MAITALA 20 - Bibilia Kui Mdedie fo Kimochi

Mṟinga fo Meriba

¹ Mamiingi fose fo Waisraeli fuleshika nuka ya Sinai meri fo kuwoka, wakawika mfiṟiha fowo kulya Kadeshi. Wakeripfo, Miriamu kapfa kaṟikopfo.

² Handuho walewika mfiṟiha kuwewode mṟingapfo. Ko ikyo mamiingifo fo wandu fose wakakusanza

³ Wechinunuwia Mose na Aroni wehamba, “A kima lulekupfia handu hamu na wodoyadu kufui na ihema lya Mndumii-Ruwa!

⁴ Nki ili mleluende na kunu nuka so mamiingi fo Mndumii-Ruwa Ngesa! Muleluende kundu luarisike na shuma shadu?

⁵ A nki ili muleluwuta kulya Misri mukaluende na handuha hawicho hadi. Iya kuwode Nganopfo, manya makuyupfo, manya msabibupfo; manya makomamangapfo. Ma mṟinga fonyo kuwodepfo!”

⁶ Mose na Aroni wakakure alya mamiinginyi fo wandu, wakahenda ihoṟoka mongo fo ihema lyesanzia wakaho wanda na kyamu. Nahong'u kiṟumi kya Mndumii-Ruwa kikawawonekia,

⁷ nao Mndumii-Ruwa kawia Mose,

⁸ Ira ndichi yapfo, iyo na Aroni manomayo muwike chila na mamiingi fo wandu fose. Numa, oshangunyi lowo, nowie iṟaṟalyo lii oshangunyi lowo liende mṟinga folyo. Ee-da lyechiende mṟinga, kundu wandu wose na shuma shawo wanyo.

⁹ Mose kaira ndichi iya oshangunyi lo Mndumii-Ruwa chando alewawaso.

¹⁰ Kiidima Mose na Aroni wakalaha mamiingi fose fo wandu kufui na iṟaṟa lilya, na Mose kawawia, “Adanyienyi wulalu, lanye wapiṟi; ngesa! Lumuwutie mṟinga kuwuka iṟaṟalyi?”

¹¹ Kiidima Mose kairia owoko loke, kakapa iṟaṟa lilya na ndichi yake makamba hawi. Mṟinga fufoi fukaletseka, wandu wakanyo, handu hamu na shuma shawo.

¹² Kyaindi Mndumii-Ruwa kawia Mose na Aroni, “Kipfa kya ili mulanjiidikie inyi, manya injiwadia wuindi oshangunyi lo Waisraeli, kyasia kipfa kya ikyo mochiitsa mamiingifu fo wandu na kulya orukenyi njilemulia nyamupfo.

¹³ Ifo nyi mṟinga fo Meriba, handu Waisraeli walenunuwia Mndumii-Ruwa, nao kakuloṟa kowo kui wuele.”

Mangi ya Edomu aima Waisraeli walaide

¹⁴ Mose kaduma ndumi ko mangi ya Edomu kuwuka Kadeshi kambia: “Manomayo, Israeli, nahamba adi: Iyo noichi mawukiwa hose haleluhoya.

¹⁵ Chandu waku wadu walehenda Misri, kundu lulekaa ko kiheri kileshe na chandu Wamisri walelyisa waku wadu wukiwa, naso wakawelulyisa wukiwadaa.

¹⁶ Lulefuhia Mndumii-Ruwa, nao kaicho kieṟeṟo kyadu, kaludikia malaika aleluwuta Misri. Wulalu aichu lukeri iya Kadeshi mṟi fui mṟasenyi na oruka lopfo.

¹⁷ Hoi kelukuinengie momu lukuidie orukenyi, lopfo. Lochiteṟateṟa madema hanupfo, manya madema ha msabibu; manya lochinyo mṟinga fo maṟungu hanupfo. Lochiosha njia ing'anyi ya mangi luchumie lulechiambuya kulyo ma kumoso mṟasa kuwuke ipfo orukenyi lopfo.”

¹⁸ Kyaindi mangi ya Edomu kamhaluo, “Ote! Ochiida kiidi kya oruka lokopfo, ko koya oidapfo lochikumarisa kui oshu.”

¹⁹ Waisraeli wakambia, “So lochiosha njia ing'anyi; na kokoya so na shuma shadu lonyo mṟinga fonu, lochitaa. Kindo luiterewa hoi lukuinengienyi momu, lukuidieho na madende manya lukundi kindo kingi kyosepfo.”

²⁰ Kyaindi mangi ya Edomu kaengeṟa ihamba: “Lochimuinenga momupfo.” Oweṟe Waedomu wawode kiṟufu wakakuala ikapana nawo.

²¹ Waedomu wakaleha iwainenga Waisraeli momu foida orukenyi lowo. Waisraeli wakaembeṟuka wakaida njia ingi.

Opfu lo Aroni

²² Waisraeli wose wakawuka Kadeshi, wakashika fumvuhu lya Hori.

²³ Kyasia, Mndumii-Ruwa kawia Mose na Aroni kulya fumvuhu lya Hori, mṟasenyi na oruka lo Edomu.

²⁴ “Aroni nechipfa; echiida na kulya orukenyi njileinenga Waisraelipfo kipfa nyo muwawi mulepiṟa iwawaso lyako kulya Meriba.

²⁵ Ende Aroni na mana oke Elieseri, nowaende na kunu fumvuhu lya Hori.

²⁶ Numa, wuta Aroni maṟaoho hake, noṟike manacho oke Elieseri. Aroni nechipfa ai ipfo fumvuhu.”

²⁷ Mose kawewuta chandu alewawaso nyi Mndumii-Ruwa. Wose wawaṟaṟu waledo na fumvuhu oshangunyi lo mamiingi fose fo wandu.

²⁸ Kiidima Mose kaatuo Aroni maṟao hake, kaṟika mana oke, Elieseri. Na Aroni kapfiia alya alya fumvuhu. Numa Mose na Eleseri wakasokapfo.

²⁹ Mamiingi fose fo wandu wekiicho mbonyi ke Aroni napfa, wakakuinandya ko mfiri makumi haṟaṟu.