MAITALA 23 - Bibilia Kui Mdedie fo Kimochi

¹ Balaamu kawia Balaki, “Kenjisungusia rasionyi mfungade iya numa nonjiendie mapung'a mfungade na masuwa mfungade.”

² Balaki kawewuta chandu Balaamu alemmbia Kyasia, wakawutia kidaso huya orio rasio ipung'a limu na isuwa limu.

³ Numa Balaamu kawia Balaki, “Kaa iya kufui na kidaso kyapfo kekoṟa, na inyi njihende. Kofia Mndumii-Ruwa nechikumbuhana na inyi. Ikyo kyose echinjiloṟa njechicha ikuwia.” Kyasia, Balaamu kahenda amonyi kulya fumvuhu.

⁴ Ruwa kakoyana nao. Balaamu kambia, “Njileteseheṟa rasio mfungade ngadasiaho ipung'a limu na isuwa limu ko orio rasio.”

⁵ Mndumii-Ruwa kainenga Balaamu madedo echideda na immbia nawuye na ko Balaki.

⁶ Balaamu kawuya kakoya Balaki ahoṟoki alya alya kufui na kidaso kilya kyake kekoṟa, handu hamu na wasongoru wose wa Moabu.

⁷ Balaamu kawia Balaki oloho loke kahamba, “Balaki nalenjiende na iya kuwuka Aramu, Ee-da mangi ya Moabu, nalenjiende kuwuka mafumvu ha ora lo ngamenyi. ‘Kenjo nosese wandu wa Yakobo!

⁸ Njechiwawonyia njida mti wandu Mndumii-Ruwa alalewawonyia mti?’

⁹ Kuwuka shitoṟomosonyi sha maho hang'anyi njiwawonyi; kuwuka huye ya mafumvu njiwasotsia meso, mkambofo fui kyanya kyafo fumenyi, fukuwonyi ke fulafananyi na mkambo ingi.

¹⁰ Nyiu echiidima iitala mfoeṟa fo wandu wa Yakobo, ang'u ilasha mamiingi fo Waisraeli? Leka njipfe opfu lo waharami, mtsitsionyi foko fukekuwiia cha fowo.”

¹¹ Nahong'u, Balaki kawia Balaamu, “Nkiki onjiwutia iki? Njilekuende na iya isesa wakituwa wako, kyaindi iyo kowawikia mboṟa!”

¹² Balaamu kawia Balaki, “Kinjiwaṟi ihamba madedo Mndumii-Ruwa alenjiinenga.”

Wuikimbi wo Balaamu wo kawi

¹³ Numa, Balaki kawia Balaamu, “Nnde handu hengi kundu noidime iwawona; ma kudo nochiwona waangu, ochiidima iwawona wosepfo. Nowasese kukeriho handu hako.”

¹⁴ Kyasia, Balaki kaduo Balaamu demenyi lya Sofimu huye kitoṟomosonyi kya fumvu lya Pisga. Kawikaho rasio mfungade na iwutiaho kidaso orio rasio ipung'a limu na isuwa limu.

¹⁵ Balaamu kawia Balaki, “Kekaa iya kufui na kidasoki kyapfo kemaya modonyi, na inyi njihende kulya mataya ikoyana na Mndumii-Ruwa.”

¹⁶ Mndumii-Ruwa kakoyana na Balaamu, kamnengia madedo sa echihamba, kawemmbia, “Wuya na ko Balaki.”

¹⁷ Kyasia Balaamu kawuya, kakoya Balaki ahoṟoki kufui na kidaso kilya kekoṟa handu hamu na wasongoru wose wa Moabu. Balaki kammbesa, “Mndumii-Ruwa nakuwia ada?”

¹⁸ Nahong'u Balaamu kawia Balaki oloho loke: “Kure, Balaki noadanyie, njiadanyia iyo mana o Sipori.

¹⁹ Ruwa chi mndu owandu nahambe wongopfo, manya chi mndu o wandu nailache mahio hakepfo! Ngesa, nechiteṟia kindo alekiwuta, ang'u nahambe kindo nade alakiinutsia?

²⁰ Ambuya, ngainengo iwawaso lyewikia mboṟa, nao nawikia mboṟa manya njechiidima iilachapfo.

²¹ Mndumii-Ruwa amewona wuwicho wo wandu wa Yakobopfo, manya uilo ko wandu wo wa Israelipfo. Mndumii-Ruwa Ruwa owo nai hamu nawo, O nekeichiko kui ngululu kiidi kyawo, O nekeambia iichika lyawo lya kiwumangi.

²² Ruwa alewawuta kulya Misri nekewakapanyia na pfinya cha tsa mboho.

²³ Kya lohi wuhanga woidima ifurunja wandu wa Yakobopfo, Na wulalu kya mbonyi tsa Israeli, wandu wechihamba, ‘Ambuyenyi ṟiho Ruwa alewuta!’

²⁴ Ambuya! Waisraeli wamekure cha mwiso njika, wahoṟoka cha mwiso ya kisoṟo. Nyi cha mwiso ilekelaa mado itane yamarisa shindo shayo yawaaha, na inyo samu ya shindo shayo yawaaha.”

²⁵ Naho Balaki kawia Balaamu, “Kyasia, kulawasese ma iwawikia mbora manyale!”

²⁶ Kyaindi Balaamu kamhaluo kawia Balaki, “Ngesa, ngakuwia ke kindo Mndumii-Ruwa amehamba nkyo kinjiwaṟi ikiwuta?”

Wuikimbi wo kaṟaṟu wo Balaamu

²⁷ Balaki kawia Balaamu, “Ncho; njikuduo handu hengi. Kofia Ruwa nechiidikia nowasese wanduwo handu hako kuwukapfo.”

²⁸ Kyasia, Balaki kaduo Balaamu mṟasa kitoṟomosonyi kya fumvuhu lya Peori, handu mndu kahoṟokaho nechiwona nuka yose.

²⁹ Balaamu kawia Balaki, “Njisungusia rasio mfungade iya, noṟeheṟe pung'a mfungade na masuwa mfungade.”

³⁰ Balaki kawewuta ado chandu Balaamu alemmbia, numa kawika huya orio rasio kidaso kya ipung'a limu na isuwa limu.