MAITALA 14 - Bibilia Kui Mdedie fo Kimochi

Wandu wanunuwa

¹ Mkambo fose fo Waisraeli fukakapa kieṟeṟo king'anyi, wandu wakafihiṟa kio kilya.

² Wakanunuwia Mose na Aroni wechihamba, “Nanga kima luwepfia Misri!” Nanga lukawekupfia iya nuka.

³ Nkili Mndumii-Ruwa ailuduo ipfo orukenyi? Lochiwaaho shidenyi, na waka wadu na wana wadu wadao masinga ha shidenyi! Chi nanga lukawuya na Misri?

⁴ Kiidima wakawoka iwiana, “Lukaesambuṟa msongoru, luwuye na Misri.”

⁵ Naho Mose na Aroni wakaho wanda na kyamu oshangunyi lo mkambo fose fo Waisraeli.

⁶ Yosua, mana o Nuni na Kalebi, mana o Yefune, sa wawei kiidi kya wandu walya walehenda itiichia orukalo, wakaranduo nguo tsawo

⁷ wakawia mkambo fo Waisraeli, “Orukalo lulehenda itiichia lui lucha mwidio.

⁸ Kokoya Mndumii-Ruwa achihio kyaduso, nechiluduopfo na iluinenga orukalo luwode mfoeṟa fo maruwa na wuki.

⁹ Na kokoya mulalekana na Mndumii-Ruwa, manya mulaowuo wandu wa orukalo. Kyamba wo nyi kindo kitutu tupu koduso; ikyo wawekusirie kilememarisa iwutoho, nao Mndumii-Ruwa nai naso; mulawaowuo!”

¹⁰ Kyaindi mkambo fose fukakuhesha iwakapa na maho Peṟeseng'u, kiṟumi kya Mndumii-Ruwa kikachea huya ihema lyesanzia, oshangunyi lo Waisraeli wose.

Mose aiterewia wandu

¹¹ Kyasia Mndumii-Ruwa nalewia Mose, “Wanduwa wechinjimina kudi mṟasa indii? Na nyi mṟasa indii wechihutsa macha koko, manya chandu ndewuta ṟiho tsose kiidi kyawo?

¹² Njechiwakapa kui ndaṟe njiwicho na iwaarisia kuleshe; kyaindi kipfa kyapfo iyo, njechisungusia mkambo fungi fung'anyi, fuwode pfinya kotawo.”

¹³ Kyaindi Mose kawia Mndumii-Ruwa, “Kulewuta wanduwa orukenyi lo Misri kui pfinya yapfo. Ili Wamisri wechiicho ke nowutia wandu wapfo kudo,

¹⁴ wechiwia wandu wa orukalu mbonyitso. Cha kipfa wanduwa wamewio mbonyi ke iyo, hoi Mndumii-Ruwa nui naso. Kyamba iyo hoi Mndumii-Ruwa, nowonyio napata ili ipuchi lyapfo lyekehoṟoka huyadu, na ke nokelusongoya mfiri na ngo ya ipuchi na kio na ngo ya modo.

¹⁵ Wulalung'u kowaaha wandu wapfo wose na limu, mkambo ilemeicho kiṟumi kyapfo yechihamba.

¹⁶ Mndumii-Ruwa nalewaahia wandu wake kulya nuka kipfa nalelemo iwaduo orukenyi lulya aleteṟia iwainenga.

¹⁷ “Kyasiang'u wulalu ngakuterewa, hoi Mndumii-Ruwa, keluloṟe wuidimi wopfo kui iwuta chandu kuleluteṟia mandi kulehamba,

¹⁸ ‘Inyi Mndumii-Ruwa njekewado nyi nyashi owinyipfo, njiichuo woloru, na njekehooṟia wuwicho na madeko. Kyaindi manya kudo njechida njilakapa wana na wachuku na kishari kya kaṟaṟu na kya kaana kipfa kya wunyamari wo wafee wawopfo.’

¹⁹ Ngakuterewa mnu kehooṟia wanduwa njonyamaṟo tsawo, kui woloru wopfo wung'anyi chandu kulewahooṟia wokia mandi walewuka Misri mṟasa wulalu.”

²⁰ Mndumii-Ruwa kahaluo kahamba, “Ngamewahooṟia chando oterewa.

²¹ Kyaindi kya lohi, chandu njii na moo na chandu wuyana wochiichuo, kiṟumi kyako,

²² kuwode ma umu owo sa alemewona kiṟumi kyako na ṟiho tsako njilewuta kulya Misri na kulya nuka numa kaengeṟa injihesha makambaha hose kada alaadanyia ṟu lyako,

²³ echiida na kulya orukenyi njilelyia nyamu waku wawo ke njechiwainengapfo, na manya iwo wainjipiṟa wechiida napfopfo.

