MAITALA 21 - Bibilia Kui Mdedie fo Kimochi

Wuwinzi wo kulya Horma

¹ Mangi imu Mkanaani o Aradi awekekaa kulya Negebu kekiwio mbonyi ke Waisraeli wakeri icha kui njia ya Atharimu, kahenda iwaṟingichia, kaduo, wawo maata.

² Naho Waisraeli wakawikia Mndumii-Ruwa kyasa wakahamba, “Kokoya oluinenga iwinga wanduwa lochiwarumatsa pyu na mṟi yawo.”

³ Mndumii-Ruwa kaadanyia kiterewo kyawo, kawainenga wuwinzi wakawinga Wakanaani. Waisraeli wakawarumatsa Wakaanani nakamu handu hamu na mṟi yawo. Ko ikyo handuho kukodumbuyo rina nyi Horma.

Njoka ya Aṟeṟa

⁴ Waisraeli wakaira kyaṟo kuwuka Hori wakaida njia wohenda ipalyipalyi lya Shamu kundu watengetie oruka lo Edomu.

⁵ Nahong'u wakawoka inunuwia Ruwa na Mose, wehamba, “Nki ilyi muleluwuta kulya Misri luche ipfiia kunu nuka? Kunu kuwode kelya manya mṟingapfo; naso lolemo nyi kelyaki kya mlo fumu.”

⁶ Naho Mndumii-Ruwa kawadikia njoka tsiwode wuṟoi, tsikawaimada tane Waisraeli wafoi wapfa.

⁷ Kyasia wandu wakahendia Mose, wakambia, “Lomewuta wunyamaṟi lukanunuwia Mndumii-Ruwa na iyo daa. Terewa Mndumii-Ruwa naluwute njokatsi.” Nahong'u Mose katerewia wanduwo.

⁸ Nao Mndumii - Ruwa kawia Mose, “Sungusia njoka ya aṟeṟa noimase ngohu. Mnducho oose echiimado nyi njoka, kaambuya njokai ya aṟeṟa, nechichia.”

⁹ Kyasia, Mose kasungusia njoka ya aṟeṟa, kaimasa ngohu. Orio mndu aleimado nyi njoka ili aleambuya njoka iya ya aṟeṟa, nalechia.

Kyaṟo keshika pichinyi lya Wamoabu

¹⁰ Waisraeli wakahenda kyaṟo kyawo, wakawika mfiṟiha kulya Obothi.

¹¹ Kuwokiaho wakachumia mṟasa Iye-abarimu, kulya nuka ora lo ngamenyi, lo Moabu.

¹² Kuwukapfo wakachumia wakawika mfiṟiha pichinyi lya Zeredi.

¹³ Kuwukapfo walechumia, wakawika mfiṟiha ora lo mtsudu lo meda fo Arnoni, sa fusokie fuwuka orukenyi lo Waamori fukaida nuka. Meda fo Arnoni fuwei nyi mṟasa kiidi kya Wamoabu na Waamori.

¹⁴ Kui kipfa kya ikyo, kikiṟehie kitapunyi kya shida ya Mndumii-Ruwa: “Mṟi fo Wahebu orukenyi lo Sufa, na mapichi ha Arnoni,

¹⁵ na mrendemko fo mapichi, fushikie mṟinyi fo Ari, woambuya mṟasenyi fo Moabu!”

¹⁶ Kuwukapfo Waisraeli walechumia mṟasa Beeri; ṟungunyi lya mṟinga sa Mndumii-Ruwa alewia Mose “Wumbienyi wandu handu hamu na Inyi njechiwainenga mṟinga.”

¹⁷ Nyihondo Waisraeli waleimba kiimboki: “Letseka mṟinga iyo ṟungu lya mṟinga, Kiimbienyi!

¹⁸ Ṟungu lya mṟinga lilisume nyi waku wadu lilisume mnu nyi wawode kiṟumi, kui ndichi tsawo tsa wuitoṟi na olio.” Kuwuka nuka walechumia mṟasa Matana,

¹⁹ kuwuka Matana mṟasa Nahalieli, kuwuka Nahalieli mṟasa Bamothi,

²⁰ na kuwuka Bamothi mṟasa pichinyi liidie na orukenyi lo Moabu, fumvuhu lya Pisga woambuya seri nuka.

Waisraeli wawinga wamangi Sihoni na Ogu

²¹ Waisraeli wakaduma ndumi ko Sihoni mangi ya Waamori; ndumi nyiyo ii:

²² “Luinenge momu lukuidie ipfo orukenyi lopfo, lochiakia mbai luide mademenyipfo ang'u mademenyi ha msabibupfo, manya lochinyo mṟinga fo maṟungunyi hanu ha mṟingapfo; lochiida wohenda na mtandara fung'anyi fo mangi tane lomarisa oruka lopfo.”

²³ Kyaindi Sihoni nalainenge Waisraeli momu fokuidia orukenyi loke. Nalesanyia wandu wake, kahenda nuka ya Yahasa ikapana na Waisraeli.

²⁴ Kyaindi Waisraeli walembaha kui oshu luwawo, wakaduo oruka loke, wokia meda fo Arnoni mṟasa meda fo Yaboki, mṟasa orukenyi lo Waamoni; na mṟasa fo oruka lo Amoni fuwekeringo mnu nakamu.

²⁵ Waisraeli waleduo mṟi yose nawo wakakaa kulya mṟinyi ya Waamori ya Heshboni na shidembonyi shayo.

²⁶ Heshboni fuwei mṟi fo Sihoni mangi ya Waamori, msa ili mawookyonyi nalekapana na mangi ya Moabu kaduo oruka loke lose mṟasa meda fo Arnoni.

²⁷ Nkyo kitewie wehamba shihano wekeimba: “Kenjowo Heshboni nowike mba. Mṟi fo Sihoni fuwiko na iikaro.

²⁸ Kyamba modo fulewuka Heshboni, na olewo lo modo lulewuka Sihoni, fulekombetsa mṟi fo Ari fo Moabu, fukarumatsa mafumvu ha meda fo Arnoni.

²⁹ Ochia lonu nyo wandu wa Moabu! Morumatso lanye wandu wa ruwa Kemoshi! Kuletana wana wanu wa kisoṟo wadiche shida, na wana wapfo wa kika kulewada wakadao wapfungo wa shidenyi, mṟasa ko Sihoni mangi ya Amori.”

Kyaṟo mṟasa ko Sihoni mangi ya Amori

³⁰ “Kyaindi wulalu luwa lyapfo lyamerumatso, kuwokia Heshboni mṟasa Diboni, kuwokia Nashimu mṟasa Nofa kufui na Medeba.”

³¹ Nahong'u, Waisraeli wakakaa orukenyi lo Waamori.

³² Kiidima Mose kaduma wandu wahende itiichia mṟi fo Yazeri; wakafuwada handu hamu na shidembo shafo, wakafunapfo Waamori wawekekaapfo.

³³ Waisraeli wakaembeṟuka wakaosha njia ihendie Bashani. Ogu mangi ya Bashani kakure na itorito lyake ikapana na Waisraeli kulya Edrei.

³⁴ Kyaindi Mndumii-Ruwa kawia Mose, “Kulamwouo, kipfa ngamemmbika mawokonyi hapfo handu hamu na wandu wake wose na oruka loke lose. Nochimwutia chandu kulewutia Sihoni mangi ya Waamori, awekekaa Heshboni.”

³⁵ Kyasia Waisraeli wakawaha Ogu, wana wake na wandu wake wose, walade mndu ma umu, numa wakaduo oruka lulya loke.