MAITALA 16 - Bibilia Kui Mdedie fo Kimochi

Wunyamaṟi wo Kora, Dathani, na Abiramu

¹ Ili numa Kora mana o Ishari, mana o Kohathi, mana o Lewi, kaira wandu hamu na wandu waṟaṟu wa kishari kya Reubeni: Dathani na Abiramu, wana wa Eliabu, na Oni mana o Pelethi,

² iwo wose walekulunga na wasongoru wawode kiṟumi mahana hawi na makumi hatanu walesambuṟo nyi chila iya yose wakamina Mose.

³ Walekusanzia oshangunyi lo Mose na Aroni wakawawia, “Nyo mokuichika mnu mwidio! Wanduwa wose nyi wai waele na orio mndu kiidi kya wanduwa nai mwele, na Mndumii-Ruwa nai naso lose. Wulalu nki ili muikuhaluo wanene wa wandu wa Mndumii-Ruwa?”

⁴ Mose kekiicho isho kakuhutsa wanda na kyamu.

⁵ Naho kawia Kora na wandu wake, “Ngama ngamenyi, Mndumii-Ruwa nechiloṟa ke nyiu ai oke na nyiu ai mwele na icho echimsambuṟa, nechimwidimisha isembelia rasionyi.

⁶ Kyasia wikenyi mudi: ngamenyi, iyo na wandu wapfo, mochiira cheteso,

⁷ wikenyipfo makaa ha modo handu hamu na ubani huyake, numa mochishiduo oshangunyi lo Mndumii-Ruwa. Nahong'u lochiwona nyiu asambuṟo nyi Mndumii-Ruwa. Nyo Walewi molema mwidio!”

⁸ Mose kaengeṟa iwia Kora, “Adanyienyi, lanye Walewi!

⁹ Ngesa! Konu muwonyi ke kindo kitutu Ruwa o Waisraeli imusambuṟa nyo kiidi kya wanduwa wa Waisraeli kundu muidime imsembelia, muṟunde ipfo ihemenyi lya Mndumii-Ruwa na iwawutia mṟumo na iṟundia wanduwa wose?

¹⁰ Nalemuinenga kiṟumi kekaa kufui nao nanyo hamu na Walewi wodoyanu wose. Wulalu mukundi irakuo na ukohanyiwo daa?

¹¹ Koikyo iyo na iwo ui nawo muikapana na Mndumii-Ruwa. Nyo muinunuwia Aroni, kyaindi kya lohi muinunuwa kipfa kya Ruwa.”

¹² Mose kaduma ndumi ko Dathani na Abiramu wana wa Eliabu kundu walaho, kyaindi wo wakahamba, “So lochichapfo!

¹³ Ngesa, nyi kindo kitutu ili kuleluwuta kulya Misri, oruka luwode maruwa na wuki, kundu noche iluwaahia kunu nuka? Kingise, nokutana mnene odu!

¹⁴ Ngoseṟa ya isho, kuleluende na orukenyi luwode maruwa na wukipfo, manya kuleluhawia kyoṟa kya madema na madema ha msabibupfo. Noichi nochihaluo wanduwa shipfupfuṟe? Lochichapfo!”

¹⁵ Mose kasungulula mnu, kawia Mndumii-Ruwa, “Manya kulaambie mwano ya wanduwa. Inyi njilemeduo nzoi ya mndu oosepfo, manya njilemewike mndu shifaṟepfo.”

¹⁶ Mose kawia Kora, “Kulade kulacha ngama handu hamu na wandu wapfo oshangunyi lo Mndumii-Ruwa. Aroni nao daa nechikaaho.

¹⁷ Orio umu naduo nungu yake, na iwikapfo ubani, numa nakiduo oshangunyi lo Mndumii-Ruwa; shechiwa cheteso mahana hawi na makumi hatanu; iyo daa na Aroni orio umu onu nechiwada cheteso kyake.”

¹⁸ Kyasia orio umu owo kaduo nungu yake, kawikaho makaa ha modo na ubani numa wakahenda wakahoṟoka mongo fo ihema lyesanzia, handu hamu na Mose na Aroni.

¹⁹ Na Kora kasanyia wandu wose handu hamu, wakahoṟoka oshangunyi lo Mose na Aroni wawei alya mongo fo ihema lyesanzia. Naho pereseng'u kirumi kya Mndumii-Ruwa kikawachea wose!

²⁰ Naho Mndumii-Ruwa kawia Mose na Aroni

²¹ “Lekanenyi na wanduwa, njiwakombetse wulalu kudi.”

²² Kyaindi Mose na Aroni wakakuhutsa wanda na kyamu wechihamba, “Hoi Mndumii-Ruwa ui mawokioonyi ha moo ya wandu wose, Ngesa, mndu umu kakudekio nochisuuya wandu wose?”

²³ Mndumii-Ruwa kawia Mose,

²⁴ “Wia wandu wakure kufui na mahema ha Kora, Dathani na Abiramu.”

²⁵ Kyasia kahendia Dathani na Abiramu, arianyi na wameku wa Waisraeli.

²⁶ Kyekishika kawawia, “Kurenyi iya mahemenyi ha wanduwa wawicho muhende haleshe na mulapae kindo kyawo kyose, mulashike irumatso hamu nawo kipfa kya njonyamaṟo tsawo tsose.”

