MAITALA 13 - Bibilia Kui Mdedie fo Kimochi

Lokitala wandu wetiichia

¹ Mndumii-Ruwa kawia Mose,

² “Duma wandu wahende iambuya oruka lo Kanaani sa njechiinenga wandu wa Waisraeli. Nochiduma mndu umu umu kuwuka orio kishari, na mnducho kiwaṟi nawe nyi msongoru o kisharikyo kyake.”

³ Kyasia, chandu iwawaso lya Mndumii-Ruwa lii, Mose kaduma wandu kuwuka nuka ya Parani. Wandu wose waledumo wawei wasongoru wa shishari shifoi sha wandu wa Waisraeli.

⁴ Iha nyiho marina hawo: Kuwuka kisharinyi kya Reubeni nyi Shamua mana o Sakuri.

⁵ Kisharinyi kya Simeoni nyi Shafati mana o Hori.

⁶ Kisharinyi kya Yuda nyi Kalebi mana o Yefune.

⁷ Kisharinyi kya Isakari nyi Igali mana o Yosefu.

⁸ Kisharinyi kya Efraimu nyi Hoshea mana o Nuni.

⁹ Kisharinyi kya Benyamini nyi Palti mana o Rafu.

¹⁰ Kisharinyi kya Zebloni nyi Gadieli mana o Sodi.

¹¹ Kisharinyi kya Yosefu (ipfo ko Manase) nyi Gadi mana o Susi.

¹² Kisharinyi kya Dani nyi Amieli mana o Gemali.

¹³ Kisharinyi kya Aseri nyi Seturi mana o Mikaeli.

¹⁴ Kisharinyi kya Naftali nyi Nabi mana o Wofsi.

¹⁵ Kisharinyi kya Gadi nyi Geueli mana o Maki.

¹⁶ Iha nyiho marina ha wandu sa Mose alewaduma wahende itiichia oruka lo Kanaani. Mose kainenga Hoshea mana o Nuni rina lihya, kamlaha nyi Yosua.

¹⁷ Kiheri Mose alewaduma ihenda itiichia oruka lo Kanaani, nalewawia, “Hendenyi kulya kulya mataya Negebu, tane orukenyi lo mafumvu.

¹⁸ Muitiichie orukalo chandu lui. Risenyi-da kokoya wandu waipfo wawode pfinya ang'u wai wafafa, wafoi ang'u waangu.

¹⁹ Tiichienyi kokoya orukalo lulucha ang'u luwicho, na kokoya mṟi yawo wekekaa nyi makambi ang'u nyi mba tsinjiṟingichie na omombo.

²⁰ Tiichienyise kokoya orukalo lulusuṟi ang'u luiukiwa, luwode mashidi ang'u ote. Muwade ngoo nkari na ili mochiwuya endenyipfo ndunda maata tsa orukalo.” Kiherikyo nyi kiwei kya msabibu iwoka iwiṟa.

²¹ Kiidima, wanduwo wakahenda itiichia orukalo wokia nuka ya Sini tane Rehobu kufui na njia yeida na Hamati.

²² Walehenda mṟasa Negebu wakaida tane mṟi fo Hebroni. Ipfo walekooyapfo Waahimani, Washeshai na Watalmai waiwafee nyi Anaki. (Mṟifo Hebroni fuwembike maka mfungade mri fo Soani fui orukenyi lo Misri fulamewiko).

²³ Wekishika pichinyi lya Eshkoli, wanduwo walemanya iṟamba lya msabibu liwewode ndunda tsifoi nalyo likakudiko nyi wandu wawi mlembalemba. Waleweduose na makomamanga maata na makuyu.

²⁴ Handuho kulelaho nyi Pichi lya Eshkoli kipfa kya iṟamba lilya Waisraeli walelimanyaho.

²⁵ Wamemaa itichia oruka ko mfiri makumi haana, wanduwo walewuya.

²⁶ Wakahendia Mose Aroni na mamiingi fo Waisraeli kulya Kadeshi nuka ya Parani, wakawaongoya shindo waleshiwona na iwaloṟa ndunda tsa orukalo.

²⁷ Walewia Mose, “Luleshika orukenyi kuleluduma luhende iitichia; nyi oruka luwode wuki wufoi na maruwa hafoi na ili nyi indunda lyalo.

²⁸ Kyaindi wandu wa kulya wawode pfinya mnu, na mṟi yawo injiikare na ing'anyi mnu. Handu hamu na isho, lulekoyapfo washari wa Anaki .

²⁹ Waamaleki wekekaa Negebu; Wahiti, Wayebusi, na Waamori wekekaa mafumvunyi, na Wakaanani wekekaa kufui na ipalyipalyi lya Mediteranea na kufui na wambaṟa ya meda fo Yordani.”

³⁰ Kyaindi Kalebi kahaluo wandu ndiṟi oshangunyi lo Mose, kahamba, “Luhende wulalu kudi luchilie orukalo. Cha kipfa luwode wuidimi wung'anyi wowinga.”

³¹ Kyaindi wandu walehenda nao itiichia orukalo walehamba, “Lochiidima ikapana na wandu-wopfo; wo wawode pfinya kota so.”

³² Wakadung'anyitsa mbonyi tsa wongo ko Waisraeli kya orukalo wehamba, “Orukalo lulelutiichia lokewaaha wandu walo. Kingise, wandu wose lulewakoyapfo wang'anyi mnu.”

³³ Lulewonapfo mawandu, washari wa Anaki. So lukakuwona lui cha ndatari oshangunyi lowo, na wudo waleweluwona so.