepfiia orukenyi lo Kanaani.

²¹ Ipfo ko Peresi mba ya Hezroni na Hamuli.

²² Iwa nyiwo wa mba ya Yuda, wasoṟo waweshikie shiku makumi mfungade na shiṟandaṟu na mahana hatanu (76,500).

²³ Kishari kya Isakari nyi wa mba tsa Tola, Puva,

²⁴ Yashubu na ya Shimroni.

²⁵ Iwa nyiwo wa mba ya Isakari, wasoṟo waweshikie shiku makumi haṟandaṟu na shiina na mahana haṟaṟu (64,300).

²⁶ Kishari kya Zebloni, nyi wa mba tsa Seredi Eloni na Yaleeli

²⁷ Iwa nyiwo wa mba ya Zeblon, waweshikie wasoṟo shiku makumi haṟandaṟu na mahana hatanu (60,500).

²⁸ Kishari kya Yosefu awei ndee o wana wawi wa kisoṟo Manase na Efraimu.

²⁹ Kishari kya Manase kiwei mba ya Makiri, Gileadi.

³⁰ Yezeri, Heleki,

³¹ Asriel Shekemu.

³² Shemida na Heferi.

³³ Selofehadi, mana o Heferi alewada mana o kisoṟopfo shile na wa kika tupu, nawo nyi Mala, Noa, Hogla, Milka, na Tirsa.

³⁴ Iwa nyiwo wa mba ya Manase, wasoṟo waweshikie shiku makumi hatanu shiwi na mahana mfungade (52,700).

³⁵ Kishari kya Efraimu wawei wa mba tsa Shuthela, Bekeri na Tahani.

³⁶ Mmba ya Erani nyi we Shuthela.

³⁷ Iwa nyiwo wa mba ya Efraimu, wasoṟo waweshikie shiku makumi haṟaṟu na shiwi na mahana hatanu (32,500). Iwa wose nyi wawukie ko Yosefu.

³⁸ Kishari kya Benyamenyi wawei wa mba tsa Bela, Ashbeli, Ahramu,

³⁹ Shufamu na Hufamu.

⁴⁰ Wa mba tsa Ardi na Naamani wawewukie ko Bela.

⁴¹ Iwa nyiwo wa mba ya Benyamenyi, wasoṟo washikie shiku makumi haana na shitanu na mahana haṟandaṟu (45,600).

⁴² Kishari kya Dani wawei wa mba ya Shuhamu;

⁴³ iwewode wasoṟo shiku makumi haṟandaṟu na shiina na mahana haana (64,400).

⁴⁴ Kishari kya Aseri wawei wa mba tsa Imna, Ishvi na Beria.

⁴⁵ Mmba tsa Heberi na Malkieli tsiwukie ko Beria.

⁴⁶ Aseri nawewode mana o waka awelaho Sera.

⁴⁷ Iwa nyiwo wa mba ya kishari kya Aseri, waweshikie wasoṟo shiku makumi hatanu na shiṟaṟu na mahana haana (53,400).

⁴⁸ Kishari kya Naftali kiwei wa mba tsa Yaseeli, Guni,

⁴⁹ Yeseri na Shilemu.

⁵⁰ Iwo nyiwo wa mba tsa kishari kya Naftali wasoṟo shiku makumi haana na shitanu na mahana haana (45,400).

⁵¹ Mwitalie fo Waisraeli wasoṟo waleitalo nyi shiku mahana haṟandaṟu na kimu, mahana mfungade na makumi haṟaṟu (601,730).

⁵² Naho Mndumii-Ruwa kawia Mose,

⁵³ “Mbaṟitsi tsa wandu wechihawio oruka luwe kyoṟa kyawo, kiṟinganyi na iitala lya marina hawo.

⁵⁴ Kishari king'anyi kihawio kiienga king'anyi na kishari kitutu kiweinengo kienga kitutu. Orio kishari kechiinengo kyoṟa kyake kiṟinganyi na iitala lya wandu wake.

⁵⁵ Ma kudo kiheri kehawa orukalo mochiwika kuṟu kuhya. Orio kishari kioṟe kuṟingana na marina ha mbatso tsawo.

⁵⁶ Kyoṟa kya orio kishari kechihawo wechiwika kuṟu kuhya, orio kishari kihawio kuṟingana na mfoeṟa ang'u wututu wowo.”

⁵⁷ Ishi nyisho shishari sha Walewi shileṟehio na mba tsawo: Gershoni, Kohati na Merari,

⁵⁸ handu hamu na mba tsa Libni, Hebroni, Mahli, Mushi na Kora. Kohati nawei ndee o Amramu.

⁵⁹ Mka o Amramu nyi Yokobedi mana o waka o Lewi, awemfeye kulya Misri. Ichu nalewonyia Amramu wana wawi wa kisoṟo, Aroni na Mose, na mana umu o waka Miriamu.

⁶⁰ Aroni nawewode wana waana wa kisoṟo: Nadabu, Abihu, Elieseri na Ithamari.

⁶¹ Nadabu na Abihu walepfa mandi waleinenga Mndumii-Ruwa mwano fo modo fulawaṟi.

⁶² Iitala lya wana wa kisoṟo wa Walewi wawewode meri fumu na ngoseṟa wawei shiku makumi hawi na shiṟaṟu (23,000). Iwa waleitalo handu hamu na Waisraeli wengipfo cha kipfa wo waleinengo kioṟa kyose kiidi kyawopfo.

⁶³ Iwa nyiwo Waisraeli wasoṟo waleitalo nyi Mose na mkohanyi Eleasari kiidi kya rendewele tsa orukenyi lo Moabu, mataya ya meda fo Yordani, kufui na Yeriko.

⁶⁴ Kiidi kyawo kuwode manya umu aletsuhaa kiidi kya walya waleitalo nyi Mose na mkohanyi Aroni walya walewika muitalie fo kuwoka nuka ya Sinaipfo.

⁶⁵ Mndumii-Ruwa nawehambie ke wose wechipfiia kulya nuka, na cha lohi kuwode ma umu owo aledeeyo na moopfo, shile Kalebi mana o Yefune, na Yoshua mana o Nuni.