²⁷ Wandu wakakure alya handu Kora Dathani na Abiramu wawekeri. Dathani na Abiramu wakawuka mahemenyi hawo wakahoṟoka o mongo na waka wawo na wana wawo wose na walya waionga.

²⁸ Mose kawia wandu, “Nyi wudi mochimanya ke Mndumii-Ruwa nyio alenjiduma iwuta shindoshi shose, manya chi chandu inyi njimonyi njikundipfo.

²⁹ Wanduwa wakapfa cha wandu wengi, ang'u wakahoyo nyi ndenga cha wandu wengi, manyenyi ke Mndumii-Ruwa anjidumiepfo.

³⁰ Kyaindi Mndumii-Ruwa kawuta ṟiho lilalemewutike, teri ikang'alauka ikameṟa wanduwa handu hamu na orio kindo kyawo, wakahenda ko wapfu wai na moo, nlyondi mochimanya ke wanduwa walepiṟa Mndumii-Ruwa.”

³¹ Oweṟe cha ili kekimarisa ideda madedoho hose, teri ya handu Dathani na Abiramu wawehoṟoki ikanga'alauka

³² ikawameṟa wanduwo, na wa kanyi kowo, handu hamu na wose waleitumana na Kora na masaa hawo hose.

³³ Kyasia, wo na shose shiwei shawo shikasoṟowia ko wapfu shii na moo. Teri ikawashikia wose, wakasaramaya.

³⁴ Waisraeli wengi wose wawei kufui wekiicho shieṟeṟo shawo waledicha wehamba, “Ludiche, teri ilashike ilumeṟa naso daa.”

³⁵ Numa Mndumii-Ruwa kadika modo fukakombetsa wandu walya mahana hawi na makumi hatanu walehenda idutsia ubani.

Nungu tsewika modo

³⁶ Numa ya isho, Mndumii-Ruwa kawia Mose,

³⁷ “Wia Eleazeri mana o mkohanyi Aroni nawute nungutso kulya modonyi, naolie kuleshe modofo fui ipfo kiidi, kyamba kya nungutso tsinjiele.

³⁸ Tsinjiele cha kipfa wanduwa waleshiende na rasionyi lya Mndumii-Ruwa. Kyasia ira nungutso tsa modo tsa wanduwo walewaaho kipfa kya wunyamari wowo tsisalaṟo tsihaluo kipfinko kya rasionyi. Iki kechiwa wuikimbi ko Waisraeli wose.”

³⁹ Kyasia mkohanyi Eleazari kaira nungu tsilya tsa modo tsa aṟeṟa tsileendo na oshangunyi lo Mndumii-Ruwa nyi wandu walya walekombetso tsikasalaṟo tsikawa kipfinko kya rasionyi.

⁴⁰ Iki kilewa wuikimbi ko Waisraeli ke mnducho oose alai nyi mkohanyi, alai o kisharinyi kya Aroni nalaide na rasionyi idutsia Mndumii-Ruwa opfaamo. Sile wudo nechirumatso cha Kora na walya walemwosha. Ishi shose shilewutika chandu Mndumii-Ruwa alewia Eliezeri kui dumbu lya Mose.

Aroni akiṟa wandu

⁴¹ Ili lya ngama, Waisraeli wose wakanunuwia Mose na Aroni wehamba, “Mulewaha wandu wa Mndumii-Ruwa.”

⁴² Kiheri walekuwumbia oshangunyi lo Mose na Aroni kundu wawawie nyashi yawo, walehaluka woambuya ihema lyesanzia, wakawona ipuchi lyishikie ihemalyo na kiṟumi kya Mndumii-Ruwa kilekuloṟaho.

⁴³ Mose na Aroni walehenda, wakahoṟoka osehu lo ihema lyesanzia,

⁴⁴ na Mndumii-Ruwa kawia Mose,

⁴⁵ “Kaa haleshe na wandu wa njiwakombetse wulalu kudi! Kyaindi wo wakakukumba wanda na kyamu.”

⁴⁶ Mose kawia Aroni, “Ira nungu yapfo ya modo, wikaho modo naiwike mbai ya rasionyi, numa nowikeho ubani nohende nayo faṟa ko wandu iwawikia kisanza. Owinyi faṟa! Nyashi ya Mndumii-Ruwa yamewakooya na ngapo yamewoka iwachea.”

⁴⁷ Nahong'u Aroni kawuta chandu alewio nyi Mose. Kaira nungu yake yeatsia modo kadicha kashika makidi hawi ha wandu wawekusanzie handu hamu. Kekiwona ke ngapo yamewooka, nalewika ubani nungunyi yedutsia kawawikia kisanza.

⁴⁸ Kekiwuta ado, ngapo iya ikatsitsa, nao kadeyo makidi hawi ha wandu wapfiie na wai na moo.

⁴⁹ Iitala lya wandu walepfa lyi wei shiku ikumi na shiina na mahana mfungade (14,700), wutapfo walya walepfa kui wunyamaṟi wo Kora.

⁵⁰ Ngapo yekitsitsa Aroni nalewuya na ko Mose alya mongo fo ihema lyesanzia.