MAITALA 18 - Bibilia Kui Mdedie fo Kimochi

Maṟunda ha Wakohanyi na Walewi

¹ Kyasia, Mndumii-Ruwa kawia Aroni, “Wuwicho wose wochicha kiidi kya iṟunda ipfo ihemenyi liele, wochiwa wopfo, na wana wapfo na kishari kyapfo; handu hamu na madeko harianyi na ukohanyi wopfo iyo kumonyi na wana wapfo mochiweso.

² Iyo, wana wapfo na ufee wopfo wose mochiwuta mṟumo fo ukohanyi; wengi wa kisharinyi kyapfo wechiṟunda na iyo ipfo ihemenyi lya mdumbuye.

³ Wo wechiṟunda maṟunda ha ihema ochiwahawia na ihaawutsia. Kyaindi wawode momu fopaaya shihia sha ihemenyi liele manya itikiria rasionyipfo, walache ipfa, na iyo nowepfa daa.

⁴ Wo wechikulunga na iyo kiṟundionyi na iawutsia necha shilya shiwawaṟi sha ipfo ihemenyi, na manya kulakaepfo mndu ungi echikutikiria ipfo.

⁵ Nyo mochiṟundia handu haele na rasionyi, kundu nyashi yako ilashike ichease Waisraeli.

⁶ Nyio inyi njilesambuṟa wana wa wamayanu Walewi kiidi kya Waisraeli cha kiinengo konu. Wo wawawike kyaanya kipfa kyako inyi Mndumii-Ruwa, kundu wawute mṟumo ipfo ihemenyi lyesanzia.

⁷ Kyaindi iyo kumonyi na wana wapfo mochiwuta mṟumo yose ya wukohanyi kipfa kya rasionyi na isho shose shii handu haele. Ikyo nyikyo kimuwaṟi, kipfa njimuinengie kiinengo kya ukohanyi. Mnducho oose alawaṟi katikiria shihia sha ihemenyi, nechiwaaho.”

Ohawi lo Wakohanyi

⁸ Mndumii-Ruwa kawia Aroni, “Njechikudambikia mwanoyo Waisraeli walenjiinenga, shindo shiele shose walenjiinenga: shindo shose Waisraeli waleshishimbuo. Ngakuinenga shindoshi shose iyo na luwa lyapfo shiwe kienga kyanu, ikyo kimuwaṟi mlungana.

⁹ Kiidi kya shindo shiele mnu nakamu sa shilekekoṟo modonyi, shechiwa shanu: mwano ya mso, mwano yewuto wunyamaṟi na mwano ya mti. Orio kindo wandu wechinjiendie cha kidaso kiele kechiwa kyapfo na wana wapfo.

¹⁰ Mochilya shindosho ke nyi shindo shiele mnu nakamu, na nyi wasoṟo tupu wechishilya; shindosho shii shiele konu.

¹¹ “Na shindo shingise daa Waisraeli wechishinjiendie cha mwano yekuchakucha, shechiwa nyi shapfo. Ngakuinenga iyo, wana wapfo na wana wapfo wa kika shiwe ohawi lonu mlungana. Mnducho oose o ipfo mbaṟinyi yapfo alaterefukie nechiidima ishikuliia.

¹² “Ngakuinenga shindo shose shicha shii sha kuwoka shiwukie mademenyi ha Waisraeli wekenjiinenga: mafuda mecha, mvinyo na mso.

¹³ Shilimu shose sha kuwoka sha ndunda njiwiri tsa mademenyi hawo sa wechinjiendie inyi, tsechiwa tsapfo. Orio mndu alaterefukie o ipfo mbaṟinyi yapfo neidima ikuliia.

¹⁴ Orio kindo kikiwikie mboṟa kikatano kiele ipfo ko Waisraeli kechiwa kyanu.

¹⁵ “Orio kindo kiwee sa Waisraeli wechinjiendie kokoya nyi mana mmbe o mndu, ang'u o shuma nechiwa opfo. Kyaindi kikuwaṟi nowatalae mana mmbee o mndu o wandu, na orio kindo kiwee kya shiuma shiterefukie, na ate shitalao.

