MAITALA 25 - Bibilia Kui Mdedie fo Kimochi

Waisraeli na Baali lya Peori

¹ Lilya mandi Waisraeli wawei kulya shitimu wasoṟo walewooka iṟuhuya waka wa Moabu.

² Wakawo wakalaha Waisraeli wahende iindia mfiri mnene yedasia maruwa hawo, nawo Waisraeli wakalya shelya na iindia maruwa hawo ha wongo.

³ Nyi wudo Waisraeli walekulunga na Baali ruwa lya Peori, na Mndumii-Ruwa kawado nyi nyashi kipfa kya Waisraeli.

⁴ Kyasia Mndumii-Ruwa kawia Mose, “Duo wasongoru wose wa Waisraeli nowaotsuo oshangunyi loko kui na sa, kundu nyashi yako nawo isie.”

⁵ Mose kawia wasongoru wa Israeli, “Orio umu onu nawaahe mnducho oose kiidi kyawo sa akulunga na ruwa Baali o Peori.”

⁶ Kiheri na ikyo mndu umu kaende mndumka umu o Wamedi na kanyi koke, Mose na mamiingi fose fo wandu wa Israeli wakakapa kilio alya mongo fo ihema lyesanzia.

⁷ Kyasia Finehasi mana o Eleazeri mana o mkohanyi Aroni kekiwona isho, kakure alya mamiinginyi fo wanduwo, kaira pfumu,

⁸ kawalia Mwisraeli ulya mṟasa kulya ihemenyi, kawakapa mapfumu wose wawawi alya ndewunyi. Kudi ndaṟe njiwicho iwekombetsa Waisraeli ikasia.

⁹ Wandu walepfa kipfa kya ndaṟeyo njiwicho waweshikie wandu shiku makumi hawi na waana.

¹⁰ Mndumii-Ruwa kawia Mose.

¹¹ “Finehasi mana o Eleasari, mana o mkohanyi Aroni, ameoloṟa nyashi yako kipfa kya Waisraeli; kiidi kyanu nao tupu alewado nyi wunyenyi chandu inyi njiwuwode. Nkyo kitewe njilalerumatsase Waisraeli wose kui nyashi yako.

¹² Ko ikyo mmbie ke njikeri iwika mkundana fo ofoṟo nao.

¹³ Ngateṟiana nao ke o na luwa lyake wechiwa wakohanyi mlungana kipfa nalewado nyi wunyenyi kipfa kyako inyi, Ruwa oke, kawikia Waisraeli kisanza.”

¹⁴ Mwisraelicho alewooho handu hamu na mndumka ulya o Wamedi nawekelaho nyi Zimri mana o Salu, msongoru o mba imuho kisharinyi kya Simeoni.

¹⁵ Na mndu-mkacho o Wamedi alewooho nawekelaho nyi Kozbi mana o waka o Suri, nawei msongoru kishari kiliwe kulya Midiani.

¹⁶ Mndumii-Ruwa kawia Mose,

¹⁷ “Sohuo Wamedi mondu nowarumatse;

¹⁸ Kipfa wo walemusohuo mondu kui mtambo yawo, sa walemulemba, ko mbonyi tsa Peori, na kipfa kya Kozbi mana owo, alewooho kiheri kya ndaṟe iya njiwicho ilewooka kulya Peori.”