²⁴ Kyaindi kipfa mṟundi oko Kalebi akeri chawopfo na nalenjiindia kui wusumhanyi, njechimshitsa ipfo orukenyi aleida napfo o na luwa lyake wechiluchilia.

²⁵ Kyamba Waamaleki na Wakanaani wekekaa rendewelenyi tsa orukalo, ngama halukenyi numa muhende nuka woambuya ipalyipalyi lya Shamu.”

Mndumii akapa wandu kipfa walenunuwa

²⁶ Kiidima Mndumii-Ruwa kawesa Mose na Aroni,

²⁷ “Kituṟuki kya wandu wawicho wechinjinunuwia wadi mṟasa indi? Ngalemo na inunuwalyi lya Waisraeli kyako!

²⁸ Wulalu wawienyi mudi: So chandu njii na moo, ngahamba inyi Mndumii-Ruwa, njechimuwutia isho isho muihamba:

²⁹ Mochipfa na mnying'a yawo yechikumbo kunu kunu nuka, kipfa walenunuwa kyako inyi, kuwode manya umu onu awada maka wokia makumi hawi na ngoseṟa,

³⁰ echiida na ipfo orukenyi njilelya nyamu imuinenga luwe lonu, shile na Kalebi mana o Yefune, na Yosua mana o Nuni.

³¹ Nyo mulehamba ke wana wanu wechidao masinga ha shidenyi, kyaindi inyi njechiwashitsa wanawo kulya orukenyi mulelupiṟa, kundu walumanye na luwe lowo lokaa.

³² Kyaindi nyo, mochipfiia kunu nuka.

³³ Wana wanu wechaṟahaṟaha na iliia wukiwa kunu nuka ko maka makumi haana, kipfa kya deko lyanu mulaidikie tane mndu onu mofurumia echipfiia kunu nuka.

³⁴ Kui kipfa kya madeko hanu mochilya wukiwa ko maka makumi haana, cha mfiri iya makumi haana muletiichia orukalo, maka fumu ko orio mfiri fumu muwuteho imanya ke inyi njilesuo.

³⁵ Inyi Mndumii-Ruwa ngahamba: kya lohi njechimuwutia njido nyo mose mulekusanzia iya injikaṟuo. Wose wechiarisikia kunu kunu nuka na nyi kunu wechipfiia.”

³⁶ Wandu walya Mose alewaduma wahende itiichia oruka lulya waleende mbonyi tsa wongo wakatewa wandu wakanunuwa kipfa kya Mndumii-Ruwa.

³⁷ Wanduwo waleende mbonyi njiwicho tsa orukalo walepfa kui ngapo oshangunyi lo Mndumii-Ruwa.

³⁸ Kyaindi Yosua mana o Nuni, na Kalebi mana o Yefune walekia kiidi kya wandu walya walehenda itiichia oruka lulya.

Ikuṟeheṟa lya kuwoka ikapa oruka

³⁹ Nao Mose kawia Waisraeli wose, nawo wakafihiṟa kui mawawio mengi.

⁴⁰ Ili lya ngama, wakakure ngamenyi otuko wakado mafumvuhu wehamba, “Wulalu lukuṟeheṟie nakamu ihenda handu halya Mndumii-Ruwa aleluteṟia. Loṟingishia napata ke lulewuta wunyamaṟi.”

⁴¹ Kyaindi Mose kahamba, “Wulalu nki ili mofunja iwawaso lya Mndumii-Ruwa? Kudo mochihuyopfo!

⁴² Mulahende ipfo mafumvunyi mulashike ikapo nyi wakituwa wanu, kyamba Mndumii-Ruwa akeri nanyopfo.

⁴³ Mukasembelia Waamaleki na Wakanaani, mochipfiia shidenyi; cha kipfa moda mulaosha Mndumii-Ruwa, o echikaa hamu nanyopfo.”

⁴⁴ Ma kudo, waleengeṟa ihenda huye ya mafumvunyi, manya chandu isanduku lya Ruwa lya mkundana, manya Mose alalekure kulya mfiṟihenyi.

⁴⁵ Nlyondi Waamaleki na Wakanaani wawekekaa kulya orukenyi lo mafumvu, wakasoka, wakawakapa wakawawinga. Wakawafuna tane mṟinyi fo Horma.