MAITALA 11 - Bibilia Kui Mdedie fo Kimochi

Handu helaho Tabera

¹ Wandu walewoka inunuwia Mndumii-Ruwa kya mawukiwa hawo Mndumii Kekiicho nalewado nyi nyashi, kawadikia modo. Modofo fuweimbawo kiidi kyawo fukakoṟa ora lumu lo handu hesia moo.

² Wandu wakafuhia Mose, nao katerewa Mndumii-Ruwa modo fukaruma.

³ Koikyo handu halya kukadumbuyo rina nyi Tabera, kipfa nyihondo modo fo Mndumii-Ruwa fuleakia kiidi kya wandu.

Mose asambuṟa wasongoru makumi mfungade

⁴ Kiidi kya Waisraeli kuwewode wahenu maata waleduana nawo sa wawewode lango tsing'anyi mnu. Waisraeli wakanunuwase lyingi wehamba, “A kima luweidima iinengo nyama lulye!

⁵ Luikumbuo, makunga, lulelya kulya Misri lulawode itaa, masidi, matango, matikiti, shitunguu na shitunguu saumu!

⁶ Kyaindi wulalu pfinya tsadu tsalusiia ma lulawode kelya kingi sile na mana ii tupu.”

⁷ Mana iwei cha ndunda tsa mtama, fana yatso iwe icha bedoza; injiili na opuko.

⁸ Wandu waletengetatengeta wechiisanyia, numa wakasa na maho hesea ang'u wakahuo na shiuṟi, numa wakakoṟa shinungunyi na isungusia mandasi. Mlodo fokyo fuwei cha fo mandasi makaange na mafuda.

⁹ (Kiheri mlewi fuleoloka kulya handu hesia moo kiheri kya kio, nayo mana-da ikaweoloka handu hamu na mlewifo).

¹⁰ Mose kaicho wandu wechifihiṟa ipfo mmbenyi tsose, orio mndu mongonyi fo ihema lyake. Kyasia Mndumii-Ruwa kawado mnu nyi nyashi ing'anyi; nao Mose kawesukio.

¹¹ Naho Mose kawia Mndumii-Ruwa, “Nkili onjiwutia kudi owicho inyi mṟundi opfo? Nkili ulamchihie nyi inyi; nkili onjidika mhanda mlemeri foringa wanduwa wose?

¹² Ngesa nyi inyi njilewafee, tane onjiwia njiwakudike kipeetenyi koko chandu molela ekekudika mana mtutu, njiwaduo mṟasa orukenyi kuleinenga waku wawo?

¹³ Nku njechiende nyama tseinenga wanduwo wose walye? Kyamba waifihiṟa oshangunyi loko wechihamba, ‘Luinenge nyama lulye!’

¹⁴ Njechiidima iinenga wanduwa wafoi wadi shelya walye; ilyo nyi iṟunda lilemeri mnu koko!

¹⁵ Kokoya nyi wudi ochinjiwutia, nanga onjiwaha oweṟe lumu! Kokoya unjiwodie osaṟio ipfo kyamunyi kyapfo, kulanjide njiiṟiwane na wukiwawu woko.”

¹⁶ Kyasia Mndumii-Ruwa kawia Mose, “Sanyia wameku makumi mfungade wa Waisraeli, sa oichi ke wawode wuindi na kiṟumi na iidikio nyi wandu wawe wasongoru, nowaende na ihemenyi lyesanzia, wahoṟoke kufui na iyo.

¹⁷ Njechisoka napfo njidede na iyo; njechiwuta kienga kya mumuyo njilekuinenga, njiwainenge wanduwo. Nawo wechikudika mhanda foringa wanduwo handu hamu na iyo, kulache ikudika mhandafo iyo kumonyi.

¹⁸ Wulalu wia wandu kudi: ‘Kuheṟemtsenyi kipfa kya ngama; mochilya nyama. Mndumii-Ruwa ameicho kieṟeṟo kyanu mochihamba ke muwode mndu momuinenga nyamapfo, na ke mbihu yanu iwei njicha ngoseṟa mandi muwei kulya Misri. Wulalu Mndumii-Ruwa namuinenga nyama nanyo nkimuwaṟi mulye.

