MAITALA 12 - Bibilia Kui Mdedie fo Kimochi

Ngapo ya Miriamu

¹ Numa Miriamu na Aroni wakawoka ideda Mose owicho kipfa kya ili awealikie mka kuwuka Kushi.

² Wakahamba, “Alae Mndumii-Ruwa nalededa na itutuma Mose amonyi tupu? Ngesa, alemedede naso-daa?” Mndumii-Ruwa kaicho madedoho.

³ (Mose nawei mndu mtsiri kota wandu wengi wose wawei wuyanenyi).

⁴ Numa peṟeseng'u, Mndumii-Ruwa kawia Mose, Aroni na Miriamu, “Nchonyi na ihemenyi lyesanzia nyo mui waṟaṟu.” Kyasia wakahenda ihemenyi lyesanzia wa waṟaṟu.

⁵ Mndumii-Ruwa kasoka ai kiidi kya ngo ya ipuchi, kahoṟoka o mongo fo ihema kalaha Aroni na Miriamu. Wose wawawi wakatikiria hafui.

⁶ Kiidima Mndumii-Ruwa kawawia, “Adanyenyi madedo ha hako: kokoya kuwode mwikimbi kiidi kyanu, inyi Mndumii-Ruwa njekekuloṟa koke kui mawonesio ngadeda nao kiidi kya ndodo.

⁷ Kyaindi kya mṟundichu oko Mose nyi kii kiwungi nakamu. O nawode iṟunda lyeringa wandu wako wose.

⁸ Inyi njekededa nao napata kyamu kui kyamu chi kui semeṟipfo. O nekewona mbihu foko inyi Mndumii-Ruwa. Nkiling'u mlaleowuo ideda owicho mṟundichu oko Mose?”

⁹ Naho Mndumii-Ruwa kasuo mnu kipfa kyawo, kakureho kahenda.

¹⁰ Ipuchi lekikure alya huya ihema lyesanzia, Miriamu kawona awodo nyi saka, aimwili cha theluji. Aroni kahaluka ke naambuye Miriamu, kaṟihiyo mnu ambona awodo nyi saka.

¹¹ Oo Aroni kawia Mose, “Hoi mndumii oko, kulalukape ngapo ii kipfa kya wutondo na wunyamaṟi wodu lulekuwutia.

¹² Kulawike Miriamu nawe cha mndu alefeo ampfu, msa kienga kya mbihu foke fumporu.”

¹³ Mose kafihiṟia Mndumii-Ruwa kahamba, “Ngakuterewa hoi Ruwa kemchiṟe.”

¹⁴ Kyaindi Mndumii-Ruwa kawia Mose, “Kokoya ndee kawempuchia mada kyamunyi kyake, ngesa awechiṟeenze mfiri mfungade? Kyasiang'u, mmbute na nja ya handu hesia moo nakaepfo mfiri mfungade, numa nomnenge momu nawuye na handu hesia moo.”

¹⁵ Koikyo Miriamu kafuno na nja ya handu hesia moo ko mfirimfungade. Wandu waleirase kyaṟopfo mtano Miriamu alewihiṟo na handu hesia moo.

¹⁶ Numa ya isho wandu waleira kyaṟo kuwuka Haserothi, wakawika handu hesia moo kulya nuka ya Parani.