MAITALA 24 - Bibilia Kui Mdedie fo Kimochi

¹ Nahong'u Balaamu kamanya ke Mndumii-Ruwa nakundi iwikia Waisraeli mboṟa, ko ikyo nalahendese ilasha, kawoka iambuya nuka.

² Kaambuya huye kawona Waisraeli wawikie mfiṟiha orio kishari handu hakyo. Ko ikyo mumuyo fo Ruwa fukamchea,

³ nao kahamba oloholu lo Mndumii-Ruwa: “Oloho loko inyi Balaamu mana o Beori Oloho lo mndu atambaṟuo meso;

⁴ oloho lo mndu aleadanyia madedo ha Ruwa, mndu alewona mawonesio ha Ruwa menyi pfinya. Mndu ekeadapfuma kawewona na pata.

⁵ Mahema hapfo hachihiṟie kota lanye wandu wa Yakobo; ee-da, mfiṟiha yanu lanye wandu wa Israeli!

⁶ Nyi cha mapichi hekeletseka mṟinga, cha mhunda mbai ya meda, cha mishubiri injidonge nyi Mndumii-Ruwa, cha mieresi mbai ya mṟinga.

⁷ Wechiwada kisa kishikie kya mṟinga, mbeu tsawo tsechiwona mṟinga fufoi, mangi yawo nechiwa mnene kota Agagi, na wumangi woke wochiichiko mnu.

⁸ Ruwa nalewaonduo kuwuka Misri, nao nekewakapanyia ko pfinya cha mboho. Nechirumatsa mkambo ya wandu wakeri wakituwa wawo, nechifunjafunja mafuo hawo, nechiwatocha na mfi yake.

⁹ Nechiwalayalaya wanda cha miso, nyiu echikaria imwamtsa Nawikio ona icho oose echimuwikia ona lanye Israeli, naseso icho oose echimusesa.”

¹⁰ Balaki kawado nyi nyashi ing'anyi kya Balamu, kakunda imrundukia kui nyashi kambia, “Njilekulaha noche isesa wakituwa wako, kyaindi makambaha haṟaṟu kowawikia ona!

¹¹ Wulalu henda njilekuwikia kiasa kekuindia, kyaindi Mndumii-Ruwa kakuima kulawone wuindi!”

¹² Balaamu kawia Balaki, “Ngesa, njilewia wandu walya kulewaduma koko

¹³ ke manya kokoya nowenjiinenga mba yapfo iichuo pesa na sahapu, njiwechiidima itehia iwawaso lya Mndumii-Ruwapfo, njiwute kindokyo kyose kicha angu kiwicho ko pfinya yako inyi njimonyipfo? Njilehamba, ikyo Mndumii-Ruwa echihamba nkyo njechihamba.”

Wuikimbi wofurumia wo Balaamu

¹⁴ Wulalu njiwuya na ko wandu wako, kyaindi njilamekure iya, “Njikeri ikuwia kindo wanduwa wa Israeli wakundi iwutia wandu wapfo mfiri yefurumia.”

¹⁵ Kyasia, Balaamu kambia oloholu: “Oloho loko inyi Balaamu mana o Beori, Oloho lo mndu aleambuṟo meso,

¹⁶ Oloho lo mndu aleicho madedo ha Ruwa, na mndu aichi wuṟango wo Ruwa ang'anyi mndu ekewona mawonesio ha Ruwa Menyipfinya mndu ekeadapfuma aambuṟo meso.

¹⁷ Njiwonyi msa aicha, kyaindi chi wulalupfo njimmbonyi, kyaindi ai kufuipfo. Nyenyeri yawuka ko luwa lya Yakobo, mangi nechicha awuka kiidi kya Waisraeli, Nechilachuo wasongoru wa Wamoabu na ndichi yake. Nechikombetsa luwa lyose lya odetso

¹⁸ Edomu yechichilio nyio, Seiri yechiwa masaa hake, Israeli yechiinengo iwinza ling'anyi.

¹⁹ Umu o luwa lya Yakobo nechichilia nao nekombetsa iwo wechideo mṟinyi.”

²⁰ Kiidima Balaamu kaambuya Waamaleki kahamba oloho loke: “Amaleki nyi mkambo fuwode pfinya kota wengi, indi lyefurumia wechiarisika nakamu.”

²¹ Numa Balaamu kaambuya Wakeni, kahamba oloho loke: “Kanyi konu kui kucha wyoo, lanye Wakeni, cha sungu huye mnu nakamu ya iṟaṟa.

²² Kyaindi nyo Wakeni mochirumatso Kiheri Waashuru wechimuduo wupfungo.”

²³ Balaamu kahambase oloholu: “Ochia lowo Nacho ekaa na moo, ili Ruwa echiwuta ishi?

²⁴ Ngalawa tsing'anyi tsechicha tsiwuka Kitimu, wechiṟinjawia Ashuru na Eberi, indi nawo daa wechirumara mlungana.”

²⁵ Kyasia, Balaamu kakureho kawuya na kanyi; na Balaki nao kawehenda.