¹⁹ Mochilya nyama chi ko mfiri fumu, ang'u iwi, ang'u itanu ang'u ikumi ang'u makumi hawi tupupfo,

²⁰ kyaindi nyi ko meri fumu fuichuo!’ Mochilya mṟasa tsicheye mbuonyi na ipeleko. Isho shose nyi kipfa kya ilyi mlepiṟa Mndumii-Ruwachu akeri iya kiidi kyanu, mkafihiṟa oshangunyi loke mochihamba, ‘Nkili kuleluwuta kulya Misri.’”

²¹ Kyaindi Mose kawia Mndumii-Ruwa, “Itala lya wandu njiwateteṟa iya nyi shiku mahana haṟandaṟu waichumia na madende, na iyo kohamba “Nochiwainenga nyama iwashikie meri fumu!

²² Ngesa! Kochiidimika ishinja machondi na mmbe tsiwashikie? Ngesa! Makunga hose ha ipfo ipalyipalyinyi hadeho kipfa kyawo?

²³ Mndumii-Ruwa kawia Mose, “Ngesa! Wuidimi woko womefafaa? Kyasia nochiwonang'u kokoya idedo lyako lyechiwa lya lohi kopfo ang'u ote.”

²⁴ Kyasia Mose kahenda imanyishia wandu shilya Mndumii-Ruwa ahamba. Numa kasanyia wameku makumi mfungade kuwuka kiidi kya wameku wasongoru nawo kawawika mbarinyi itengetia ihema.

²⁵ Mndumii-Ruwa kasoka ai ipuchinyi kadeda nao. Numa kawuta kienga kya mumuyo sa aweinengie Mose, kainengia orio umu o wameku walya makumi mfungade. Mumuyo fulya fokiida na kowo, wameku wakawoka ihamba shisuku, kyaindi walakiwuuyese iwuta wudo.

²⁶ Wameku wawi kiidi kya walya makumi mfungade walesambuṟo, nyi Eldadi na Medadi, wo waledeo kulya handu hesia moo mandi wodoyawo walehenda ihemenyi. Mumuyo fukawasokia wai kulya kulya handu hesia moo, wakawoka ihamba shisuku alya handu wawei.

²⁷ Manake umu kadicha tapa kahenda iwia Mose, “Elidadi na Medadi waihambashisuku kulya kiṟaṟonyi.”

²⁸ O, Yosua mana o Nuni, msa awei mtarami o Mose wokia wurika woke kawia Mose, “Mndumii oko waime!”

²⁹ Kyaindi Mose kamhaluo kambia, “Ngesa nowado nyi wunyenyi kipfa kyako? A kima Mndumii-Ruwa aweinenga wandu wake wose mumuyo foke nawo wakawa waikimbi!”

³⁰ Numa Mose kawuya na handu hesia moo handu hamu na wameku walya makumi mfungade wa Waisraeli.

Mndumii-Ruwa adika makura

³¹ Lyefurumia Mndumii-Ruwa peṟesengu kawiwita otanu lo oweṟe, lukaende makura kuwuka ipalyipalyinyi tsikalaa wotengetia handu hesia moo handu ha mchumie fo mfiri fumu tsikakuwumbia wanda kufui meta imu wuleshe wodo huye.

³² Kyasia, mfirifo fose puti taṟaṟaa, na mfiri fuleituma wandu wakasanyia makura; kulawode mndu alesanyia wanda ya kilo kiku kimu. Wakaanyika orio handu mbai ya handu hesia moo ihaumiṟa.

³³ Kuwetsuhee nyama tsifoi wandu walamemarisa ilya, Mndumii-Ruwa kawado nyi nyashi kipfa kya wandu, kakapa wandu kui ngapo ing'anyi mnu.

³⁴ Koikyo handu halya kukalaho rina nyi Kibrothhataavi, kipfa npfo kundu wandu walya wawei wakuwu waleṟiko.

³⁵ Kuwuka Kibroth-hataavi wandu wakachumia mṟasa Haseroti, wakawikapfo handu hesia moo yawo wakakaapfo.