¹⁶ Mashao ho ha kuwoka hechitalao hawode meri fumu ko kiheo kya shilingi ikumi na tsitanu, kui kiheo kya ipfo ihemenyi liele.

¹⁷ “Kyaindi mashao ha kuwoka ha mmbe, machondi ang'u mburu shilatalao; isho nyi shishiele. Samu yasho nochiiletsia rasionyi na mafuda hasho nochihakoṟa hawe kidaso kemaya modonyi hai opfaamo lucha lunjichihiṟie inyi Mndumii-Ruwa.

¹⁸ Nyamayo nochiidima ikuliia, cha kidarikyo na kudende ko kulyo ko numa shekewuto cha kidaso kekuchakucha.

¹⁹ Ngakuinenga iyo, wana wapfo na wana wapfo wa kika, shindo shose wana wa Waisraeli wekenjiendie; isho nyi shanu. Ifu nyi mkundano fo mlungana oshangunyi loko kipfa kyapfo na luwa lyapfo.”

²⁰ Mndumii-Ruwa kawia Aroni, “Iyo ochiwona kioṟa kyo kyose orukenyi lowopfo, manya iwada ohawi lopfo kiidi kyawopfo; inyi njii ohawi lopfo na kioṟa kyapfo ko Waisraeli”

Ohawi lo Walewi

²¹ “Kya Walewi, wo njiwainengie mwano yose Waisraeli wekenjiendie shiwe kioṟa kyawo. Mwanoyo yechiwa wueri wowo kya mṟumo wekeṟunda ipfo ihemenyi lyako.

²² Wokia wulalu, wandu wengi wa Waisraeli walatikirie kufui na ihema lyesanzia walashike iwuta wunyamaṟi na ikuendie opfu.

²³ Kyaindi Walewi nyiwo wawenyi tupu wechiṟunda ipfo ihemenyi lyesanzia; wechiweso necha kya orio kindo kya ipfo ihemenyi. Ili nyi iwawaso lya mlungana shisharinyi shanu shose. Walewi wechiwona kioṟa kya masaa orukenyi lo Israelipfo.

²⁴ Kyamba njiwainengie mwano Waisraeli wekenjiendie iwe kioṟa kyawo. Nkyo kimaduma ngahamba ke wechiinengo kioṟa ipfo ko Waisraelipfo.”

Mwano fo Walewi

²⁵ Numa, Mndumii-Ruwa kawia Mose,

²⁶ “Wiase Walewi mbonyitsi: Ili mochiambia shiinengo sa Mndumii-Ruwa echimuinenga kuwuka ko Waisraeli shiwe kyoṟa kyanu, mochinjiwutiaho inyi Mndumii-Ruwa onu kienga kya ikumi kya shiinengosho.

²⁷ Mwanofu fonu fochiidikio cha shilimu sha kuwoka sha mso ang'u msabibu mdemi ekenjiendie.

²⁸ Kyasiang'u, nyi wudo mochinjiendie Inyi Mndumii-Ruwa mwano ya shiinengo mochiambia kuwuka ko Waisraeli. Mwanofo mochinjiinenga Inyi Mndumii-Ruwa mochiinengya mkohanyi Aroni.

²⁹ Kiidi kya mwanoyo yose mochiambia, mochinjiinenga inyi Mndumii-Ruwa mwano fo ohawi lulya lucha kota lungi lose na luele.

³⁰ Ko ikyo nochiwawia: Mkamemaa injiwutiaho ohawi lulya lucha kota lungi, ikyo kechitsuhaa ho kechiwa kyanu, chandu mdemi eketsuhaa na mtsuhaṟo fo shilimu sha kuwoka ili amemaa iinenga Mndumii-Ruwa mwano.

³¹ Nanyo mochilya ikyo kechilekio mui handuho hose handu hamu na washari wanu kyamba nyiwo wueri wonu kipfa kya wuṟundi wonu ipfo ihemenyi lyesanzia.

³² Mochiwonyio mti fose kokoya molya shindoshipfo; kokoya na mowutiaho Mndumii-Ruwa ohawi lucha kota lungi lose. Indi muambuye necha mulashike iisalucha shiano shiele sha Waisraeli mulyeho kienga mulainenga Mndumii-Ruwa kilya kicha; kowuta kudo nochipfa.”